Yoano 6 - MUKANDA USANDU WA ZAMBI 1975

¹ Kulutwe lia yino yuma Yesu wayile mu sali lia Chitende cha Ngalileya, chenacho Chitende cha Taipiria.

² Mbunga yinene amukawile, mumu amwene yilayi yize alingile hali mieji.

³ Yesu wakandukile ha mulundu, watwamineho hamwe ni tumbaji twenyi.

⁴ Achi, Chizomboka, chiwanyino cha A-Yunda, Chakundamine.

⁵ Yesu kashika ha kuhetula meso jenyi, nikumona mbunga yinene kaneza kuli iye, yamba kuli Fwilipe ngwenyi, Kulihi mutulanjila mbolo, hanga wano akalie.

⁶ Chino wambile hanga amweseke: mumu iye mwene wanyingikine chize malinga.

⁷ Fwilipe wamukumbulwile ngwenyi, Mbolo ja kufwika kulakaji aali a mbongo kujishi kuheta hali ayo, hanga mweswe wa kuli ayo akatambule chimwe chikepe.

⁸ Umwe wa kuli tumbaji twenyi, Andeleu, mwanakwo wa Semone Petulu, yamba kuli iye ngwenyi,

⁹ Kwali kuno umwe kanuke, iye mbolo jitano ja sevwata ni tuyishi twaali ali no; alioze yino yika hali anji apwa haha?

¹⁰ Yesu wambile ngwenyi, Twamisenu atu. Achi, mwapwile mwambu wunji muma muze. Kashika malunga atwamine, ha kwaalula ngwe tununu atano.

¹¹ Yesu kashika wanjile mbolo; ni muze te hasakwila, wayipangilile kuli waze atwamine; ni tuyishi nawa chizechene, chize cheswe azangile.

¹² Muze te hakuta, yamba kuli tumbaji twenyi ngwenyi, Kungululenu yipalupalu yinasala, hanga nichimwe kuchichi katoka.

¹³ Ayikungulwile kashika, azalishile kumi lia yipakili ni yipakili yiali ya yipalupalu ya mbolo jitano ja sevwata yize yasalile kuli waze alile.

¹⁴ Kashika muze atu amwene chilayi chize alingile Yesu, ambile ngwo, Yono chamwenemwene mwe profeta yoze meza hano hashi.

¹⁵ Kashika Yesu, nikunyingika ngwe ambile kwiza akamuchangumune, hanga akamupwise mwanangana, wakatukile cheka nawa, akaye ku mulundu, iye mwene ukawenyi.

¹⁶ Muze hapwile chingoloshi, tumbaji twenyi apalumukine ku Chitende;

¹⁷ o anjilile mu ulungu, kanazauka Chitende akaye ku Kafwanaume. Hapwile milima kulu, ni Yesu te kanda achiza kuli ayo.

¹⁸ Ni Chitende te chinafuzu mumu ha fuji yinene yize yalambileho.

¹⁹ Muze te kashika hapulula ngwe kilometro jiwana hanji kilometro jisambano, yamona Yesu kanende ha chitende nikukundama ku ulungu; o evwile woma.

²⁰ Alioze yamba kuli ayo ngwenyi, Yami mwene; kanda nwivwa woma.

²¹ Azangile kashika kumutambula mu ulungu: haze hene ulungu wahetele kuze atalikishile.

²² Muze hikwacha, mbunga yize amanyine mu sali lia Chitende amwene kukwapwile wato ukwo shina umuwika, ni Yesu kanjililemo hamwe ni tumbaji mu wato, alioze tumbaji twenyi ayile ukawo.

²³ (Alioze mato akwo akatukile ku Taipiria, ahetele hakamwihi no homa haze alilile mbolo, muze te Mwene hasakwila):

²⁴ kashika muze mbunga amwene ngwe Yesu kapwileko, chipwe tumbaji twenyi, anjilile mu maulungu, o ayile ku Kafwanaume, nikufupa Yesu.

