Yoshua 14 - MUKANDA USANDU WA ZAMBI 1975

¹ Yenayo yihinga A-Izalele atambwile mu chifuchi cha Kanana. Eleazare mwe sasendote, ni Yoshua mwana wa Nune, ni makulwana akwa lutwe a minyachi ya A-Izalele aateteleleyo.

² Chihinga cho chapwile cha mu chela ngwe Yehova hatuma Mose ha kutwala kuli akwa minyachi livwa ni chihanda cha ha muchima cha munyachi.

³ Mumu Mose te hanahana chihinga kuli akwa minyachi yiali ni chihanda cha ha muchima cha munyachi, sali lize lia Yordau. Alioze kuli A-Levi kaahele nichimwe chihinga hakachi ko.

⁴ Mumu A-José apwile minyachi yiali, A-Manase ni A-Eframe, mba kahanyine chihanda nichimwe kuli A-Levi mu chifuchi shina yihunda ya kutwamamo ni ulilo wako ha yimuna jo ni upite wo.

⁵ A-Izalele alingile chize Yehova watumine Mose, atetele chifuchi.

⁶ Mba A-Yunda ejile kuli Yoshua ku Ngilingali. Kalemba, mwana wa Yefune, Ka-Kenaze, wambile kuli iye ngwenyi. Unanyingika chize Yehova wambile kuli Mose, mwe mutu wa Zambi, mu Kandeshe-Mbania ha kutwala kuli yena ni yami.

⁷ Muze Mose mwe kavumbi ka Yehova ku Kandeshe-Mbania wangutumine kwendesa chifuchi, napwile ni makumi awana a miaka, mba namunehene liji nikulita ni chize chapwile mu mbunge yami.

⁸ Alioze akwetu waze ayile ni yami, o alezumwishine mbunge ja atu. Hindu yami nakawile Yehova Zambi yami ndusu mu yuma yeswe.

⁹ Mba Mose walishingile tangwa lize ngwenyi, Pundu, chifuchi cheswe hiwaliata kumuchikapwa chihinga cha mutolo kuli yena ni ana je, mumu hiwakaula Yehova Zambi yami ndusu mu yuma yeswe.

¹⁰ Kashika, talenu, Yehova hangufunga ni mwono chizechene ngwe ambile, makumi awana a miaka ni miako yitano, chize ku tangwa lize Yehova wambile liji lino kuli Mose, cheswe A-Izalele machenda mu puya. Haliapwila nguli ni makumi nake a miaka ni miaka yitano.

¹¹ Ngunatakama ngu ndo musono chizechene ngwe tangwa lize Mose wangutumine. Tachi jami ja haliapwila chimuwika jinapu ni ha tangwa lize, chipwe ha jita, chipwe ha kuya ni kwiza.

¹² Kashika ngwehenu chifuchi chino cha milundu Yehova wambile tangwa lize, mumu wevwile ha tangwa lize ngwo, A-Anake atwamako mu yihunda yinene ya kukolesa. Hanji Yehova mapwa ni yami ngukaahume ngwe Yehova hanambe.

¹³ Mba Yoshua yamuwahisa. Yahana Heprone kuli Kalemba mwana wa Yefune, chikapwe chihinga.

¹⁴ Chocho Heprone chalumukine chihinga cha Kalemba, mwana wa Yefune, Ka-Kenaze, ndo musono. Mumu wakawile Yehova Zambi ya Izalele ndusu mu yuma yeswe.

¹⁵ Jina lia Heprone liapwile te Kiriate-Arpa. Mwe Arpa yono wapwile mukwa lutwe hakachi ka A-Anake. Mba chifuchi chahwimine ku jita.