Yoshua 4 - MUKANDA USANDU WA ZAMBI 1975

¹ Muze lie vungu lieswe hiliahwa kuzauka Yordau Yehova yamba kuli Yoshua ngwenyi,

² Sakula hakachi ka atu kumi lia malunga ni malunga aali, ku munyachi mutu, ku munyachi mutu,

³ ukaatume ngwe, Andenu kumi lia mawe ni mawe aali hakachi ka Yordau kwe kuma kuze yiliato ya asasendote yamananga, nukaambate hamwe ni yenu mu sali, nukaatumbike ku chipombelo chenu ufuku uno.

⁴ Chocho Yoshua yasanyika e kumi lia malunga ni malunga aali hakachi ka A-Izalele aze hasakula, ku munyachi mutu, ku munyachi mutu.

⁵ Yoshua yamba kuli ayo ngwenyi, Palikenu kulutwe lia mushete wa Yehova Zambi yenu, ndo mukachi ka Yordau. Mba mutu mweswe hakachi kenu mambata liwe ha chipaya chenyi nikulita ni kwalula cha minyachi ya A-Izalele,

⁶ hanga chikapwe chilayi hakachi kenu muze ana jenu manuhula ku miaka ya kulutwe ngwo, Mawe ano kuchi ananulumbunuka?

⁷ Mba munwaambulwila ngwenu, Meya a Yordau apatukile kumeso ja mushete wa usendo wa Yehova. Muze mushete wazaukile Yordau mba meya a Yordau apatukile. Chocho mawe ano mapwa Chiwulwiso cha mutolo kuli A-Izalele.

⁸ Malunga a Izalele alingile nikulita ni shimbi ja Yoshua. Yanda kumi lia mawe ni mawe aali a mukachi ka Yordau nikulita ni kwalula cha minyachi ya A-Izalele chizechene ngwe Yehova atumine Yoshua. Yazauka no nikwambata ndo ku chipombelo mba yaatumbikako.

⁹ Yoshua yalumbika kumi lia mawe ni mawe aali mukachi ka Yordau, kuma kuze kwamanyine yiliato ya asasendote anambata mushete wa usendo. Kokwene kwali ndo musono.

¹⁰ Mumu asasendote akwa kumbata mushete amanyine mukachi ka Yordau ndo yuma yeswe yamanunukine yize Yehova atumine Yoshua kuhana kuli atu, nikulita ni shimbi jeswe ja Mose kuli Yoshua. E atu azaukile kapupushi.

¹¹ Mba muze atu eswe hahwa kuzauka, mushete wa Yehova ni asasendote azaukile kumeso ja atu.

¹² Ana ja Rupene, ni ana ja Ngate, ni chihanda cha ha muchima cha munyachi wa A-Manase azaukile nikumbata yitwa yo kumeso ja A-Izalele nikulita ni shimbi ja Mose.

¹³ Ngwe makumi awana a tununu a kululika ni yitwa yo ya jita azaukile kumeso ja Yehova ha jita kwe ku yana ya Yeriku.

¹⁴ Tangwa lize Yehova wanangamishine Yoshua kumeso ja A-Izalele eswe. Amuvwilile woma chizechene ngwe avwilile woma Mose matangwa eswe a mwono wenyi.

¹⁵ Yehova yamba kuli Yoshua ngwenyi,

¹⁶ Ambila asasendote akwa kumbata mushete wa Shindakenyo atuhuke mu Yordau.

¹⁷ Kashika Yoshua yatuma asasendote ngwenyi, Tuhukenu mu Yordau.

¹⁸ Muze asasendote atuhukile mukachi ka Yordau nikumbata mushete wa usendo wa Yehova, ni yiliato ya asasendote yatuhukila ha mavu omu, mba meya a Yordau ahilukilile ku muhela wo nikusupwokela ha mungilingili weswe chizechene ngwe hatangu.

¹⁹ Atu atuhukile mu Yordau ha tangwa liamuchikumi lia kakweji mutangu. Yasa chilombo cho mu Ngilingali ha njiza ya Yeriku ku Chivumbuko.

²⁰ Mawe aze kumi ni aali achijile mu Yordau Yoshua yaatambika ku Ngilingali.

²¹ Yamba kuli A-Izalele ngwenyi, Muze ana jenu mu miaka ya kulutwe makahula atato ngwo, Mawe ano kuchi analumbunuka?

²² Mba munulweza ana jenu ngwenu, A-Izalele azaukile yono Yordau ha mavu omu.

²³ Mumu Yehova Zambi yenu womishine meya a Yordau hali yenu ndo hinwazauka, chizechene ngwe Yehova Zambi yenu walingile ku Kalungalwiji Muchila nikumuumisa hali yetu ndo hitwazauka.

²⁴ Hanga mavungu eswe a hashi akanyingike ngwo, Kwoko lia Yehova ndundo Ukwete. Ni yenu nawa nukavwile woma Yehova Zambi yenu ndo ku miaka ya mutolo.