Yoshua 22 - MUKANDA USANDU WA ZAMBI 1975

¹ Henaho Yoshua yasanyika A-Rupene, ni A-Ngate, ni chihanda cha ha muchima cha munyachi wa A-Manase,

² yamba kuli ayo ngwenyi, Hinwafunga shimbi jeswe Mose kavumbi ka Yehova wanuhele. Hinwononoka ku liji liami mu yuma yeswe hinanutuma.

³ Kunwehukile akwenu ha matangwa ano anji ndo musono. Hinwononoka kufunga chize anukunjikile kuli Yehova Zambi yenu.

⁴ Mba haliapwila Yehova Zambi yenu hahana uhwimino kuli akwenu chizechene ngwe walilakenyene no. Kashika tewulukenu nukaye ku mahienu ku chifuchi kuze kwatwama chihinga chenu, chize Mose kavumbi ka Yehova wanuhele sali lize lia Yordau.

⁵ Ononokenu kufunga shimbi ni yiyulo yize Mose kavumbi ka Yehova wanutumine, nukazange Yehova Zambi yenu, nukende mu majila jenyi eswe, nukafunge yiyulo yenyi, nukalalaminye kuli iye, nukamulingile ni mbunge jenu jeswe ni alma jenu jeswe.

⁶ Chocho Yoshua waawahishile waashikile, o yaya ku mahio.

⁷ Achi ku chihanda cha ha muchima cha munyachi wa A-Manase Mose te hahana chihinga mu Mbashane, alioze ku chihanda chikwo Yoshua hahana chihinga hamuwika ni akwo mu chifuchi cha mu sali lia Chitokelo lia Yordau. Mba muze Yoshua yaatuma ku mahio nikwawahisa,

⁸ yamba kuli ayo ngwenyi, Hilukilenu ku mahienu ni upite wunji, ni yimuna anji, ni prata, ni oru, ni unengu, ni utale, ni mazalo anji. Yize nwatambwile kuli akwa kole jenu tetenu hakachi ka akwenu.

⁹ Chocho A-Rupene, ni A-Ngate, ni chihanda cha ha muchima cha munyachi wa A-Manase ahilukilile ku mahio nikulihandununa kuli A-Izalele ku Shilo mu chifuchi cha Kanana, akaye ku chifuchi cha Ngiliate, chifuchi choene chize hahinga nikulita ni shimbi ya Yehova kuli Mose.

¹⁰ Muze ahetele ku chifuchi cha Yordau hindu chili mu chifuchi cha Kanana, A-Rupene, ni A-Ngate, ni chihanda cha ha muchima cha munyachi wa A-Manase atungileko chilumbilo kwe ku Yordau. Chilumbilo te chinene.

¹¹ Mba A-Izalele evwile ngwo, A-Rupene, ni A-Ngate, ni chihanda cha ha muchima cha munyachi wa A-Manase hatunga chilumbilo ku njiza ya chifuchi cha Kanana kwe ku Yordau sali lino hapwa lia mbala lia A-Izalele.

¹² Muze A-Izalele hachivwa, chikungulwila cheswe cha A-Izalele chakungulukile ku Shilo kwasa jita no.

¹³ Henaho A-Izalele atumine kuli A-Rupene ni A-Ngate, ni chihanda cha ha muchima cha munyachi wa A-Manase mu chifuchi cha Ngiliate. Atumine Finehase mwana wa Eleazare mwe sasendote,

¹⁴ ni hamwe nenyi kumi lia yilolo, umwe wa ku jimo lieswe lia vungu lia Izalele, mweswe mukulwana wa jimo hakachi ka minyachi ya Izalele.

¹⁵ O yeza kuli A-Rupene, ni A-Ngate, ni chihanda cha ha muchima cha munyachi wa A-Manase mu chifuchi cha Ngiliate, yamba kuli ayo ngwo,

¹⁶ Liji lia chikungulwila cheswe cha Yehova ngwo, Mafwefwe wano aka nwalinga kuli Zambi ya Izalele? Se musono hinwatewuluka ha kukaula Yehova, hinwalitungila chilumbilo cha kukolema Yehova.

¹⁷ Te mulonga wa ku Peore kuwahetele, ndo musono kutwalipemesenewo, wenawo wanehene musongo wa kulukumuka ha chikungulwila cha Yehova.

¹⁸ Kashika hinwahambuluka mu jila ya Yehova musono nyi? Alioze nyi munukolema Yehova musono iye hamene matenukina chikungulwila cheswe cha Izalele.

