Yona 2 - MUKANDA USANDU WA ZAMBI 1975

¹ Mwe mu jimo lia yishi Yona yalemba kuli Yehova Zambi yenyi ngwenyi,

² Mumu ha luyinda wami natambikile kuli Yehova, mba iye wangukumbulwile. Mwe mu jimo lia Shiole natetele, mba wevwile liji liami.

³ Mumu wangunyashine mu jondo, mwe muchima lia kalunga-lwiji; sanga liangujingilikile. Mikanya ye yeswe, yikepe ni yinene, yapalikile hali yami.

⁴ Yingwamba ngwami, Hangumbila kumeso je; hindu mungutala nawa ku tembele ye yisandu.

⁵ Meya angujingilikile ndo ku alma yami. Jondo yanguselekele. Yiputa yanguswikile ku mutwe.

⁶ Napalumukine mushi lia milundu. Hashi ni njalo jaho janguyikilile ku miaka ya mutolo; hindu, yena Yehova Zambi yami, hiwachiza mwono wami mu jondo.

⁷ Muze alma yami yalezumukine muchima liami, newulukile Yehova. Kulemba chami chakuhetele mwe mu tembele ye yisandu.

⁸ Waze akutala ku yuma yamokomoko ya mahuza kakwehuka vumbi lio ene.

⁹ Alioze yami mungukulambula ni liji lia kusakwila; Mungufweta chize hinalakenya ni shingo. Ulamwino unakatuka kuli Yehova.

¹⁰ Mba Yehova wahanjikile ni mwe yishi. Yasajila Yona hashi homu.