Yoshua 2 - MUKANDA USANDU WA ZAMBI 1975

¹ Ku Shitime Yoshua mwana wa Nune watumine malunga aali ngendeshi ngwe ku tenga ngwenyi, Yénu nukatale chifuchi ni Yeriku. O yaya, yaheta ku zuwo lia umwe chikoi jina lienyi, Rahape. Yapombako.

² Achilwezele kuli mwanangana wa Yeriku ngwo, Talenu, amwe malunga A-Izalele haneza ufuku wa musono mukwendesa chifuchi.

³ Mwanangana wa Yeriku yatuma kuli Rahape ngwenyi, Malunga waze ezanga kuli yena nikunjila mu zuwo lie, wanehe haze mumu heza mukwendesa chifuchi cheswe.

⁴ Alioze mwe pwo te handa malunga aze aali, haasweka. Ngwenyi, Chamwenemwene malunga ezanga kuli yami alioze Chanyingikine kuze akatuka.

⁵ Ha ola ya kwajila pito ha ufuku malunga yatuhuka. Chanyingikine kuze ayanga. Kaulenu fuji, mba munwawana.

⁶ Alioze iye haatwala helu lia zuwo, haasweka ni mishachi ya linyu yize kanayanyika ha zuwo.

⁷ Chocho malunga yaakaula mu jila ya kuya ku Yordau ndo ku chau. Muze akwa kukaula hatuhuka ajilile pito.

⁸ Shimbu kanda achipomba, mwe pwo wejile kuli ayo helu lia zuwo.

⁹ Yamba kuli malunga ngwenyi, Ngunanyingika ngwami, Yehova hanwaha chifuchi, ni woma wa yenu hiwatukwata. Chikwo nawa akwa chifuchi eswe anasangunuka kumeso jenu.

¹⁰ Mumu hitunevu chize Yehova womishine meya a Kalunga-lwiji Muchila kumeso jenu muze nwakatukile ku Engitu. Hitunevu nawa chize nwalingile kuli mianangana aali a A-Amore atwamine mu sali lia Yordau, ngwami, Sahone ni Oge waze nwanongesene wupu.

¹¹ Muze twachivwile mbunge jetu jasangunukine; niumwe mutu kapwile ni hamu nawa mumu hali yenu. Mumu Yehova Zambi yenu iye Zambi mwilu ni hashi.

¹² Kashika lilakenyenu ni yami ni shingo kuli Yehova se yami hinanulingila vumbi, ni yenu nawa nukalinge ni vumbi kuli akwa zuwo lia tata. Ngwehenu chilayi chamwenemwene.

¹³ Nukalamwine ni mwono tata ni mama, ni mandumbu jami, ni ayaya, ni ana-akwetu, ni waze eswe ninyo, nukapulule mwono wetu ku kufwa.

¹⁴ Malunga ambile kuli iye ngwo, Nyi kuchi kusolola milimo yino ya yetu mututumbika mwono wetu ha mwono we, ngwetu, muze Yehova matwaha che chifuchi mutulinga ni yena ni vumbi ni umwenemwene.

¹⁵ Mba waasunwishine ni muhipu ku njanela, mumu zuwo lienyi alitungile ha chipanga-cha-mawe cha chihunda, chocho iye watwamine ha chipanga.

¹⁶ Wambile kuli ayo ngwenyi, Yénu ku milundu kuchina akwa kukaula manuwana, nukaswameko matangwa atatu ndo akwa kukaula hanahiluka, mba munuya kwenu.

¹⁷ Malunga ambile kuli iye ngwo, Mutusamba ku shingo Uno hiwatushingisa.

¹⁸ Muze mutunjila mu chifuchi ena mukashila kamuhipu kano kachila mu njanela yino unatusunwishinamo. Mba mukungulula mu zuwo lie tatenu ni noko, ni mandumbu je ni akwa zuwo lia tatenu eswe.

¹⁹ Mweswe matuhuka ku yikolo ya zuwo lie mu tapalo, mutonga wa manyinga jenyi ukapwe ha mutwe wenyi—etu kutushi mutonga. Alioze mweswe uli mu zuwo hamwe ni yena nyi mamulinga chipi mutonga wa manyinga jenyi muupwa ha mitwe yetu.

²⁰ Ahoze nyi yena musolola yino milimo yetu, etu mutusamba ha kutwala ku shingo Uno hiwatushingisa.

²¹ Pwo wambile ngwenyi, Chikapwe nikulita ni maliji jenu. Chocho waashikile, o yakatuka, yaya. Mba iye wakashile kamuhipu kachila mu njanela.

²² Malunga akatukile, ayile ku milundu atwamineko matangwa atatu, ndo akwa kukaula hanahiluka. Mumu akwa kukaula afupile jila yeswe alioze kawanyine nichimwe.

²³ Aho e malunga aali apalumukine ku milundu. Yazauka, yeza kuli Yoshua mwana wa Nune, yamulweza yize yeswe yaawanyine.

²⁴ Yamba kuli Yoshua ngwo, Chamwenemwene Yehova hakunjika chifuchi cheswe mu moko jetu. Chikwo nawa akwa chifuchi eswe analezumuka ha mukunda wa yetu.