Yona 3 - MUKANDA USANDU WA ZAMBI 1975

¹ Liji lia Yehova yiliza kuli Yona chisuho chamuchiali ngwenyi,

² Katuka uye ku Ninive, lie limbo linene, ukakololoke chize ngunakutumu.

³ Kashika Yona yakatuka, yaya ku Ninive nikulita ni liji lia Yehova. Ninive liapwile limbo linene kuhiana, lia kwenda matangwa atatu.

⁴ Yona yaputuka kunjila mu limbo kwenda cha tangwa limuwika, nikukololoka ngwenyi, Kwasala makumi awana a matangwa mba manunguna Ninive.

⁵ Akwa Ninive afulielele Zambi. Yasela matangwa a kulitwamina kulia. Yazala yikeleyi chize kuli anene hakachi ko ndo kuli akepe.

⁶ Lusango wahetele kuli mwanangana wa Ninive, mba yakatuka ha ngunja yenyi, yachiza hina lienyi lia ngungu, yalijika ni chikeleyi, yatwama mu uto.

⁷ Yatuma liji nikuliambujola mu Ninive nikulita ni shimbi ya mwanangana ni yilolo jenyi ngwenyi, Niumwe kanda alia nichimwe, apwe mutu, apwe chimuna, apwe ngombe, hanji pembe, hanji panga, kanda alia, kanda anwa.

⁸ Alioze akalifuke ni chikeleyi, ni mutu ni chimuna, akatete kuli Zambi ni tachi. Akakatuke mweswe ku jila yenyi yipi ni ku upupilo uze uli mu moko jenyi.

⁹ Iya unanyingika? Hanji Zambi malumuka alikonyeke, atewuluke ku utenu wenyi usasu, ni yetu kutuchi kukuwa.

¹⁰ Zambi yamona yitanga yo, ngwenyi, Kanakatuka ku ndako jo jipi. Mba Zambi yalikonyeka ha che chuma chikalu chize ambile kwalinga. Kachilingile.