Yoshua 1 - MUKANDA USANDU WA ZAMBI 1975

¹ Kulutwe lia kufwa cha Mose kavumbi ka Yehova, Yehova yamba kuli Yoshua mwana wa Nune, kambaji ka Mose, ngwenyi,

² Kavumbi kami Mose hafwa, kashika katuka uzauke Yordau yono, ni yena ni wano atu eswe, nukanjile mu chifuchi chize ngunahane kuli A-Izalele.

³ Kweswe munusa yiliato yenu hinanwahako, chizechene ngwe nalakenyene kuli Mose.

⁴ Chize ku puya ni Lebano kuno, ndo ku lwiji munene wa Ufrateze, chifuchi cheswe cha A-Hete ku Kalunga-lwiji Munene ku Chitokelo cha tangwa mukupwa chifuchi chenu.

⁵ Niumwe mahasa kulimika ni yena matangwa eswe a mwono we. Chizechene ngwe napwile ni Mose chocho mungupwa ni yena. Chichi kukuhichika hanji kukwehuka.

⁶ Takama, hamuka mumu yena muhetesa vungu lino mu chifuchi cha chihinga chize nalakenyene ni shingo kuli tulamba two kwaaha.

⁷ Takama wika. Pwako ni hamu linji, nikufunga kanawa shimbi jeswe kavumbi kami Mose wakutumine. Kanda upiasuka ku chindume hanji ku chimeso, hanga yuma ye yikawahe kweswako muoya.

⁸ Mukanda uno wa shimbi kanda ukatuka mu kanwa lie, alioze ukaupukune mwalwa ni ufuku, ukalinge kanawa nikulita ni yize yeswe yasonewenamo. Chocho muwahisa jila ye; chocho yuma ye muyiwaha.

⁹ Te chakutumine nyi? Takama; hamuka; kanda wivwa woma hanji mwongo, mumu Yehova Zambi ye hwali hamwe ni yena kweswako muoya.

¹⁰ Mba Yoshua yatuma yilolo ja atu ngwenyi,

¹¹ Palikenu hakachi ka chilombo nukatume e atu ngwenu, Lulikenu kulia chenu mumu ha matangwa atatu munuzauka Yordau yono nukanjile nukazuke chifuchi Yehova Zambi yenu kananwehe kuzuka.

¹² Yoshua yamba kuli A-Rupene, ni A-Ngate, ni chihanda cha ha muchima cha munyachi wa A-Manase ngwenyi,

¹³ Iwulukenu liji lize Mose kavumbi ka Yehova wanwambile ngwenyi, Yehova Zambi yenu kananululikila uhwimino. Kumakanwaha chifuchi chino.

¹⁴ Mapwo jenu, ni ana jenu akepe, ni yimuna jenu, o masala mu chifuchi Mose wanuhele sali lize lia Yordau. Alioze yitakame, akwa hamu eswe hakachi kenu o mazauka ni yitwa yo kulutwe lia akwenu nukaakwase,

¹⁵ ndo Yehova mahana uhwimino kuli akwenu ngwe hanwaha yenu, no nawa hazuka chifuchi Yehova Zambi yenu kanaahe. Mba kulutwe munuhilukila chifuchi cha chihinga chenu nuchizuke, ngwami, chifuchi chize Mose mwe kavumbi ka Yehova wanuhele mu sali lia Yordau ku Chivumbuko.

¹⁶ O yakumbulula kuli Yoshua ngwo, Yuma yeswe watutuma mutulinga; kweswako mututuma mutuya.

¹⁷ Chize twononokene kuli Mose mu yuma yeswe, ni yena chizechene mutukwononokena. Chino wika, Yehova Zambi ye akapwe hamwe ni yena ngwe apwile ni Mose.

¹⁸ Mweswawo makolema shimbi je, hanji kechi kwononoka ku maliji je cheswacho mumutumina mutumushiha. Chino wika, takama, hamuka.