Yoshua 10 - MUKANDA USANDU WA ZAMBI 1975

¹ Adonezedeke mwanangana wa Yerusaleme wevwile chize Yoshua hatambula Ayi nikuchonwona liakulu, nikulinga ku Ayi ni mwanangana wacho chizechene ngwe halinga ku Yeriku ni mwanangana wacho. Wevwile nawa ngwe akwa Ngibeone hawana ni A-Izalele, hatwama hakachi ko.

² Mba muze evwile yuma yino woma wunji wamukwachile mumu Ngibeone wapwile te chihunda chinene, ngwe yimwe mbala ya mwanangana; te chapwile chinene, Ayi chikepe, ni malunga jamo eswe apwile yitakame.

³ Chocho Adonezedeke mwanangana wa Yerusaleme yatuma kuli Hohame mwanangana wa Heprone, ni kuli Pirame mwanangana wa Yaramuta, ni kuli Yafia mwanangana wa Lakishi, ni kuli Ndebire mwanangana wa Eglone ngwenyi,

⁴ Tweyenu kuli yami nukangukwase tukalambe A-Ngibeone. Mumu hawana ni Yoshua ni A-Izalele.

⁵ Mba e mianangana atano a A-Amore, mukwo mwanangana wa Yerusaleme, mukwo mwanangana wa Heprone, mukwo mwanangana wa Yaramuta, mukwo mwanangana wa Lakishi, mukwo mwanangana wa Eglone yakungulula tujita two, yakanduka ni maswalale jo eswe, yasa chilombo cho kulutwe lia Ngibeone nikwasa no jita.

⁶ Malunga a Ngibeone yatuma kuli Yoshua mu chilombo cha Ngilingali ngwo, Kanda nwecha yetu ngamba jenu ku kwoko lienu. Tweyenu kuli yetu fuji nutulamwine, nutukwase mumu mianangana eswe a A-Amore wano atwama mu milundu hanalikungulula kulimika ni yetu.

⁷ Kashika Yoshua yakatuka ku Ngilingali, iye ni tujita eswe hamwe nenyi, ni akwa hamu eswe a tachi.

⁸ Yehova yamba kuli Yoshua ngwenyi, Kanda wavwila woma mumu hinaakunjika mu moko je. Kechi kumana kumeso je, chipwe lunga umuwika.

⁹ Chocho Yoshua yeza kuli ayo susumuku nikwenda ndusu ufuku weswe chize ku Ngilingali.

¹⁰ Mba Yehova waakolesele mwongo wunji kumeso ja A-Izalele. O yaashiha ni kwonwona chinene ku Ngibeone. Yaahanga mu jila ya kukandukila ku Mbete-Horone, yaalamba ndo ku Azeka ni Makeda.

¹¹ Shimbu machichina A-Izalele nikupalumukina mulundu wa Mbete-Horone, Yehova mwilu wanokesene mawe anene hali ayo ndo ku Azeka nikwashiha. Waze afwile ni mawe anji; waze ashihile kuli A-Izalele ni katana akepe.

¹² Mba Yoshua yamba kuli Yehova tangwa lize Yehova yakunjika A-Amore kuli A-Izalele, yamba kumeso ja A-Izalele ngwenyi, Ena, tangwa, mana lume ha Ngibeone. Ni yena, kakweji, mana ha chikulo cha Ajalone.

¹³ Mba tangwa liamanyine ni kakweji kendele ndo vungu lia Izalele hakala milonga ya akwa kole jo. Te kachisonekene mu mukanda wa Njasha nyi? Ngwo, Tangwa liamanyine hakachi ka lilu, kulialipupwishile kunjila ngwe ha tangwa lia muwundu nawa.

¹⁴ Kukwapwile tangwa ngwe lize, chipwe kuze kanda chipwe kuno kanda muze Yehova yapanjika ku liji lia mutu. Mumu Yehova yasa jita hali A-Izalele.

¹⁵ Henaho Yoshua yahiluka, yeza ku chilombo ku Ngilingali ni A-Izalele eswe hamwe nenyi.

¹⁶ Mba mianangana wano atano achinyine, yaswama mu chivwenge ku Makeda.

¹⁷ Yambulwila Yoshua ngwo, Hitwawana e mianangana atano anaswame mu chivwenge ku Makeda.

¹⁸ Yoshua yamba ngwenyi, Langumunenu mawe anene nukajike utuhukilo wa chivwenge, nukaseko malunga kwafunga.

¹⁹ Alioze kanda numanako yenu. Kaulenu akwa kole jenu, nukaalambe kunyima. Kanda akanjila mu yihunda yo, mumu Yehova Zambi yenu hanaakunjika mu moko jenu.

²⁰ Muze Yoshua ni malunga a A-Izalele hanamane kwashiha ni kwonwona chinene ndo hajimuka, mba waze asalile hanjila mu yihunda ya yipanga,

²¹ mba atu eswe ejile kuli Yoshua kanawa ku chilombo ku Makeda. Niumwe wasungile limi lienyi hali niumwe wa A-Izalele.

