Yoano 9 - MUKANDA USANDU WA ZAMBI 1975

¹ Shimbu apalikile wamwene mutu kapuputa chize ku kusemuka chenyi.

² Tumbaji twenyi amuhulile ngwo, Longeshi, iya wavulumwine, shina yono, nyi? Shina yisemi jenyi, akasemuke kapuputa?

³ Yesu wakumbulwile ngwenyi, Chipwe yono kavulumwine, chipwe yisemi jenyi, ka: alioze hanga akasolole yitanga ya Zambi muli iye.

⁴ Changutamba kulinga yitanga ya yoze wangutumine shimbu kuchili mwalwa: ufuku muwiza muze niumwe mahasa kulinga.

⁵ Shimbu nguli hano hashi, pangu lia hashi yami.

⁶ Muze te hamba yino yuma, wafwilile mate hashi; walingile ndambo ni mate; wakwichile meso ja kapuputa ni ndambo.

⁷ Wambile kuli iye ngwenyi, Yako, usane mu Chitende cha Sailome, (linalumbunuka ngwo, Kanatumiwa). Wayile kashika, yasana, yahiluka nikumona.

⁸ Enyembo kashika ni waze apwile nikumumona kunyima, ngwe wapwile mukwa kuwunjila, ambile ngwo, Yono hi yoze ko Watwamine, wawunjilile, nyi?

⁹ Amwe ambile ngwo, Iye mwene: akwo ambile ngwo, ka, alioze kalifwa nenyi. Iye wambile ngwenyi, Yami mwene.

¹⁰ Ambile kashika kuli iye ngwo, Mba ngwe kuchi alawisanga meso je?

¹¹ Wakumbulwile ngwenyi, Mutu, yoze anambe ngwo, Yesu, walinganga ndambo, wakwitanga meso jami, kambanga kuli yami ngwenyi, Yako ku Chitende cha Sailome, usane; chocho nayanga, nasananga, nalaulaga ku meso.

¹² O ambile kuli iye ngwo, Kulihi ali? Yamba ngwenyi, Chanyingikine.

¹³ Yaneha kuli A-Fwariseu yoze wapwile kunyima kapuputa.

¹⁴ Achi, hapwile ha tangwa lia Sambata muze Yesu alingile ndambo nikulawisa meso jenyi.

¹⁵ Cheka nawa kashika A-Fwariseu amuhulile ngwe chize walawisanga meso jenyi. Iye wambile kuli ayo ngwenyi, Kasanga ndambo ha meso jami, nasananga, mba ngunamono.

¹⁶ Amwe a kuli A-Fwariseu ambile kashika ngwo, Yono mutu hi wa kuli Zambi ko, mumu keshi kufunga tangwa lia Sambata. Alioze akwo ambile ngwo, Ngwe kuchi chivulumunyi mahasa kulinga yilayi ngwe yino? Kwapwile kulihandununa hakachi ko.

¹⁷ Yamba kuli kapuputa cheka nawa ngwo, Kuchi yena unambe hali iye, ngwe walawisanga meso je? Wambile ngwenyi, Iye profeta.

¹⁸ A-Yunda kashika kafulieleleko hali iye, ngwe wapupuchile, walawile ku meso, ndo atambikile yisemi ja yoze walawile ku meso.

¹⁹ O aahulile ngwo, Yono mwanenu, nyi? Hali iye nwakwamba ngwenu, Wasemukine kapuputa, nyi? Ngwe kuchi haliapwila anamono?

²⁰ Yisemi jenyi nakumbulwile, ngwo, Tunanyingika yono, mwanetu, wasemukine kapuputa:

²¹ alioze ngwe haliapwila anamono, kutwanyingikine; chipwe yoze walawisanga meso jenyi, kutwamunyingikine; muhulenu mwene; hakola; mahanjika hali iye mwene.

²² Yino yuma ambile yisemi jenyi, mumu evwile woma wa A-Yunda; mumu A-Yunda halitesa kulu, hanga mweswe mamutayiza kupwa Kristu, amukatwise ku sunangonga.

²³ Kashika yisemi jenyi ambile ngwo, Hakola; muhulenu mwene.

²⁴ Chocho atambikile chisuho chamuchiali mutu yoze wapupuchile kunyima, ambile kuli iye ngwo, Chichimieka Zambi: tunanyingika yono mutu iye chivulumunyi.

²⁵ Wakumbulwile kashika ngwenyi, Kachi iye chivulumunyi, ami Chanyingikine: chuma chimuwika ngunanyingika; napwile kapuputa, haliapwila ngunamono.

²⁶ O ambile kuli iye cheka nawa ngwo, Kuchi alinganga kuli yena? Ngwe kuchi alawisanga meso je?

²⁷ Waakumbulwile ngwenyi, Hinanwambulwila kulu, kunwapanjikileko; kuchi te nunazange kuchivwa cheka nawa? Yenu nawa nunazange kupwa tumbaji twenyi?

²⁸ O amutukile, ambile ngwo, Yena uli kambaji kenyi, alioze yetu tuli tumbaji twa Mose.

²⁹ Tunanyingika Zambi wahanjikile kuli Mose; alioze hali yono mutu, kutwanyingikine kuze anakatuka.

³⁰ Mwe mutu waakumbulwile ngwenyi, Kuma, chino chikomokeso, kunwanyingikine kuze anakatuka, hindu kalawisanga meso jami.

³¹ Alioze tunanyingika Zambi keshi kwivwa yivulumunyi: alioze kachi umwe mapwa mukwa kuwayila Zambi, malinga upale wenyi, yoze mamwivwa.

³² Chize ku miakulwila kachivwile nilimwe tangwa ngwo, Umwe wapwishile meso ja mutu wasemukine kapuputa.

³³ Kachi yono kakatukile kuli Zambi, kachi kahashile kulinga nichimwe.

³⁴ Amukumbulwile ngwo, Yena wasemukine liakulu mu milonga, mba unatulongesa yetu, nyi? O amukatwishile.

³⁵ Yesu wevwile ngwo, Hamukatwisa; iye ha kumuwana, wambile kuli iye ngwenyi, Unafuliela kuli mwe Mwana Zambi, nyi?

³⁶ Wakumbulwile ngwenyi, Mwene, mwe Mwana Zambi iya, hanga ngumufuliele?

³⁷ Yesu wambile kuli iye ngwenyi, Hiunamumono, iye nawa kanahanjika ni yena.

³⁸ Iye wambile ngwenyi, Ngunafuliela, Mwene. Wamuwayilile.

³⁹ Yesu wambile ngwenyi, Ha upatwilo hinguneza hano hashi, hanga waze keshi kumona, akamone; hanga waze akumona, akapwe tupuputa.

⁴⁰ Waze a kuli A-Fwariseu apwileko hamwe nenyi, evwile yino yuma, o ambile kuli iye ngwo, Ni yetu nawa tuli tupuputa, nyi?

⁴¹ Yesu wambile kuli ayo ngwenyi, Kachi nuli tupuputa, kachi kunushi mulonga: alioze haliapwila nunambe ngwenu, Tunamono: kashika mulonga wenu kuunasala.