Yoshua 23 - MUKANDA USANDU WA ZAMBI 1975

¹ Kulutwe lia miaka yinji muze Yehova hahwimisa A-Izalele kuli akwa kole jo eswe a kujingilika, mba Yoshua hapwa mukulwana, miaka yenyi hiyoka,

² Yoshua yasanyika A-Izalele eswe, ni makulwana jo, ni akwa lutwe, ni akwa kuyula, ni yilolo. Yamba kuli ayo ngwenyi, Hinapwa mukulwana, miaka yami hiyoka.

³ Ni yenu hinwamona yuma yize yeswe Yehova Zambi yenu halinga ku mavungu ano eswe mumu hali yenu, mumu Yehova Zambi yenu iye hanwashila jita.

⁴ Haliapwila hinanusela mavungu aze asala akapwe chihinga cha minyachi yenu, hamuwika ni mavungu aze eswe hinasutula, chize ku Yordau ndo ku Kalunga-lwiji Munene uli ku Chitokelo.

⁵ Yehova Zambi yenu kumakaashinjika akachine kwe kumeso jenu, kumakaahanga kuze kunuchi kaamona, mba yenu kumunukazuka chifuchi cho ngwe Yehova Zambi yenu hanulakenya.

⁶ Kashika jikizenu kufunga nikulinga yuma yeswe yinasonewa mu mukanda wa shimbi ya Mose. Kanda nukapiangukako, chipwe ku chindume, chipwe ku chimeso.

⁷ Kanda nukalifutula ni mavungu aze asala hakachi kenu. Kanda nukavuluka majina ja mazambi jo, chipwe kulishinga ni majina jo, chipwe kwalingila, chipwe kufukama kuli ayo.

⁸ Alioze lalaminyenu kuli Yehova Zambi yenu chizechene hinwalinga musono.

⁹ Mumu Yehova hahuma kumeso jenu mavungu anene a tachi, mba ha kutwala kuli yenu, niumwe hahasa kuhamika ni yenu ndo musono.

¹⁰ Umuwika hakachi kenu kakuhuma kanunu se Yehova Zambi yenu kakunwashila jita ngwe halakenya ni yenu.

¹¹ Kashika nukalinyonge kanawa nukazange Yehova Zambi yenu.

¹² Mumu nyi munuhilukila kunyima nikulifutula ni mavungu aze asala hakachi kenu nukalimbate no, hanga nukambate mapwo jo, no akambate mapwo jenu,

¹³ nyingikenu kanawa ngwenu, Yehova Zambi yenu kechi kahuma wano mavungu kumeso jenu nawa alioze kumakapwa makambwila ni miheto kuli yenu. Kumakapwa shikote ha pachi jenu, ni mbimbo mu meso jenu ndo mununonga ha chifuchi chino chipema Yehova Zambi yenu hanwaha.

¹⁴ Haliapwila ngunambe kuya jila akuya akwa hashi eswe, ni yenu nunanyingika mu mbunge jenu ni mu alma jenu, e eswe lume, ngwenu, Nichimwe chuma kuchahonene cha yuma yize yeswe yipema Yehova Zambi yenu hanulakenya ha kutwala kuli yenu. Yeswe hiyamanunuka hali yenu; nichimwe chahona.

¹⁵ Alioze chizechene ngwe yuma yeswe yipema yize Yehova Zambi yenu hananulakenya hiyamanunuka, chocho yuma yeswe yipi Yehova manwaha ndo hinwanonga ha chifuchi chino chipema Yehova Zambi yenu hanwaha.

¹⁶ Nyi munutangula usendo wa Yehova Zambi yenu uze hanwamba, nukaye nikulingila mazambi akwo nikufukama kuli ayo, mba utenu wa Yehova muukalekwoka kulimika ni yenu nukanonge lume washi ha chifuchi chipema hanwaha.