²⁵ Muze te hamuwana mu sali lia Chitende, ambile kuli iye ngwo, Longeshi, mwiji muka wahetanga kuno?

²⁶ Yesu waakumbulwile, ngwenyi, Pundu, pundu ngunambe kuli yenu ngwami, Nunangufupu, hi ha yilayi yize nwamwene ko, alioze mumu nunakalia mbolo, nunakakuta.

²⁷ Kanda nukalinga milimo ha kulia chize cha kutoka, alioze nukalinge milimo ha kulia chize chili ni mwono wa mutolo, chenacho mwe Mwana Mutu makanwaha: mumu iye, Zambi mwe Tata hanamujiki ni Chijikilo.

²⁸ Ambile kuli iye kashika ngwo, Kuchi mutulinga hanga tukalinge yitanga ya Zambi.

²⁹ Yesu waakumbulwile, ngwenyi, Chino che chitanga cha Zambi, hanga nukafuliele yoze hanamutumu iye.

³⁰ Ambile kuli iye kashika ngwo, Mba chilayi chika mulinga hanga tumone, tukufuliele? Chika wakulinga?

³¹ Akaka alile maná mu puya; ngwe chinasonewa ngwo, Waahele mbolo mwilu mukulia.

³² Yesu kashika wambile kuli ayo ngwenyi, Pundu, pundu, ngunambe kuli yenu ngivami, Hi Mose ko wanuhele mbolo ya mwilu: alioze Tata kakunwaha mbolo yamwenemwene ya mwilu.

³³ Mumu ye mbolo ya Zambi yoze mahulumuka mwilu, mahana mwono kuli akwa hashi.

³⁴ Ambile kuli iye kashika ngwo, Mwene, twehe kama mbolo yino matangwa eswe.

³⁵ Yesu wambile kuli ayo ngwenyi, Mbolo ya mwono yami; yoze meza kuli yami kechi kevwa zala nichimwe, ni yoze mangufuliela yami kechi kevwa pwila nichimwe ha mwaka niumwe.

³⁶ Alioze nambile kuli yenu ngwami, Hinunangumono, hindu kunushi kufuliela.

³⁷ Waze eswe Tata mangwaha, kumakeza kuli yami; ni yoze meza kuli yami chichi kamumbila haze nichimwe.

³⁸ Mumu hingunahulumuka mwilu, hi mukulinga upale wa yami mwene ko, alioze upale wa yoze wangutumine.

³⁹ Uno we upale wa Tata yoze wangutumine, hanga a kuli waze eswe hanangwehe chichi katokesa niumwe, alioze ngukamuhindwise ha tangwa lia kusula.

⁴⁰ Mumu uno we upale wa Tata, mweswawo mamona mwe Mwana, akamufuliele, akapwe ni mwono wa mutolo; mungukamuhindwisa ha tangwa lia kusula.

⁴¹ Kashika A-Yunda alinyenyetene hali iye, mumu wambile ngwenyi, Mbolo yize yahulumukine mwilu yami.

⁴² O ambile ngwo, Yono hi Yesu mwana José ko, nyi? Tato ni naye kutwaanyingikine, nyi? Mba ngwe kuchi anambe ngwenyi, Hingunahulumuka mwilu.

⁴³ Yesu waakumbulwile ngwenyi, Kanda nulinyenyeta hakachi kenu.

⁴⁴ Niumwe mahasa kwiza kuli yami shina mwe Tata wangutumine mamukoka; mungukamuhindwisa ha tangwa lia kusula.

⁴⁵ Chinasonewa mu mikanda ya aprofeta ngwo, O eswe kumakalongoloka kuli Zambi; kashika mweswe hanevu kuli mwe Tata; lianalilongesa kuli iye, meza kuli yami.

⁴⁶ Kuchapwile ngwe umwe hamona mwe Tata, shina yoze wa kuli Zambi, iye hanamono mwe Tata.

⁴⁷ Pundu, pundu, ngunambe kuli yenu ngwami, Yoze mafuliela, mwono wa mutolo ali nawo.

