Yoano 4 - MUKANDA USANDU WA ZAMBI 1975

¹ Kashika muze Mwene anyingikine ngwe A-Fwariseu hanevu ngwo, Yesu kanapu nikutayisa nikupapachisa tumbaji anji kuhiana Yoano.

² (Chipwe chocho, Yesu mwene kapapachishile alioze tumbaji twenyi wika),

³ wahichikile Yundeya, wayile cheka nawa ku Ngalileya.

⁴ Chamutamba kupalika mu Samaria.

⁵ Kashika yaheta ku limbo lia mu Samaria, jina lialio Saika, kwakusulangana ni munda uze ahanyine Yakomba kuli mwanenyi José.

⁶ Ni fuji lia meya lia Yakomba liapwileko. Yesu kashika se kanevu yikatalo ha wenyi uze ayile, watwamine chizechene ku fuji lia meya. Hapwde ngwe ola yamuchisambano.

⁷ Pwo wa ku Samaria yeza mukutaha meya: Yesu yamba kuli iye ngwenyi, Ngwehe kama meya ngunwe.

⁸ (Mumu tumbaji twenyi te haya ku limbo akalande kulia).

⁹ Pwo Ka-Samaria kashika yamba kuli iye ngwenyi, Ngwe kuchi yena, uli Ka-Yunda, unechi meya kuli yami, nguli pwo Ka-Samaria? (Mumu A-Yunda keshi kuliendela nichimwe ni A-Samaria).

¹⁰ Yesu wamukumbulwile, ngwenyi, Kachi yena wanyingika chawana cha Zambi ni yoze unambe kuli yena ngwenyi, Ngwehe kama meya ngunwe; kachi wamwita ni kachi wakwaha meya a mwono.

¹¹ Pwo yamba kuli iye ngwenyi, Mwene, yena kushi nichimwe cha kuswita nacho, ni shima lisuku, mba kulihi unatambula meya a mwono?

¹² Yena uli munene wahiana kulwetu Yakomba, yoze watuhele lie shima, wanwinemo iye mwene, ni ana jenyi, ni yimuna jenyi, nyi?

¹³ Yesu wamukumbulwile, ngwenyi, Mweswawo manwa meya ano mevwa pwila cheka nawa:

¹⁴ alioze mweswawo manwa meya aze mungumwaha yami, kechi kevwa pwila nichimwe ku miaka ya mutolo; alioze meya aze mungumwaha kumakapwa muli iye fuji lia meya lia kuvwelwoka ku mwono wa mutolo.

¹⁵ Pwo yamba kuli iye ngwenyi, Mwene, pe kama meya ano, hanga chichi kevwa pwila, ni chipwe chichi keza kuno mukutaha.

¹⁶ Yesu yamba kuli iye ngwenyi, Yako, utambike lunga lie, wize kuno.

¹⁷ Pwo wamukumbulwile ngwenyi, Lunga chishi nenyi. Yesu yamba kuli iye ngwenyi, Yena kanawa hiwamba ngwe, Lunga chishi nenyi:

¹⁸ mumu wapwile ni malunga atano; ni yoze uli nenyi haliapwila hi lunga lie ko: chino chamwenemwene hiwamba.

¹⁹ Pwo yamba kuli iye ngwenyi, Mwene, ngunamono yena uli profeta.

²⁰ Tulamba twetu awayilile mu mulundu uno; ni yenu nwakwamba ngwenu, Muma mwakuwayilamo mu Yerusaleme.

²¹ Yesu yamba kuli iye ngwenyi, Pwo, ngufuliele, ola muyiza, muze chipwe hi mu mulundu uno ko, chipwe hi mu Yerusaleme ko, munukawayila mwe Tata.

²² Yenu nwakuwayila chize kunwanyingikine: yetu twakuwayila chize tunanyingika; mumu ulamwino wa kuli A-Yunda.

²³ Alioze ola muyiza, ni haliapwila hiyaheta, muze akwa kuwayila amwenemwene makawayila Tata mu uspiritu ni mu umwenemwene: mumu mwe Tata kakufupa atu ngwe wano apwe akwa kumuwayila.

²⁴ Zambi iye Spiritu: ni waze akumuwayila chaatamba kumuwayila mu uspiritu ni mu umwenemwene.

²⁵ Pwo yamba kuli iye ngwenyi, Ngunanyingika Mesaya meza, yoze anambe ngwo, Kristu: muze meza makatwambulwila yuma yeswe.

²⁶ Yesu yamba kuli iye ngwenyi, Yami Mwene, yami ngunahanjika ni yena.

