Yoano 5 - MUKANDA USANDU WA ZAMBI 1975

¹ Kulutwe lia yino yuma kwapwile chiwanyino cha A-Yunda; ni Yesu wakandukile ku Yerusaleme.

² Achi, muchili mu Yerusaleme ku chikolo cha mapanga, Chitende, mu limi lia Hepreu ngwo, Mbeteseta, chili ni yingalala yitano.

³ Muze mwene mwapombele chizavu cha mieji, ni tupuputa, ni yilema, ni akwa kusosewa, te kanatatatata kufuza cha meya:

⁴ mumu mungelo wa Mwene wahulumukine ha mwaka ni mwaka ku Chitende, nikufujisa meya: ni mweswawo waliangile kunjilamo kulutwe lia kufuza cha meya, wapwile mungunu ku musongo weswawo wakwachikile nawo.

⁵ Mba kwapwileko umwe mutu, te hayiza makumi atatu a miaka ni miaka nake.

⁶ Muze Yesu amumwene kanapombo, wanyingikine iye wapwile kulu ni miaka yinji chocho, yamba kuli iye ngwenyi, Unazange kupwa mungunu, nyi?

⁷ Mweji wamukumbulwile ngwenyi, Mwene, mutu chishi nenyi, hanga muze meya mafuza, akangunjise mu Chitende; alioze shimbu mungwiza, mukwo mapalumuka kulutwe liami.

⁸ Yesu yamba kuli iye ngwenyi, Katuka, anda chalo che, wende.

⁹ Haze hene mutu walumukine mungunu, wanjile chalo chenyi, wendele. Achi, tangwa lize liapwile tangwa lia Sambata.

¹⁰ Kashika A-Yunda ambile kuli yoze wahindukile ngwo, Musono lie tangwa lia Sambata; kuchalitele ni shimbi kumbata chalo che.

¹¹ Waakumbulwile ngwenyi, Yoze wangupwisanga mungunu, mwenawo kambanga kuli yami ngwenyi, Anda chalo che, wende.

¹² Amuhulile ngwo, Mutu yoze wambanga kuli yena ngwenyi, Anda chalo che, wende, iya?

¹³ Alioze yoze wahindukile, kamunyingikineko; mumu te Yesu hasewunukamo, se kwapwile mbunga.

¹⁴ Kulutwe Yesu yamuwana mu tembele, yamba kuli iye ngwenyi, Tala, hiwapwa mungunu: kanda ukavulumuna nawa, kuchina chuma chipi chahiana muchikuwana.

¹⁵ Yoze mutu wayile, wambulwilile A-Yunda ngwenyi, Iye Yesu yoze wangupwisanga mungunu.

¹⁶ Ha chikuma chino A-Yunda ahungumionene Yesu, mumu walingile yino yuma ha tangwa lia Sambata.

¹⁷ Alioze Yesu waakumbulwile ngwenyi, Tata kalinga ndo haliapwila, ni yami nakulinga.

¹⁸ Ha chikuma chino kashika A-Yunda afupile kuhiana kumushiha; kuchapwile mumu hatangula Sambata wika, ka, alioze wambile nawa ngwenyi, Zambi iye Tata, nikulitesa ni Zambi.

¹⁹ Yesu kashika waakumbulwile, ngwenyi, Pundu, pundu, ngunambe kuli yenu ngwami, Mwe Mwana keshi kuhasa kulinga nichimwe ukawenyi shina cheswacho mamona mwe Tata kakulinga: mumu yuma yeswayo akulinga iye, yino nawa mwe Mwana kakulinga chizechene.

²⁰ Mumu mwe Tata kakufwila mwe Mwana, kakumulweza yuma yize yeswe iye mwene wakulinga: iye kumakamulweza yitanga yinene yahiana yino, hanga nukakomoke.

²¹ Mumu chizechene ngwe mwe Tata kakuhindwisa afu, kakwapwisa ni mwono, chocho nawa mwe Mwana kakwapwisa ni mwono waze mapala.