¹⁹ Haliapwila nyi chifuchi chenu chalichisa, zaukenu nwize ku chifuchi cha Yehova kuze kwatwama tabernakulu ya Yehova, nukalianjile chihinga hakachi ketu. Alioze kanda nukolema Yehova, hanji kutupwisa yetu ngwe akwa kukolema, ha kulitungila chilumbilo chikwo cheka helu lia chilumbilo cha Yehova Zambi yetu.

²⁰ Akane mwana wa Zera te kalingile ni mafwefwe mu chikuma cha yuma yajila, mba ufwatulo kuwaholokelele ha chikungulwila cheswe cha Izalele nyi? Kafwile ukawenyi ha uhenge wenyi.

²¹ Henaho A-Rupene ni A-Ngate ni chihanda cha ha muchima chá munyachi wa A-Manase akumbulwile akwa lutwe a majimo ja A-Izalele ngwo,

²² Mukwa Ndundo, Zambi, Yehova! Mukwa Ndundo, Zambi, Yehova! Iye kananyingika, kashika A-Izalele no akanyingike ngwetu, Nyi kachi chapwa kukolema, hanji mafwefwe, kuli Yehova kanda nutuvwila keke musono

²³ ha kutunga chilumbilo kutewuluka ha kukaula Yehova. Nyi kachi twachilingile kulambwilaho milambu ya kulumba, hanji milambu ya wunga, hanji milambu ya sambukila, mba Yehova mwene atulambilecho.

²⁴ Hi chocho ko, twachilingile ha woma ngwetu, Ku miaka ya kulutwe ana jenu hanji makamba kuli ana jetu ngwo, Enu te chimwe chuma nuli nacho ni Yehova mwe Zambi ya Izalele?

²⁵ Se Yehova hasela Yordau njiza hakachi ka yetu ni yenu, kashika enu A-Rupene ni A-Ngate kunushi ni chihanda muli Yehova. Chocho ana jenu hanji machinda ana jetu kuwayila Yehova.

²⁶ Kashika twambile ngwetu, Tutungenu haliapwila chilumbilo hi cha milambu ya kulumba ko, hanji cha yitapo,

²⁷ alioze chikapwe uchela hakachi ketu ni yenu, ni hakachi ka yisemuko yize yili kulutwe ngwetu, Twakuvumbika Yehova kumeso jenyi ni milambu yetu ya kulumba, ni yitapo, ni milambu ya sambukila, kuchina ana jenu mamba kuli ana jetu ku miaka ya kulutwe ngwo, Chihanda kunushi nacho muli Yehova.

²⁸ Mba twanyongene ngwetu, Nyi mamba chocho kuli yetu, hanji kuli ana jetu ku miaka ya kulutwe, etu mutwamba ngwetu, Talenu wimbulwiso wa chilumbilo cha Yehova chize tulamba twetu alingile. Kuchapwile cha milambu ya kulumba, hanji cha yitapo alioze chikapwe uchela hakachi ka yetu ni yenu.

²⁹ Chikapwe kusuku ni yetu kukolema Yehova, tukatewuluke musono ha kukaula Yehova, tukatunge chilumbilo chimwe cha kulambwilaho hanji milambu ya kulumba, hanji milambu ya wunga, hanji yitapo, helu lia chilumbilo cha Yehova Zambi yetu chize chili kulutwe lia tabernakulu yenyi.

³⁰ Muze Finehase mwe sasendote, ni akwa lutwe a chikungulwila, ni makulwana a majimo ja A-Izalele apwile nenyi evwile maliji a A-Rupene, ni A-Ngate, ni A-Manase aawahilile chikolo.

³¹ Mba Finehase mwana wa Eleazare mwe sasendote wambile kuli A-Rupene, ni A-Ngate, ni A-Manase ngwenyi, Musono hitwanyingika ngwetu, Yehova mwali mukachi ketu, mumu kunwalingile ni mafwefwe ano kuli Yehova, kashika hinwalamwina A-Izalele ku kwoko lia Yehova.

³² Chocho Finehase mwana wa Eleazare mwe sasendote, ni makulwana akatukile kuli A-Rupene ni A-Ngate mu chifuchi cha Ngiliate akeze ku chifuchi cha Kanana kuli A-Izalele, nikwanehena liji.

³³ Mwe lusango wawahilile A-Izalele mba A-Izalele alemesene Zambi. Kahanjikile nawa ya kwasa no jita nikwenyeka chifuchi kuze hatunga A-Rupene ni A-Ngate.

³⁴ A-Rupene, ni A-Ngate alukile chilumbilo jina ngwo, Uchela mumu, ngwo, chapwa uchela hakachi ketu wa kwamba ngwetu, Yehova iye Zambi.