Yoshua 3 - MUKANDA USANDU WA ZAMBI 1975

¹ Ha chimenemene Yoshua yakatuka ku Shitime hamuwika ni A-Izalele eswe. Yaheta ku Yordau, yapombako shimbu kanda azauka.

² Kulutwe lia matangwa atatu yilolo yapalika mu chilombo,

³ nikutuma e atu ngwo, Muze munumona mushete wa usendo wa Yehova Zambi yenu kanaumbata kuli asasendote A-Levi, hikatukenu kuze nwatwama nukaukaule,

⁴ nukanyingike jila yize munuya, mumu kanda nuchipalika jila yino. Hindu munupwisa kapinji hakachi ka yenu ni mushete ngwe tununu aali a mbandu. Kanda nukundamako.

⁵ Yoshua yamba kuli atu ngwenyi, Liselenu ku usandu mumu hamene Yehova malinga yipupu hakachi kenu.

⁶ Yoshua yamba kuli asasendote ngwenyi, Andenu mushete wa usendo nukatetekele e atu. O yanda mushete wa usendo yatetekela e atu.

⁷ Yehova yamba kuli Yoshua ngwenyi, Musono munguputuka kukunangamisa kumeso ja A-Izalele eswe, akanyingike ngwo, Chizechene apwile ni Mose chocho kwali nawa ni iye.

⁸ Ena muwamba asasendote aze anambata mushete wa usendo ngwe, Muze munuheta ku sesa lia meya a Yordau munulima kúlú mwe mu Yordau.

⁹ Yoshua yamba kuli A-Izalele ngwenyi, Tweyenu hano nwivwe maliji a Yehova Zambi yenu.

¹⁰ Yoshua yamba ngwenyi, Ha chikuma chino mununyingika ngwenu, Zambi ya mwono hwali hakachi ka yetu, mba iye kechi kuhona kuhuma A-Kanana, ni A-Hete, ni A-Hevwe, ni A-Perize, ni A-Ngikashe, ni A-Amore, ni A-Yepushe kumeso jetu.

¹¹ Talenu mushete wa usendo wa Mwene wa hashi heswe muupalika kulutwe lienu mu Yordau.

¹² Kashika Sakulenu kumi lia malunga ni malunga aali ku minyachi ya Izalele, ku munyachi mutu, ku munyachi mutu.

¹³ Mba muze yiliato ya asasendote aze anambata mushete wa Yehova, Mwene wa hashi heswe, muyimana mu meya a Yordau, hohene meya a Yordau aze anapalika mamana. E meya anakatuka ku tunda mamanyina mulumba umuwika.

¹⁴ Chocho muze atu akatukile ku mbalaka jo akazauke Yordau, hamwe ni asasendote anambata mushete wa usendo kumeso ja atu,

¹⁵ ni muze akwa kumbata mushete haheta ku Yordau, ni yiliato ya asasendote akwa kumbata mushete yanjila mu sesa lia meya (Yordau kakusupwokela mungilingili wenyi weswe ha kakweji wa kucha mbuto),

¹⁶ e meya aze anakatuka ku tunda yamanyina mulumba kusuku, te ku Alama chihunda chasulangana ni Zaretane. Ni meya waze anayi ku mwanda ku Chitende cha Arapa, che Chitende cha Mungwa, o apatukile ngwi. Chocho atu azaukile hatalanganyi ni Yeriku.

¹⁷ Shimbu te A-Izalele eswe anapalika ha mavu omu, asasendote akwa kumbata mushete wa usendo wa Yehova amanyine ha mavu omu hakachi ka Yordau ndo vungu lieswe hiliahwa kuzauka Yordau.