Yoshua 11 - MUKANDA USANDU WA ZAMBI 1975

¹ Muze Jabini mwanangana wa Hazore wevwile yino yuma yatuma kuli Jobaba mwanangana wa Madone, ni kuli mwanangana wa Shimerone, ni kuli mwanangana wa Akasafa.

² Yatuma nawa kuli mianangana a ku milundu ku Norte, ni ku Arapa sali lia ku Sule lia Chinerote, ni mu yikulo, ni ku Nafo-Ndole ku Chitokelo,

³ ni kuli A-Kanana ku Chivumbuko ni ku Chitokelo, ni kuli A-Amore, ni A-Hete, ni A-Perize, ni A-Yepushe mu milundu, ni A-Hevwe ku mwanda wa Hermone mu chifuchi cha Mizepa.

⁴ Atuhukile ni tujita two eswe chihuji chinene. Ha kwalula apwile ngwe masekeseke ha ngenge ya kalunga-lwiji, ni tuvwalu anji ni matemba.

⁵ Mianangana waze eswe afutwile atu jo. Yeza, yasa chilombo cho hamuwika ku meya a Merome akase jita ni A-Izalele.

⁶ Yehova yamba kuli Yoshua ngwenyi, Kanda nwavwila woma, mumu ha ola yino hamene mungwakunjika eswe, a kushiha, kuli A-Izalele. Munuteta mijipa ya tuvwalu two, munwocha matemba jo.

⁷ Kashika Yoshua waahetele susumuku hamuwika ni tujita twenyi eswe kwe ku meya a Merome. Yasa no jita.

⁸ Yehova yaakunjika mu moko ja A-Izalele. O yaalamba, yaahanga ndo ku Sendone munene ni Miserefote-maime, ni ku Chivumbuko ndo ku chikulo cha Mizepa. Yaashiha, kahichikile chipwe katotamukele.

⁹ Yoshua yaalinga chize Yehova yamutuma. Yateta mijipa ya tuvwalu, yocha matemba ni kahia.

¹⁰ Ha matangwa aze Yoshua yalikoneka, yatambula Hazore, yashiha mwanangana wako ni katana. Mumu kushi te Hazore chapwile chihunda cha lutwe hakachi ka mawanangana aze.

¹¹ Yashiha ni katana waze eswe apwilemo, nikwanongesa liakulu. Niumwe wa kuhwima mwiku wasalilemo. Mba yocha Hazore ni kahia.

¹² Yihunda yeswe ya mianangana waze, Yoshua wayitambwile hamwe ni mianangana jo, nikushiha ni katana atu jamo eswe, nikwanongesa liakulu chizechene ngwe Mose kavumbi ka Yehova watumine.

¹³ Alioze A-Izalele kochele yihunda yize ya ha milumba, shina Hazore wika; acho Yoshua yachocha.

¹⁴ Upite weswe wa yihunda yize hamwe ni yimuna A-Izalele yatambula yikapwe niyo. Alioze e atu aashihile eswe ni katana ndo haanongesa. Kukwasalile niumwe ni mwiku wa mwono.

¹⁵ Chizechene ngwe Yehova watumine Mose kavumbi kenyi, chocho Mose watumine Yoshua, chocho Yoshua yalinga. Yoshua kahichikile chuma nichimwe cha yize Yehova watumine Mose.

¹⁶ Chocho Yoshua watambwile chifuchi chize cheswe, chifuchi cha milundu ni kweswe ku Negeve, ni chifuchi cheswe cha Ngoshone, ni chifuchi cha chikulo, ni Arapa, ni chifuchi cha Izalele cha milundu ni cha yikulo,

¹⁷ chize ku mulundu wa Halaka unakatuka ku Sere ndo ku Mbale-Ngate mu chikulo cha Lebano ku mwanda wa mulundu wa Hermone. Wakwachile mianangana jo eswe nikwalamba nikwashiha.

¹⁸ Yoshua washile jita shimbu linene ni mianangana waze eswe.

¹⁹ Kukwapwile niamwe akwa yihunda yize alitesele ni A-Izalele shina A-Hevwe waze atwama mu Ngibeone. Eswe aakwachile mu jita.

²⁰ Mumu Yehova wachilingile kukalisa mbunge jo akase jita ni A-Izalele hanga akaanongese liakulu. Kawanyine keke. Aajimine chizechene ngwe Yehova watumine Mose.

²¹ Yoshua wejile mwaka uze wene nikujima A-Anake ku chifuchi cha milundu, ni ku Heprone, ni ku Ndebire, ni ku Anape, ni ku chifuchi cheswe cha Yunda ku milundu, ni ku chifuchi cheswe cha Izalele ku milundu. Yoshua waajimine jito hamwe ni yihunda yo.

²² Kukwasalile A-Anake niamwe mu chifuchi cheswe cha A-Izalele. Shina mu Ngeza ni mu Ngata, ni mu Ashedode, amwe asalile.

²³ Chocho Yoshua watambwile Chifuchi cheswe nikulita ni liji lieswe Yehova wambile kuli Mose. Yoshua wachihanyine kuli A-Izalele chihinga nikulita ni minyachi yo, munyachi ni chihanda chawo, munyachi ni chihanda chawo. Mba chifuchi chahwimine ku jita.