²⁷ Hohene tumbaji twenyi ejile; o akomokene kumona anahanjika ni pwo; hindu niumwe wambile ngwenyi, Kuchi unafupu? Hanji ngwenyi, Kuchi te unahanjika nenyi?

²⁸ Pwo kashika wahichikile sapa yenyi, wayile ku limbo, yamba kuli atu ngwenyi,

²⁹ Tweyenu, nukamone mutu, yoze wangwambulwilanga yuma yize yeswe nayilingile: kuma, yono mwe Kristu, nyi?

³⁰ Hohene atuhukile mu limbo, ayile kuli iye.

³¹ Ha shimbu lize tumbaji amulembelele ngwo, Longeshi, lienu.

³² Alioze wambile kuli ayo ngwenyi, Yami, kulia nguli nacho chize kunwanyingikine.

³³ Tumbaji twenyi kashika aliambile umwe kuli mukwo ni mukwo ngwo, Umwe wamunehenanga chimwe cha kulia, nyi?

³⁴ Yesu yamba kuli ayo ngwenyi, Kulia chami ngukalinge upale wa yoze wangutumine, hanga ngukamanunune milimo yenyi.

³⁵ Kunushi kwamba ngwenu, Kunasala tukweji awana ni mwaka wa kucha muwiza, nyi? Talenu, ngunambe kuli yenu ngwami, Hetulenu meso jenu, nwaze yifuchi, yinachili kulu ha kucha.

³⁶ Yoze macha matambula fweto, iye mahela mihuko ya kutwala ku mwono wa mutolo; hanga ni yoze makuwa ni yoze macha akawahilile hamuwika.

³⁷ Mumu mu chino chuma liji linapu liamwenemwene ngwo, Umwe makuwa, ni mukwo macha.

³⁸ Nanutumine mukucha haze kunwakilikichile: akwo hanakilikita, ni yenu hinunanjila mu kukilikita cho.

³⁹ Anji a kuli A-Samaria a ku limbo lize amufulielele mumu ha liji lia pwo, yoze washindakenyene ngwenyi, Iye kangwambulwilanga yuma yize yeswe nayilingile.

⁴⁰ Kashika muze A-Samaria ahetele kuli iye, aliumbile kuli iye, atwame hamwe no; iye watwamineko matangwa aali.

⁴¹ Anji akwo afulielele mumu ha liji lienyi mwene;

⁴² o ambile kuli pwo ngwo, Haliapwila tunafuliela, hi ha liji lie ko: mumu hitunamwivu yetwene, tunanyingika yono chamwenemwene mwe Kristu, mwe Chilamwina cha akwa hashi.

⁴³ Kulutwe lia matangwa aali, wakatukile kuze, wayile ku Ngalileya.

⁴⁴ Mumu Yesu mwene washindakenyene, ngwenyi, Profeta keshi ulemu mu chijima chenyi mwene.

⁴⁵ Kashika muze ahetele ku Ngalileya A-Ngalileya amutambwile, se hanamono yuma yize yeswe alingile iye mu Yerusaleme ku chiwanyino: mumu ayo nawa ayile ku chiwanyino.

⁴⁶ Kashika Yesu wahetele cheka nawa ku Kena, chihunda cha mu Ngalileya, kuze walumwine meya vinyu. Kwapwile umwe chilolo mu Kafwanaume, mwanenyi wa lunga Wayijile.

⁴⁷ Muze evwile ngwo, Yesu hakatuka ku Yundeya, haheta ku Ngalileya, wayile kuli iye, waliumbile kuli iye, apalumuke, akahindwise mwanenyi; mumu te hakamwihi ni kufwa ali.

⁴⁸ Yesu kashika wambile kuli iye ngwenyi, Kunuchi kufuliela nichimwe shina munumona yilayi ni yipekesa.

⁴⁹ Chilolo yamba kuli iye ngwenyi, Mwene, Palumuka kama shimbu mwanami kanda afwa.

⁵⁰ Yesu yamba kuli iye ngwenyi, Yako kwe; mwané ni mwono ali. Yoze mutu wafulielele liji lize amwambile Yesu, iye wayile kwenyi.

⁵¹ Shimbu machipalumuka ndungo atakanyine nenyi, nikwamba ngwo, Mwané ni mwono ali.

⁵² Kashika waahulile ola yize waputukile kuhinduka, o ambile kuli iye ngwo, Zau ha ola yamuchishimbiali kachiki kanakamukatuka.

⁵³ Tato kashika wanyingikine hapwile ha ola yize yene amwambile Yesu ngwenyi, Mwané ni mwono ali; iye wafulielele, iye mwene ni akwa zuwo lienyi eswe.

⁵⁴ Chino che chilayi chamuchiali Yesu walingile muze te hakatuka ku Yundeya, haheta ku Ngalileya.