Yoshua 19 - MUKANDA USANDU WA ZAMBI 1975

¹ Chela chamuchiali chayile kuli Simeone, ha munyachi wa A-Simeone nikulita ni majimo jo. Chihinga cho chapwile mukachi ka chihinga cha munyachi wa A-Yunda.

² Chihinga cho chapwile chino; Mbia-shipa, ni Shipa, ni Molada,

³ ni Haza-Shuale, ni Mbala, ni Ezeme,

⁴ ni Ele-tolade, ni Mbetule, ni Horoma,

⁵ ni Zikalage, ni Mbete-Markabo, ni Haza-Suza,

⁶ ni Mbete-Lebaote, ni Sharuhene. Kumi lia membo ni membo atatu hamwe ni tuyihunda two.

⁷ Ni Ayine, ni Rimone, ni Etere, ni Ashane, membo awana hamwe ni tuyihunda two,

⁸ hamuwika nawa ni tuyihunda tweswe twa kujingilika membo ano ndo ku Mbalatambia, Ramate wa ku Negeve. Chino chapwile chihinga cha munyachi wa A-Simeone nikulita ni majimo jo.

⁹ Chihinga cha munyachi wa A-Simeone chapwile chihanda cha chifuchi cha A-Yunda. Mumu chihanda cha munyachi wa A-Yunda chaatohele naye kashika munyachi wa A-Simeone atambwile chihinga mukachi ka chihinga cho.

¹⁰ Chela chamuchitatu chayile ku munyachi wa A-Zapulone nikulita ni majimo jo. Chifuchi cha chihinga cho chahetele ndo ku Saride.

¹¹ Mba njiza yacho yakandukila ku Chitokelo, yaya ndo ku Mareale. Yapalikila ku Ndabeshe, ndo ku lwiji uli ku sali lia Njokename ku Chivumbuko.

¹² Chize ku Saride yakondoloka yaya ku Chivumbuko ku njiza ya Chiselote-Tabore. Ku kuze yaya ku Ndaberata, mba ku Yafia.

¹³ Ku kuze yaya ku Chivumbuko ku Ngate-Hefere, ndo ku Ete-Kazini, ni ku Rimone kuze yalihengela ku Nia.

¹⁴ Sali lia ku Norte, njiza yalijinga ndo ku Hanatone, yasulila ku chikulo cha Ifitahele,

¹⁵ ndo ku Katate, ni Nahalale, ni Shimerone, ni Idala, ni Mbeteleme. Kumi lia membo ni membo aali hamwe ni tuyihunda two.

¹⁶ Chino che chihinga cha munyachi wa Zapulone nikulita ni majimo jo, te membo ano ni tuyihunda two.

¹⁷ Chela chamuchiwana chayile kuli Isaka ha munyachi wa Isaka nikulita ni majimo jo.

¹⁸ Mu chifuchi cho mwapwile ni Yezerele ni Chesulote, ni Shuneme,

¹⁹ ni Hafaraime, ni Shione, ni Ana-Harate,

²⁰ ni Rabite, ni Kishione, ni Ebeze,

²¹ ni Remete, ni Ene-Nganime, ni Ene-Hada, ni Mbete-Pazeze.

²² Njiza yapalikila ku Tabore, ni Shahazume, ni Mbete-Shemeshe, yasulila ku Yordau. Kumi lia membo ni membo asambano hamwe ni tuyihunda two.

²³ Chino che chihinga cha munyachi wa A-Isaka nikulita ni majimo jo, e membo ni tuyihunda two.

²⁴ Chela chamuchitano chayile ku munyachi wa Ashe nikulita ni majimo jo.

²⁵ Mu chifuchi cho mwapwile ni Helekata, ni Hali, ni Mbetene, ni Akasafa,

²⁶ ni Alameleke, ni Amanda, ni Mishala. Ku Chitokelo njiza yapalikila ku Karmela, ni Shihore-Libnate.