²² Henaho Yoshua yamba ngwenyi, Shikululenu ku utuhukilo wa chivwenge, nuchizemo e mianangana atano nwanehe kuli yami.

²³ Chocho yalinga. Yachiza mu chivwenge e mianangana atano nikwaneha kuli iye, mukwo mwanangana wa Yerusaleme, mukwo mwanangana wa Heprone, mukwo mwanangana wa Yaramuta, mukwo mwanangana wa Lakishi, mukwo mwanangana wa Eglone.

²⁴ Muze haneha e mianangana kuli Yoshua iye yasanyika malunga eswe a Izalele. Yamba kuli akwa lutwe a tujita waze ayile nenyi ngwenyi, Kundamenu nukaliate ha kota ja wano mianangana. O yakundama, yaliata ha kota jo.

²⁵ Yoshua yamba kuli ayo ngwenyi, Kanda nwivwa woma hanji mwongo. Takamenu, hamukenu, mumu chocho Yehova malinga kuli akwa kole jenu eswe waze nwalinwa no.

²⁶ Mba Yoshua yaalamba ni katana nikwashiha, nikwazezeleka ha mitondo yitano. Yazezala ha mitondo ndo ngoloshi.

²⁷ Alioze ha kunjila cha tangwa Yoshua yatuma, yaachiza ku mitondo yaambila mu chivwenge muze aswamine. Yajika utuhukilo wa chivwenge ni mawe anene. Kokwene kwali ndo musono.

²⁸ Tangwa lioliene Yoshua yatambula chihunda cha Makeda nikulamba atu jako ni mwanangana wako ni katana. Yanongesa liakulu atu jamo eswe, niumwe wasala wakuhi. Kuli mwanangana wa Makeda yalinga chizechene ngwe halinga ni mwanangana wa Yeriku.

²⁹ Mba Yoshua yakatuka ku Makeda hamuwika ni A-Izalele eswe, yeza ku Libna, yasa jita ni akwa Libna.

³⁰ Yehova yachikunjika mu moko ja A-Izalele hamuwika ni mwanangana wako. Atu eswe atwamamo yaalamba ni katana, niumwe wasala wakuhi. Kuli mwanangana wako yalinga chizechene ngwe halinga kuli mwanangana wa Yeriku.

³¹ Yoshua yakatuka ku Libna yaheta ku Lakishi hamwe ni A-Izalele eswe. Yachiseleka, yachikumba.

³² Yehova yakunjika Lakishi mu moko ja A-Izalele. Yachitambula ha tangwa liamuchiali, yachilamba ni katana, ni atu eswe apwilemo, chizechene ngwe halinga ku Libna.

³³ Henaho Horame mwanangana wa Ngezere yaheta nikukwasa akwa Lakishi. Yoshua yamulamba hamwe ni atu jenyi ndo niumwe wasala wakuhi.

³⁴ Yoshua yakatuka ku Lakishi yaheta ku Eglone hamwe ni A-Izalele eswe. Yachiseleka, yachikumba,

³⁵ yachitambula tangwa lioliene. Yachilamba ni katana nikunongesa atu eswe apwilemo tangwa lioliene, chizechene ngwe halinga ku Lakishi.

³⁶ Yoshua yakatuka ku Eglone yaheta ku Heprone hamwe ni A-Izalele eswe. Yachikumba,

³⁷ yachitambula, yachilamba ni katana, ni mwanangana wacho ni yihunda yacho ni atu jamo eswe. Niumwe wasala wakuhi, chizechene ngwe halinga ku Eglone. Yachinongesa ni atu jamo eswe.

³⁸ Mba Yoshua yalikoneka, yaheta ku Ndebire hamwe ni A-Izalele eswe, yachikumba,

³⁹ yachitambula, ni mwanangana wacho ni yihunda yacho yeswe nikwalamba ni katana, nikunongesa atu jamo eswe. Niumwe wasala wakuhi, chizechene ngwe halinga ku Heprone, ni ku Libna ni mwanangana wamo, chocho yalinga ku Ndebire ni mwanangana wamo.

⁴⁰ Chocho Yoshua yakumba chifuchi cheswe, ku milundu, ni ku Negeve, ni ku yana, ni ku mindundena, ni mianangana jako eswe. Niumwe wasala wakuhi, alioze wanongesene eswe akwa mwiku wa mwono, chizechene ngwe Yehova Zambi ya Izalele hamutuma.

⁴¹ Yoshua waakumbile chize ku Kandeshe-Mbania ndo ku Ngeza, ni chifuchi cheswe cha Ngoshone ndo ku Ngibeone.

⁴² Yoshua watambwile wano mianangana eswe ni chifuchi cho hamuwika mumu Yehova Zambi ya Izalele washilile jita Izalele.

⁴³ Mba Yoshua yahiluka, yeza ku chilombo cha Ngilingali, ni A-Izalele eswe hamwe nenyi.