²² Mumu chipwe mwe Tata keshi kupatwila niumwe, alioze hanahana upatwilo weswe kuli mwe Mwana;

²³ hanga eswe akalemese mwe Mwana, chizechene ngwe akulemesa mwe Tata. Yoze keshi kulemesa mwe Mwana keshi kulemesa mwe Tata, yoze wamutumine.

²⁴ Pundu, pundu, ngunambe kuli yenu ngwami, Yoze mevwa liji liami, akafuliele yoze wangutumine, mwono wa mutolo ali nawo, kechi kanjila mu upatwilo, alioze hanakatuka ku kufwa, hananjila mu mwono.

²⁵ Pundu, pundu ngunambe kuli yenu ngwami, Ola muyiza, ni haliapwila hiyaheta, muze afu makevwa liji lia mwe Mwana Zambi; ni waze mevwa kumakapwa ni mwono.

²⁶ Mumu chizechene ngwe mwe Tata mwono akwete muli iye mwene, chocho nawa wahanyine kuli mwe Mwana nawa kupwa ni mwono muli iye mwene.

²⁷ Hanamwehe chiyulo cha kulinga upatwilo, mumu iye mwe Mwana Mutu.

²⁸ Kanda nukomoka ha chino: mumu ola muyiza, muze waze eswe ali mu matuka makevwa liji lienyi,

²⁹ makatuhuka; waze hanalingi yipema ku uhindukilo wa mwono; ni waze hanalingi yipi ku uhindukilo wa upatwilo.

³⁰ Chishi kuhasa kulinga nichimwe ukawami: ngwe nakwivwa, chocho nakupatula: ni upatwilo wami wa ululi; mumu chishi kufupa upale wami, alioze upale wa yoze wangutumine.

³¹ Kachi mungushindakenya hali yami mwene, kachi Shindakenyo yami hi yamwenemwene ko.

³² Yoze wakushindakenya hali yami, weka; ngunanyingika Shindakenyo yize akushindakenya hali yami yamwenemwene.

³³ Hinunatumu kuli Yoano, iye hanashindakenya ha umwenemwene.

³⁴ Alioze Shindabakayo yize nakutambula, hi ya kuli atu ko; alioze ngunambe yino yumamabanga nukalilamwine.

³⁵ Iye wapwile ndaya ya kuyila, ya kupanguka; ni yenu nwapalile ha shimbu kulikwiza mu pangu lienyi.

³⁶ Alioze Shindakenyo yize nguli nayo yinahiana yize ya Yoano; mumu yitanga yize anguhele Tata, hanga ngukayimanunune, yitanga yiyene nakulinga, kuyakushindakenya hali yami ngwo, Tata hanangutumu.

³⁷ Ni mwe Tata yoze wangutumine, iye mwene hanashindakenya hali yami. Chipwe kunwevwile liji lienyi niumwe mwaka, chipwe kunwamwene kusoloka chenyi.

³⁸ Maliji jenyi katwamine muli yenu; mumu yoze amutumine iye, kunushi kumufuliela.

³⁹ Hengulenu mu yisoneko, mumu mwe muze nunashinginyeka nuli ni mwono wa mutolo; neyo yize yakushindakenya hali yami;

⁴⁰ alioze kunusolo kwiza kuli yami, hanga nukapwe ni mwono.

⁴¹ Chishi kutambula uhenya kuli atu.

⁴² Alioze nakununyingika ngwe kunushi zango lia Zambi muli yenu.

⁴³ Nguneza mu jina lia mwe Tata, kunushi kungutambula: kachi mukwo meza mu jina lienyi mwene, munukamutambula.

⁴⁴ Ngwe kuchi munuhasa kufuliela, yenu, nwakulichichimieka umwe kuli mukwo ni mukwo, kunushi kufupa uhenya uze wa kuli mwe Zambi umuwika.

⁴⁵ Kanda nukashinginyeka ngwe yami mungukanusuma kuli Tata; kwali yoze wakunusuma ngwami, Mose, yoze kuli iye nwakutalatala.

⁴⁶ Mumu kachi nwafulielele Mose, kachi nwangufuliela yami; mumu wasonekene hali yami.

⁴⁷ Alioze kachi kunushi kufuliela yisoneko yenyi, ngwe kuchi munufuliela maliji jami?