²⁷ Mba yatalikisa ku Chivumbuko nikuya ndo ku Mbete-Ndagone. Yaya ku Zapulone ni chikulo cha Ifitahele, mba ku Norte ku Mbete-Emeke ni Niele, hindu yaya lume ku Norte ndo ku Kabule,

²⁸ ni Heprone ni Rehobo, ni Hamone, ni Kana, ndo ku Sendone munene.

²⁹ Mba njiza yatalikisa ku Rama nikuheta ku mbonge ya Teru. Mba yalihengela ku Hosa nikusulila ku kalunga-lwiji, ni Mahalabe, ni Akaziba,

³⁰ ni Uma, ni Afeke, ni Rehobo, makumi aali a membo ni membo aali hamwe ni tuyihunda two.

³¹ Chino che chihinga cha munyachi wa Ashe nikulita ni majimo jo, te membo ano ni tuyihunda two.

³² Chela chamuchisambano chayile ku munyachi wa Napatali, ku munyachi wa A-Napatali nikulita ni majimo jo.

³³ Njiza yo yakatuka ku Helepe, chize ku mutondo wa carvalho uli ku Zananime ni ku Adamenikebe ni ku Njabanele, ndo ku Lakumi mba yasulila ku Yordau.

³⁴ Kuze njiza yatalikisa ku Chitokelo ndo ku Azanote-Tabore, mba yaya ku Hukoke, nikupalikila ku Zapulone ku Sule. Ashe yatwama sali lia ku Chitokelo, ni Yunda ku sali lia ku Chivumbuko kwe ku Yordau.

³⁵ Membo a yipanga wano; Zidime, ni Zere, ni Hamate, ni Rakata, ni Chinerote,

³⁶ ni Adama, ni Rama, ni Hazore,

³⁷ ni Kendeshe, ni Endreya, ni Ene-Hazore,

³⁸ ni Yirone, ni Migidalele, ni Horeme, ni Mbete-Anate, ni Mbete-Shemeshe, kumi lia membo ni membo livwa hamwe ni tuyihunda two.

³⁹ Chino che chihinga cha munyachi wa A-Napatali nikulita ni majimo jo, e membo ni tuyihunda two.

⁴⁰ Chela chamuchishimbiali chayile ku munyachi wa Ndane nikulita ni majimo jo.

⁴¹ Mu chifuchi cha chihinga cho mwapwile Zora, ni Esheteole, ni Ire-Shemeshe,

⁴² ni Shalabini, ni Ajalone, ni Itela,

⁴³ ni Eione, ni Timna, ni Ekrone,

⁴⁴ ni Eleteke, ni Ngibetone, ni Mbalata,

⁴⁵ ni Yehude, ni Mbene-Baraka, ni Ngate-Rimone,

⁴⁶ ni Mejakone, ni Rakone, ni chifuchi cha kulitalangana ni Yopa.

⁴⁷ Muze chifuchi cha A-Ndane chaatokele, A-Ndane akandukile nikwasa jita ni A-Lesheme. Mba muze hachitambula yashiha e atu ni katana, achizukile nikuchitunga, nikuluka chihunda cha Lesheme ngwo, Ndane, nikulita ni kalamba ko Ndane.

⁴⁸ Chino che chihinga cha munyachi wa Ndane nikulita ni majimo jo, te membo ano ni tuyihunda two.

⁴⁹ Muze hamana kuteta chifuchi, chihinga ha chihinga, A-Izalele ahanyine chihinga hakachi ko kuli Yoshua mwana wa Nune.

⁵⁰ Nikulita ni shimbi ya Yehova amuhele chihunda chize echile, Timna-Sera mu chifuchi cha Eframe ku milundu. Mba iye watungile che chihunda cheka nawa, watwaminemo.

⁵¹ Yino ye yihinga Eleazare mwe sasendote, ni Yoshua mwana wa Nune, ni makulwana akwa lutwe a minyachi ya A-Izalele atetele nikulita ni chela ku Shilo, kumeso ja Yehova, kwe ku chikolo cha mbalaka ya chikungulwila. Chocho amanyine kwatetela chifuchi.