Yoshua 5 - MUKANDA USANDU WA ZAMBI 1975

¹ Mianangana eswe a A-Amore waze atwama mu sali lia Yordau ku Chitokelo, ni mianangana eswe a A-Kanana waze atwama ku sesa lia kalunga-lwiji, muze evwile ngwo, Yehova womishine meya a Yordau hali A-Izalele ndo hazauka, mbunge jo jasangunukine. Kapwile nawa ni mbunge, mumu hali A-Izalele.

² Henaho Yehova yamba kuli Yoshua ngwenyi, Linga poko ja mawe ukapwise A-Izalele ngalami kamuchiali.

³ Kashika Yoshua walingile poko ja mawe, yapwisa A-Izalele ngalami ku Ngibeata-Halaloto.

⁴ Waapwishile ngalami mumu ha chikuma chino. Matanga eswe hakachi ka atu aze akatukile ku Engitu, matanga eswe a jita te hanafu mu jila ya mu puya muze te hakatuka kuta ku Engitu.

⁵ Waze eswe akatukile ku Engitu o ngalami, alioze waze eswe asemukine mu jila ya mu puya muze te hakatuka ku Engitu o kaapwishile ngalami.

⁶ Mumu A-Izalele endele makumi awana a miaka mu puya ndo lie vungu lieswe, e matanga eswe a jita afwile, waze akatukile ku Engitu, mumu kapanjikile ku liji lia Yehova. Kuli ayo Yehova walishingile ngwenyi, Kunuchi kumona chifuchi chize Yehova walishingile kuli tulamba twenu kuhana kuli yenu, chifuchi kuze kunokela yamwa ni wuchi.

⁷ Kashika Yoshua wapwishile ngalami ana jo aze asangwile kwasalakana, mumu o te yilima se kaapwishile ngalami mu jila.

⁸ Muze hamana kupwisa ngalami lie vungu lieswe, ahwimine mu mihela yo mu chilombo ndo hahinduka.

⁹ Mba Yehova yamba kuli Yoshua ngwenyi, Musono uno hinanushatununa sau lia Engitu. Kashika jina liako ndo musono ngwo, Ngilingali.

¹⁰ Shimbu A-Izalele achili ku Ngilingali mu chilombo, afungile Chizomboka ha tangwa kumi ni liamuchiwana ha chingoloshi, ha yana ya Yeriku.

¹¹ Muze Chizomboka chapalika mulinachi, ha tangwa lioliene alile mbuto ya kutulika ya mu chifuchi, mbolo kujishi futunwiso hamwe ni tiliku ya kwocha.

¹² Mulinachi mba maná yapatuka muze te halia mbuto ya kutulika ya mu chifuchi. A-Izalele kamwene maná nawa alioze alile mbuto ya chifuchi cha Kanana mwaka uze.

¹³ Muze te Yoshua ku Yeriku ali, yahetula meso jenyi kutala, kumanyi umwe tanga kanamana kumeso jenyi ni katana kenyi wa kutomona mu kwoko lienyi. Yoshua yakundama kuli iye ngwenyi, Ena uli ha sali lia yetu nyi uli ha sali lia akwa kole jetu?

¹⁴ Iye yakumbulula ngwenyi, Ka, alioze yami hineza ngukapwe kapitau ka tujita twa Yehova. Mba Yoshua yafulamana ha meso jenyi nikuwayila, ngwenyi, Mwene, kuchi mutuma yami ngamba ye?

¹⁵ Kapitau ka tujita twa Yehova yamba kuli Yoshua ngwenyi, Chiza haku je ku molu je mumu homaho unamana hasandu. Chocho Yoshua yalinga.