Yona 1 - MUKANDA USANDU WA ZAMBI 1975

¹ Liji lia Yehova liejile kuli Yona mwana wa Amitai ngwenyi,

² Katuka uye ku Ninive, lie limbo linene, ukakololoke kuli ayo, mumu ungulungulu wo hiunahete kuli yami.

³ Alioze Yona yakatuka akachine kumeso ja Yehova, akaye ku Tashi. Yaya ku Yopa, yawana wato unayi ku Tashi. Chocho yafweta ndando ya kwendelamo, yanjilamo akaye hamuwika no ku Tashi akachine kumeso ja Yehova.

⁴ Alioze Yehova yatuma fuji yimwe yinene ha kalunga-lwiji; kwapwile kangonga munene ha kalunga-lwiji, kashika wato wambile kumakuka.

⁵ Mba akwa kwendesa wato evwile woma. Yateta mutu mweswe kuli zambi yenyi. Yambila mu kalunga-lwiji yiteli ya mu wato aulelwise. Alioze Yona hapalumuka mwe muchima lia wato, hapomba haya tulo.

⁶ Kashika mwata wa wato yeza kuli iye, yamba kuli iye ngwenyi, Ena mukwa tulo, kuchi unevu? Katuka utambike kuli Zambi ye. Hanji Zambi matunyonga kutuchi kutoka.

⁷ O yamba umwe kuli mukwo ngwo, Tutahenu tunyingike yoze hatukokela chuma chino chipi. Chocho yataha, mba chaholokela hali Yona.

⁸ O yamba kuli iye ngwo, Utwambulwile kama, ha mukunda waya chuma chino chipi chatushachila? Milimo ye yika? Kulihi unakatuka? Chifuchi che chika? Munyachi we uka?

⁹ Iye yaakumbulula ngwenyi, Nguli Ka-Hepreu. Nakuvwila woma Yehova, Zambi ya mwilu, yoze watangile kalunga-lwiji ni hashi homu.

¹⁰ Malunga evwile woma kuhiana. Yamba kuli iye ngwo, Chuma chino walinga, chika? Mumu kananyingika ngwo, Kanachina kumeso ja Yehova, se iye mwene haalwezacho.

¹¹ Yamba kuli iye ngwo, Chika mutulinga ni yena hanga kalunga-lwiji atuholele kama? Mumu te kalunga-lwiji kanaliwezela kuvunduka.

¹² Iye yamba kuli ayo ngwenyi, Nungwande, nungumbile mu kalunga-lwiji. Chocho manuholela. Mumu ngunanyingika ngwami, Ha mukunda wa yami kangonga yono munene hanutula.

¹³ Hindu malunga atapwile ni tachi akahiluke hashi alioze kachihashile mumu kalungalwiji kanaliwezela kuvunduka kulimika no.

¹⁴ Kashika atetele kuli Yehova ngwo, Tunaliumbu kuli yena Yehova, tunaliumbu kanda ututayiza kutoka mumu ha mwono wa yono. Kanda ututwika manyinga a kusamba, mumu yena Yehova hiwalinga chize chinakupemena.

¹⁵ Chocho yanda Yona, yamumbila mu kalunga-lwiji, mba kalungalwiji yalitwamina ufwatulo wenyi.

¹⁶ Mba malunga yavwila woma Yehova kuhiana. Yalambula chitapo kuli Yehova nikulilakenya ni shingo.

¹⁷ Yehova yalulika yishi munene akamine Yona. Yona yatwama mu jimo lia yishi matangwa atatu ni ufuku utatu.