Yoshua 18 - MUKANDA USANDU WA ZAMBI 1975

¹ Chikungulwila cheswe cha A-Izalele chakungulukile ku Shilo. Yamikako mbalaka ya chikungulwila. Chifuchi te chazeya kumeso jo.

² Kwasalile hakachi ka A-Izalele minyachi shimbiali kanda achiatetela chihinga cho.

³ Kashika Yoshua yamba kuli A-Izalele ngwenyi, Ndo mwaka uka munulengama kunjila ni kutambula chifuchi chino hananwehecho kuli Yehova Zambi ya tulamba twenu?

⁴ Nehenu malunga atatu ku munyachi, malunga atatu ku munyachi, ngukaatume akapalike ku tunda ni ku mwanda akasoneke chize chifuchi chapwa nikulita ni kuchihinga. Mba meza nawa kuli yami.

⁵ Makachiteta yihanda shimbiali, A-Yunda mapwa mu chifuchi chenyi ku Sule, ni akwa José mu chifuchi cho ku Norte.

⁶ Munusoneka chifuchi mu yihanda shimbiali nukanehe ulumbunwiso wacho kuli yami. Mba yami mungunutela chela kuno kwene kumeso ja Yehova Zambi yetu.

⁷ A-Levi keshi ni chihinga hakachi kenu mumu usasendote wa Yehova wapwa chihinga cho. A-Ngate, ni A-Rupene, ni chihanda cha ha muchima cha munyachi wa A-Manase hanatambula chihinga cho mu sali lia Yordau ku Chivumbuko, kuze Mose mwe kavumbi ka Yehova waahelecho.

⁸ Chocho malunga yapwila mu jila. Waze ayile Yoshua yaamba ngwenyi, Nukasoneke chifuchi. Ku tunda ni ku mwanda nukasoneke chifuchi chize chapwa, nukeze nawa kuli yami. Mba yami mungunutela chela kuno kwene kumeso ja Yehova mu Shilo.

⁹ Chocho malunga yakatuka, yapalika mu chifuchi ku tunda ni ku mwanda nikuchisoneka mu mukanda nikulita ni yihunda yacho mu yihanda shimbiali, mba ejile kuli Yoshua mu chilombo mu Shilo.

¹⁰ Yoshua yaatela chela mu Shilo kumeso ja Yehova. Kuze kwene Yoshua yateta chifuchi kuli A-Izalele, kuli mweswe chihinga chenyi.

¹¹ Chela cha munyachi wa A-Mbenjamine chayile nikulita ni majimo jo. Chifuchi cho chapwilile hakachi ka munyachi wa Yunda ni munyachi wa José.

¹² Sali lia ku Norte njiza yo yaputuka ku Yordau mba yakandukila ku mulundu ku sali lia Yeriku ku Norte. Aho yakandukila ku Chitokelo ku chifuchi cha milundu. Yasulila mu puya ya Mbete-Avene.

¹³ Chize ku kuze njiza yapalikila ku Sule, kutalikisa ku Luze ku mulundu wa Luze (likwo Mbetele), mba yapalumukina ku Atarote-Andare ku mulundu uze uli ku Sule ya Mbete-Horone ya ku mwanda.

¹⁴ Mba njiza yakondoloka; yaya sali lia Chitokelo lia mulundu wa ku Sule hindu kutalikisa ku Sule kulitalangana ni Mbete-Horone, yasulila ku Kiriate-Mbale (likwo Kiriate-Yerimi) chihunda cha munyachi wa Yunda. Ayo yeswe njiza ya ku Chitokelo.

¹⁵ Njiza ya ku Sule yaputuka haze lia Kiriate-Yerimi. Chize ku kuze yaya ku Efrone, ku fuji lia meya a Nefatoa.

¹⁶ Mba njiza yapalumukina kulisesa ni mulundu uze watala ku chikulo cha mwana wa Hinome, chatwama ku songo lia ku Norte lia chikulo cha Refane. Mba yapalumukina chikulo cha Hinome, ku Sule ya mulundu wa A-Yepushe, hindu ku mwanda ndo ku Ene-Rogele.

¹⁷ Kuze mba yakondolokela ku Norte ndo ku Ene-Shemeshe, mba ndo ku Ngelilote chize chalitalangana ni jila ya kukandukila ku Andumime. Mba yapalumukina ku Liwe lia Mbohane mwana wa Rupene.

¹⁸ Yalisesa ha Norte ya mulundu wa Mbete-Arapa yapalumukina ku Arapa.

¹⁹ Chize ku kuze njiza yapalikila ku mulundu wa Mbete-Hogala sali lia ku Norte. Yasulila ku konda ya Chitende cha Mungwa ku Norte, ku sanga lia Yordau ku Sule. Ayo ye njiza ya ku Sule.

²⁰ Mwe Yordau wapwa njiza ha sali lia ku Chivumbuko. Acho che chihinga cha munyachi wa Mbenjamine nikulita ni majimo jo, njiza ni njiza kweswe kwa kujingilika.

²¹ Yihunda ya munyachi wa A-Mbenjamine nikulita ni majimo jo yino; Yeriku, ni Mbete-Hogala, ni Emeke-Kezize,

²² ni Mbete-Arapa, ni Zemaraime, ni Mbetele,

²³ ni Avimi, ni Para, ni Ofra,

²⁴ ni Chefari-Amoni, ni Ofini, ni Ngeba. Kumi lia membo ni membo aali ni tuyihunda two.

²⁵ Ni Ngibeone ni Rama, ni Mberete,

²⁶ ni Mizepa, ni Chefira, ni Moza,

²⁷ ni Rekeme, ni Iripiele, ni Tarala,

²⁸ ni Zela, ni Elefe, ni Yepushe, (acho ngwami, Yerusaleme) ni Ngibia, ni Kiriate-Yerimi. Kumi lia membo ni membo awana ni, tuyihunda two. Chino che chihinga cha munyachi wa Mbenjamine nikulita ni majimo jo.