Yoshua 24 - MUKANDA USANDU WA ZAMBI 1975

¹ Mba Yoshua yakungulula minyachi yeswe ya Izalele ku Shekeme, yasanyika makulwana, ni akwa lutwe, ni akwa kuyula, ni yilolo a Izalele. O yalisolola kumeso ja Zambi.

² Yoshua yamba kuli atu eswe ngwenyi, Yehova Zambi ya Izalele kanambe ngwenyi, Tulamba twenu ha shakulu atwamine mu sali lia Ufrateze, ngwami, Tera tato ya Apalahama ni ya Nehore. Alingilile mazambi akwo.

³ Nachijile kalamba kenu Apalahama mu sali lia Lwiji, namusongwelele ndusu chifuchi cheswe cha Kanana. Nokesele ana jenyi. Namuhele Izake.

⁴ Kuli Izake nahanyine Yakomba ni Esau. Kuli Esau nahanyine chifuchi cha Sere ku milundu achizuke, alioze Yakomba ni ana jenyi apalumukine ku Engitu.

⁵ Natumine Mose ni Arone. Napinjishile A-Engitu ni yize nalingile hakachi ko. Kulutwe nanuchijileko.

⁶ Nachijile tulamba twenu ku Engitu. Nwejile ku kalunga-lwiji alioze A-Engitu ahangile tulamba twenu ni matemba-a-jita ni akwa tuvwalu ndo ku Kalunga-lwiji Muchila.

⁷ Muze atetele kuli Yehova iye wasele milima hakachi ka yenu ni A-Engitu, walundumwishine e meya hali ayo nikwafuka. Meso jenu amwene yize nalingile mu Engitu, mba nwatwamine shimbu linene mu puya.

⁸ Mba nanuhetesele ku chifuchi cha A-Amore waze atwamine sali lize lia Yordau. Ashile jita ni yenu alioze naakunjikile mu moko jenu. Nwazukile chifuchi cho, ni yami naanongesene kumeso jenu.

⁹ Henaho Mbalake, mwana wa Zepore, mwanangana wa Moape, wakatukile nikwasa jita ni A-Izalele. Yatuma kusaka Mbalau mwana wa Mbeore anushinge.

¹⁰ Alioze yami chapanjikile kuli Mbalau, kashika anuwahishile. Chocho nanupulwile ku kwoko lienyi.

¹¹ Nwazaukile Yordau, yinwiza ku Yeriku. A-Yeriku ashile jita ni yenu, chocho nawa A-Amore, ni A-Perize, ni A-Kanana, ni A-Hete, ni A-Ngikashe, ni A-Hevwe, ni A-Yepushe. Alioze naakunjikile mu moko jenu.

¹² Natumine mboji kumeso jenu ahume kumeso jenu mianangana aali a A-Amore, hi ku katana kenu ko, hanji ku uta wenu.

¹³ Nanuhele chifuchi kunwachilingilile milimo. Nanuhele yihunda kunwafungile yenu, alioze nwatwaminemo. Nwakulia mihuko ya minda ya uva ni ya olevwe kunwayitumbile yenu.

¹⁴ Kashika vwilenu woma Yehova haliapwila, numulingile ni mbunge yimuwika ni kushishika. Chizenu hakachi kenu mazambi aze tulamba twenu akombelelele sali lize lia Lwiji, ni mu Engitu, hanga nukalingile Yehova.

¹⁵ Nyi kunushi ni mbunge ya kulingila Yehova, hitongolenu musono waze munwalingila, shina mazambi aze tulamba twenu alingilile mu chifuchi cha mu sali lia Lwiji, nyi shina mazambi a A-Amore akwa chifuchi chino nwatwama. Alioze lia kutwala kuli yami ni akwa zuwo liami etu mutulingila Yehova.

¹⁶ Mba atu eswe akumbulwile ngwo, Chikapwe kusuku ni yetu kwehuka Yehova tukalingile mazambi akwo,

¹⁷ mumu Yehova Zambi yetu iye watuchijile ku chifuchi cha Engitu ku zuwo lia upinji, ni yetu ni tulamba twetu. Iye walingile yipupu yize yinene kumeso jetu nikutufunga jila yeswe twendelele ni hakachi ka mavungu eswe muze twapalikile.

¹⁸ Yehova wahumine kumeso jetu atu eswe, e A-Amore atwamine mu chifuchi, kashika ni yetu nawa mutulingila Yehova mumu iye Zambi yetu.

¹⁹ Alioze Yoshua yamba kuli atu ngwenyi, Kunwahashile kulingila Yehova mumu iye Zambi musandu, Zambi ya ukwa. Kechi kukonekena Utanguko wenu ni milonga yenu.

²⁰ Nyi munwehuka Yehova nukalingile mazambi a tundaka mba makalumuka akanulinge chipi nikununongesa, muze te hanulinga chipema.

²¹ Ahoze e atu ambile kuli Yoshua ngwo, Hi chocho ko, etu mutulingila Yehova.

²² Henaho Yoshua wambile kuli atu ngwenyi, Nuli yela a kulimika ni yenwene ngwenu, Hitwatongola Yehova tukamulingile. O ngwo, E tuli yela.

²³ Iye yamba ngwenyi, Nyi chocho mbilenu mazambi a tundaka nuli no hakachi kenu, nukatalikise mbunge jenu kuli Yehova mwe Zambi ya Izalele.

²⁴ Atu yamba kuli Yoshua ngwo, Yehova Zambi yetu mutumulingila; liji lienyi mutuliononokena.

²⁵ Chocho Yoshua yakolesa usendo ni e atu tangwa lize yaasela yiyulo ni shimbi ku Shekeme.

²⁶ Mba Yoshua wasonekene maliji ano eswe mu mukanda wa shimbi ya Zambi. Yanda luliwe, yalumika kuze kwene mushi lia mutondo wa carvalho muma musandu mwa Yehova.

²⁷ Yoshua yamba kuli atu eswe ngwenyi, Liwe lino mulikapwa uchela kulimika ni yetu mumu hilievwa maliji eswe a Yehova aze hatwamba. Kashika mulikapwa uchela kulimika ni yenu kuchina munulinga ni mafwefwe kuli Zambi yenu.

²⁸ Chocho Yoshua yatuma e atu eswe ku yihinga yo.

²⁹ Kulutwe lia yino yuma Yoshua, mwana wa Nune, kavumbi ka Yehova yafwa. Te kali ni kulakaji lia miaka ni miaka kumi.

³⁰ Amufunjile mu chihinga chenyi mwene ku Timna-Sera chili mu chifuchi cha Eframe ku milundu sali lia ku Norte lia mulundu wa Ngasha.

³¹ A-Izalele alingilile Yehova matangwa eswe a Yoshua, ni matangwa eswe a makulwana aze atwamine ni mwono muze Yoshua hafwa, te waze anyingikine yitanga yize yeswe Yehova walingile hali A-Izalele.

³² Yifwaha ya José yize A-Izalele achijile ku Engitu afunjile mu Shekeme, mu chihela Yakomba walanjile kuli ana ja Hamore, tato ya Shekeme, ha ndando ya kulakaji lia mbongo. Chalumukine chihinga cha A-José.

³³ Eleazare mwana wa Arone yafwa, yamufunda mu Ngibia, chihunda cha Finehase mwanenyi, chize amuhele mu chifuchi cha Eframe ku milundu.