Yoshua 17 - MUKANDA USANDU WA ZAMBI 1975

¹ Henaho atetele chihinga cha mu chela ku munyachi wa A-Manase, se iye kapula-jimo wa José. Kuli Makire, iye kapula-jimo wa Manase, tato ya Ngiliate ahanyine Ngiliate ni Mbashane, mumu iye kajita.

² Atetele chifuchi kuli waze asala a ku munyachi wa A-Manase nikulita ni majimo jo, Abieza, ni Heleke, ni Asariele, ni Shekeme, ni Hefere, ni Shemida. E malunga asemukine ku munyachi wa Manase mwana wa José nikulita ni majimo jo.

³ Zelofehade mwana wa Hefere, mwana wa Ngiliate, mwana wa Makire, mwana wa Manase, keshi ni ana a malunga, alioze ana a mapwo wika. Majina ja anenyi a mapwo wano; Mala, ni Noe, ni Hogala, ni Milika, ni Tiriza.

⁴ O yaheta kuli sasendote Eleazare, ni kuli Yoshua mwana wa Nune, ni kuli akwa kuyula. Yamba ngwo, Yehova watumine Mose akatwehe chihinga hakachi ka usoko wetu. Chocho waahele chihinga hakachi ka ana-akwo ja tato nikulita ni shimbi ya Yehova.

⁵ Chocho kuli Manase kwayile kumi lia yihanda helu lia yifuchi ya Ngiliate ni Mbashane yili mu sali lia Yordau.

⁶ Mumu ana a Manase a mapwo atambwile chihinga hamwe ni anenyi a malunga. Chifuchi cha Ngiliate achitetele kuli A-Manase aze asalile.

⁷ Chifuchi cha Manase chahetele chize ku Ashe ndo ku Mikameta cha ku sali lia Chivumbuko cha Shekeme. Chize ku kuze njiza yatalikisa ku Sule ndo kuli akwa Ene-Tapua.

⁸ Chifuchi cha Tapua te cha mbala cha Manase, alioze chihunda cha Tapua ha njiza ya Manase cha mbala cha ana a Eframe.

⁹ Chize ku kuze njiza yapalumukina ku chitwetwe Kana. Yihunda kwenako ku Sule ya chitwetwe, hakachi ka yihunda ya Manase, ya mbala ya A-Eframe. Mba njiza ya A-Manase yapalikila sali ya ku Norte ya chitwetwe, yasulila ku kalunga-lwiji.

¹⁰ Chifuchi cha ku Sule chapwa cha A-Eframe, cha ku Norte chapwa cha A-Manase. Kalunga-lwiji wapwa njiza, mba ku Norte kwatwama Ashe; ku Chivumbuko kwatwama Isaka.

¹¹ Chikwo nawa hakachi ka A-Isaka ni A-Ashe, A-Manase kali ni Mbete-Shiane ni tuyihunda twako, ni Ibliame ni tuyihunda twako, ni akwa Ndole ni tuyihunda twako, ni akwa Endore ni tuyihunda twako, ni akwa Tanaka ni tuyihunda twako, ni akwa Megidu hi tuyihunda twako, ni ye milundu yitatu.

¹² Hindu A-Manase kahashile kuzuka yihunda yize, mumu A-Kanana aseleko pami kutwama mu chifuchi chize.

¹³ Alioze muze A-Izalele atakamine alingishile A-Kanana ungamba, hindu kaahumine liakulu.

¹⁴ Munyachi wa José yamba kuli Yoshua ngwo, Kuchi te nwatwaha chihanda chimuwika ni chifuchi chimuwika ha chihinga hindu tuli atu anji mumu Yehova hanatuwahisa?

¹⁵ Yoshua yamba kuli ayo ngwenyi, Nyi nuli atu anji yénu ku usaki nukalivukile ku chifuchi cha A-Perize, ni A-Refane, se chifuchi cha Eframe ku milundu chanukeha naye.

¹⁶ Munyachi wa José yamba ngwo, Chifuchi cha ku mulundu chatukeha, hindu A-Kanana eswe aze atwama mu chana kali ni matemba-a-jita a utale, ni waze a ku Mbete-Shiane ni tuyihunda two ni waze a mu chikulo cha Yezerele.

¹⁷ Mba Yoshua yamba kuli akwa José, te A-Eframe, ni A-Manase ngwenyi, Nuli atu anji, ni tachi jinji nuli najo, kashika kunuchi kupwa ni chihanda chimuwika.

¹⁸ Alioze chifuchi cha milundu muchipwa nichenu. Chipwe usaki uliko munuuvuka nikuuzuka ndo ku njiza ya sali lize. Mumu munuhuma A-Kanana chipwe kali ni matemba-a-jita a utale, chipwe anatakama.