Yoshua 13 - MUKANDA USANDU WA ZAMBI 1975

¹ Mba Yoshua hapwa mukulwana. Miaka yenyi hiyoka. Kashika Yehova yamba kuli iye ngwenyi, Uli mukulwana, miaka ye hiyoka, hindu kwasala chifuchi chinene kuzuka.

² Chifuchi chasala chino, yihanda yeswe ya A-Filistea, ni yeswe ya A-Ngeshure.

³ (Chize ku Shihore ku Chivumbuko cha Engitu ndo ku njiza ya Ekrone ku Norte cheswe, ngwo, cha A-Kanana. Mianangana atano a A-Filistea aliko; au wa Ngeza, au wa Ashedode, au wa Asekalone, au wa Ngate, au wa Ekrone) ni cha A-Avimi.

⁴ Ku Sule chifuchi cheswe cha A-Kanana ni Miara cha A-Sendone, ni ku Afeke, ndo ku njiza ya A-Amore.

⁵ Ni chifuchi cha A-Ngebale ni Lebano kweswe ku Chivumbuko, chize ku Mbale-Ngate ku mwanda wa mulundu wa Hermone ndo ku unjililo wa Hamate,

⁶ waze eswe atwama mu chifuchi cha milundu chize ku Lebano ndo ku Miserefote-maime, chipwe A-Sendone eswe, yami mwene mungwahuma kumeso ja A-Izalele; chino wika, ukatetele chifuchi hakachi ka A-Izalele chikapwe chihinga chizechene ngwe hinakwamba.

⁷ Kashika ukatete chifuchi chino chikapwe chihinga kuli minyachi livwa ni chihanda cha ha muchima cha munyachi wa A-Manase.

⁸ A-Rupene ni A-Ngate hamuwika ni chihanda chikwo cha munyachi wa A-Manase o atambwile chihinga cho, chize Mose waahele, mu sali lia Yordau ku Chivumbuko, che chize Mose kavumbi ka Yehova waahele.

⁹ Chize ku Aroere chili ku sesa lia chikulo cha Arnone, ni chihunda chili mukachi ka chikulo, ni ku tunda kweswe ku Medeba ndo ku Ndibone.

¹⁰ Ni yihunda yeswe ya Sahone mwanangana wa A-Amore yoze watwamine mu Heshebone, nikuyula ndo ku njiza ya A-Amone.

¹¹ Ni Ngiliate ni chifuchi cheswe cha A-Ngeshure ni A-Makata, ni mulundu weswe wa Hermone, ni Mbashane mweswe ndo ku Saleka.

¹² Ni chifuchi cheswe cha Oge mu Mbashane yoze wayulile mu Asatarote ni mu Endreya (iye wika wasalile wa kuli A-Refane). Wano eswe te Mose haakumba, haahuma.

¹³ Hindu A-Izalele kahumine A-Ngeshure ni A-Makata, alioze Ngeshure ni Makata anatwama hakachi ka A-Izalele ndo musono.

¹⁴ Ku munyachi wa Levi wika Mose kahanyine chihinga nichimwe. Milambu ya kahia kuli Yehova Zambi ya Izalele yapwa chihinga cho ngwe Zambi wamwambile.

¹⁵ Mose wahanyine chihinga ku munyachi wa A-Rupene nikulita ni majimo jo.

¹⁶ Chifuchi cho chapwile chize ku Aroere chili ku sesa lia chikulo cha Arnone, ni chihunda chili mukachi ka chikulo, ni ku tunda kweswe ku Medeba;

¹⁷ hamuwika ni Heshebone ni yihunda yacho yeswe ha tunda, ngwo, Ndibone, ni Mbamote-Mbale, ni Mbete-Mbalemeone,

¹⁸ ni Yahaze, ni Kedemote, ni Mefata,

¹⁹ ni Kiriataime, ni Sibima, ni Zerete-Shahale ha mulundu mu chikulo,

²⁰ ni Mbete-Peore, ni ukandukilo wa Pisiga, ni Mbete-Jeshimote.

²¹ Acho chinalumbunuka yihunda yeswe ya ku tunda, ni chifuchi cheswe cha Sahone mwanangana wa A-Amore, yoze wayulile mu Heshebone. Mose wamukumbile hamuwika ni akwa kuyula ja A-Mindiane Evi, ni Rekeme, ni Zure, ni Hure, ni Reba, yilolo ja Sahone atwamine mu chifuchi.

²² Mbalau nawa mwana wa Mbeore, mukwa munanyi, A-Izalele amushihile ni katana hakachi ka akwo aze ashihile.

²³ Njiza ya A-Rupene mwe Yordau iye njiza. Chino chapwile chihinga cha A-Rupene nikulita ni minyachi yo, ni membo jo, ni yihunda yo.

²⁴ Mose wahanyine chihinga nawa ku munyachi wa A-Ngate nikulita ni majimo jo.

²⁵ Chifuchi cho chapwile Yazere ni yihunda yeswe ya Ngiliate, ni chihanda cha ha muchima cha chifuchi cha A-Amone ndo ku Aroere chili ku Chivumbuko cha Raba,

²⁶ chize ku Heshebone ndo ku Ramate-Mizepa ni Mbetonime. Chize ku Mahaneme ndo ku chifuchi cha Ndebire,

²⁷ ni mu chikulo cha Mbete-Arame, ni Mbete-Nimera, ni Sukote ni Zafone, chize cheswe chasalile cha ku chifuchi cha Sahone mwanangana wa Heshebone, Chikwete Yordau njiza yacho ndo ku mwanda wa Chitende cha Chinerote, ku Chivumbuko sali lize lia Yordau.

²⁸ Chino che chihinga cha A-Ngate nikulita ni minyachi yo, ni membo jo, ni yihunda yo.

²⁹ Mose wahanyine chihinga ku chihanda cha ha muchima cha munyachi wa A-Manase. Wachitetele kuli akwa chihanda cha ha muchima cha munyachi wa A-Manase nikulita ni majimo jo.

³⁰ Chifuchi cho chapwile chize ku Mahaneme ndusu Mbashane mweswe, chifuchi cheswe cha Oge mwanangana wa Mbashane, ni yihunda yeswe ya Njaire mu Mbashane, te makumi asambano a membo,

³¹ ni chihanda cha ha muchima cha Ngiliate, ni Asatarote, ni Endreya, membo a mu chifuchi cha Oge mu Mbashane; yino ayihanyine kuli A-Makire mwana wa Manase, ha chihanda cha ha muchima cha A-Makire nikulita ni minyachi yo.

³² Yihinga yino Mose wayitetele mu yana ya Moape sali lize lia Yordau ku Chivumbuko cha Yeriku.

³³ Alioze ku munyachi wa Levi Mose kahanyine chihinga nichimwe. Yehova Zambi ya Izalele iye chihinga cho chocho hanambe kuli ayo.