Yona 4 - MUKANDA USANDU WA ZAMBI 1975

¹ Alioze Chapihilile kuhiana Yona, yatenuka.

² Yalemba kuli Yehova ngwenyi, Yehova, ngunalembe kuli yena, te chambile chino chene shimbu te nguchili mu chifuchi chami nyi? Kashika naliangile kuchinyina ku Tashi, mumu nanyingikine ngwami, Uli Zambi ya vumbi, wa tò ni keke, makoke kutenuka, mukwa kulumbamisa utu wa zango, kuwakulikonyeka ha chuma chikalu.

³ Kashika Yehova, ngunalembe, ungushihe, mumu kufwa Shinaho kuli yami hi mwono ko.

⁴ Yehova yamba ngwenyi, Kutenuka Chichize, chipema nyi?

⁵ Mba Yona yakatuka mu limbo, yatwama ku sali lia limbo ku Chivumbuko. Yalitungila chisakila, yatwamamo mu chihuhumuke, akamone chize muchipwa ni limbo.

⁶ Yehova Zambi yalulika lwitwi, yamutatwisa akafuke Yona, akapwe chihuhumuke ku mutwe wenyi mukumupulula ku lamba lienyi. Kashika Yona wawahililile kuhiana mumu ha lwitwi.

⁷ Alioze ha kucha Zambi yalulika katutu, yalia mwe lwitwi, yoma.

⁸ Mba muze tangwa hiliavumbuka, Zambi yalulika fuji ya chivukuminya ya ku Chivumbuko, ni mwalwa yiutwa ha mutwe wa Yona. Yalezumuka, yeta kuli Zambi akafwe mumu yamba ngwenyi, Kuli yami Shinaho kutwa hi mwono ko.

⁹ Zambi yamba kuli Yona ngwenyi, Kutenuka Chichize mumu ha lwitwi, chipema nyi? Iye ngwenyi, Chipema ngunalingi nikutenuka, chipwe ndo ku kufwa.

¹⁰ Yehova yamba ngwenyi, Ena hiwavwila keke lwitwi, chipwe kwamulingile milimo, chipwe kumutatwisa. Ufuku umuwika yasoka; ufuku umuwika yoma.

¹¹ Mba kuchangutambile yami kuvwila keke Ninive, lie limbo linene, muze mwatwama kuhiana kulakaji lia tununu ni makumi aali a tununu a atu kanyingikine kutongola hakachi ka kwoko lio lia chindume ni kwoko lio lia chimeso, ni yimuna anji nawa nyi?