⁴⁸ Mbolo ya mwono yami.

⁴⁹ Akakenu alile maná mu puya, no afwile.

⁵⁰ Yino ye mbolo yize yinahulumuka mwilu, hanga umwe akayilie, mba kechi kafwa.

⁵¹ Ye mbolo ya mwono yami, yize yahulumukine mwilu: kachi umwe malia mbolo yino kumakapwa ni mwono ndo ku miaka ya mutolo: ewa, ni mbolo yize mungukahana te musunya wami uze mungukahana ha mwono wa akwa hashi.

⁵² Kashika A-Yunda alihangulwile hakachi ko ngwo, Ngwe kuchi yono mahasa kutwaha musunya wenyi mukulia?

⁵³ Yesu wambile kuli ayo ngwenyi, Pundu, pundu, ngunambe kuli yenu ngwami, Kunushi ni mwono muli yenu shina munulia musunya wa mwe Mwana Mutu, shina mununwa manyinga jenyi.

⁵⁴ Yoze malia musunya wami, manwa manyinga jami, mwono wa mutolo ali nawo; kumungukamuhindwisa ha tangwa lia kusula.

⁵⁵ Mumu musunya wami kulia chamwenemwene, ni manyinga jami kunwa chamwenemwene.

⁵⁶ Yoze malia musunya wami, manwa manyinga jami, katwama muli yami, ni yami muli iye.

⁵⁷ Chizechene ngwe Tata mukwa mwono wangutumine, ni yami nguli ni mwono mumu hali Tata; chocho yoze mangulia, iye nawa kumapwa ni mwono mumu hali yami.

⁵⁸ Yino ye mbolo yahulumukine mwilu: kuchapwile ngwe tulamba twenu alile maná, afwile; yoze malia mbolo yino kumakapwa ni mwono ndo ku miaka ya mutolo.

⁵⁹ Yino yuma wambile mu sunangonga nikulongesa mu Kafwanaume.

⁶⁰ Anji kashika a kuli tumbaji twenyi muze evwile chino, ambile ngwo, Liji lino likalu; iya mahasa kulivwa?

⁶¹ Alioze Yesu se kananyingika muli iye mwene ngwe tumbaji twenyi alinyenyetene ha chino, wambile kuli ayo ngwenyi, Chino chinanutalingisa, nyi?

⁶² Mba kuchi muchipwa kachi munumona mwe Mwana Mutu kanazezuka kuze apwile hatangu?

⁶³ Yoze wakupwisa ni mwono, mwe Spiritu; musunya kuushi kufumbuka nichimwe; maliji aze ngunahanjika kuli yenu, Spiritu ni mwono.

⁶⁴ Alioze kwali amwe a kuli yenu keshi kufuliela. Mumu Yesu wanyingikine chize ku uputukilo waze kafulieleleko, ni yoze mamukunjika.

⁶⁵ Iye wambile ngwenyi, Ha chikuma chino nambanga kuli yenu ngwami, Niumwe mahasa kwiza kuli yami shina mamwahacho kuli mwe Tata.

⁶⁶ Mumu ha chino anji a kuli tumbaji twenyi ayile kunyima, kaliendelele nenyi nawa.

⁶⁷ Kashika Yesu wambile kuli kumi ni aali ngwenyi, Ni yenu nawa nunazange kuya, nyi?

⁶⁸ Semone Petulu wamukumbulwile ngwenyi, Mwene, kuli iya mutuya? Yena e maliji a mwono wa mutolo uli no.

⁶⁹ Hitunafuliela, kutunanyingika mwe Musandu wa Zambi yena.

⁷⁰ Yesu waakumbulwile ngwenyi, Chanutongwele, yenu kumi ni aali, nyi? Mba umwe wa kuli yenu iye ndiapu umwe.

⁷¹ Achi, wahanjikile ha kutwala kuli Yundase Ka-Keriote, mwana Semone, mumu iye te mamukunjika, se wapwile umwe wa kuli kumi ni aali.