Yoshua 16 - MUKANDA USANDU WA ZAMBI 1975

¹ Chihinga cha munyachi wa José chayile chize ku Yordau ku Yeriku, mba ku meya a Yeriku ku Chivumbuko ku puya, nikukanduka chize ku Yeriku ndo ku chifuchi cha milundu ku Mbetele.

² Chize ku Mbetele ndo ku Luze chapalika ku Atarote chifuchi cha A-Arke.

³ Mba chapalumukina ku Chitokelo ku chifuchi cha A-Yafele, ndo ku chifuchi cha Mbete-Horone cha ku mwanda, ndo ku Ngezere, mba chasulila ku kalunga-lwiji.

⁴ A-José, A-Manase ni A-Eframe atambwile chihinga cho.

⁵ Chifuchi cha A-Eframe nikulita ni minyachi yo chino. Njiza ya chihinga cho ha Chivumbuko yapwile Atarote-Andare ndo ku Mbete-Horone ku tunda,

⁶ mba chize kuze njiza yaya lume ku kalunga-lwiji. Ku Norte kuli Mikameta, mba ku Chivumbuko njiza yakondolokela ku Tanata-shilo, yapalikako nikutalikisa ku Chivumbuko ndo ku Njanoa.

⁷ Yachiza ku Njanoa ndo ku Atarote, ni ku Nara, yalisesa ni Yeriku nikusulila ku Yordau.

⁸ Chize ku Tapua njiza yaya ku Chitokelo ndo ku chitwetwe Kana, yasulila ku kalunga-lwiji. Chocho chapwa chihinga cha munyachi wa A-Eframe nikulita ni majimo jo,

⁹ hamwe ni membo aze aaselele A-Eframe mu chihinga cha A-Manase; membo aze eswe ni tuyihunda two.

¹⁰ Hindu kahumine A-Kanana waze atwama mu Ngezere. Chocho A-Kanana hanatwama hakachi ka A-Eframe ndo musono, alioze hapwa ndungo ja kulinga ungamba.