Yoshua 20 - MUKANDA USANDU WA ZAMBI 1975

¹ Henaho Yehova yamba kuli Yoshua ngwenyi,

² Amba kuli A-Izalele ngwe, Tongolenu yihunda ya kuchinyina yize nakwambile kuli Mose,

³ hanga yoze mashiha mutu mweswawo, kachihalile hanji kachinyingikine, akachinyinemo. Muyikapwa kuli yenu uchinyino ha kuchina mukwa kukala manyinga.

⁴ Machinyina ku chimwe cha yihunda yino, mamanyina ku chikolo cha kunjila mu chihunda, malumbununa chikuma chenyi kuli makulwana a chihunda chize. Mba o mamutambula mu chihunda, mamwaha chihela, iye matwama hakachi ko.

⁵ Nyi mwe mukwa kukala manyinga mamukaula, kechi kuhana mwe mukwa kushiha kuli iye. Mumu yashiha mukwo te kachinyingikine. Katwamine ni kole kuli iye kushi.

⁶ Matwama mu chihunda chize ndo hamana kumeso ja chikungulwila akamupatwile, ndo ku kufwa cha sasendote wa lutwe ha mwaka uze. Henaho mukwa kushiha maya ku chihunda chenyi ku mahio, ku chihunda chize akatukile.

⁷ Chocho ahandunwine Kendeshe mu Ngalileya mu chifuchi cha Napatali mu milundu, ni Shekeme mu chifuchi cha Eframe mu milundu, ni Kiriate-Arpa (ngwami Heprone) mu chifuchi cha Yunda mu milundu.

⁸ Mu sali lia Yordau ku sali lia Yeriku ku Chivumbuko atongwele Mbezere mu puya ku tunda, ku munyachi wa Rupene, ni Ramote mu Ngiliate ku munyachi wa Ngate, ni Ngolane mu Mbashane ku munyachi wa Manase.

⁹ Yino ye yihunda ayitongwele hali A-Izalele eswe ni hali njize yoze watwama hakachi ko. Mweswawo mashiha mutu kachihalile, akachinyineko hanga kechi kafwa ku kwoko lia mukwa kukala manyinga, ndo mamana kumeso ja chikungulwila.