Yoano 21 - MUKANDA USANDU WA ZAMBI 1975

¹ Kulutwe lia yino yuma, Yesu walisolwele cheka nawa kuli tumbaji twenyi ku Chitende cha Taipiria; iye walisolwele ngwe chino.

² Kwapwile hamuwika Semone Petulu, ni Tomase, yoze ngwo, Ndilimu, ni Natanele wa ku Kena, chihunda cha mu Ngalileya, ni ana a Zembendeu, ni akwo aali a kuli tumbaji twenyi.

³ Semone Petulu yamba kuli ayo ngwenyi, Munguya mukuteta yishi. O yamba kuli iye ngwo, Ni yetu nawa, mutuya hamuwika. Yatuhuka, yanjila mu ulungu; alioze ufuku uze kozele nikamwe.

⁴ Muze kwachile chimene, Yesu wamanyine ha ngenge; hindu tumbaji kanyingikine ngwo, Iye Yesu.

⁵ Yesu kashika yamba kuli ayo ngwenyi, Ana, nuli ni chimwe cha kwelela nacho, nyi? Amukumbulwile ngwo, Ka.

⁶ Iye wambile kuli ayo ngwenyi, Telenu wanda ha sali lia chindume lia ulungu mba kumunuwana. Atelele kashika, mba kahashile kuukoka nawa, mumu ha chizavu cha yishi.

⁷ Kambaji yoze kashika amuzangile Yesu yamba kuli Petulu ngwenyi, Yono mwe Mwene. Muze Semone Petulu evwile ngwenyi, Mwe Mwene, wazalile chikuto chenyi, (mumu te kazalile) walimbilile mu Chitende.

⁸ Alioze tumbaji akwo ejile mu wato (mumu kapwile kusuku ni ngenge, alioze ngwe kulakaji lia metro), nikukoka wanda wa tò ni yishi.

⁹ Muze kashika atuhukile hashi, yamonako kahia ka makala, ni tuyishi atuseleho, ni mbolo.

¹⁰ Yesu yamba kuli ayo ngwenyi, Nehenu tuyishi tuze hinwoza haliapwila.

¹¹ Semone Petulu wakandukile, nikukoka wanda hashi wa tò ni yishi anene, kulakaji ni makumi atano ni atatu; chipwe apwile anji hindu wanda kuwatanukine.

¹² Kashika Yesu yamba kuli ayo ngwenyi, Tweyenu, nulie. Alioze niumwe wa kuli tumbaji twenyi wahanunukine kumuhula ngwenyi, Yena iya? Se ananyingika iye mwe Mwene.

¹³ Kashika Yesu yakundama, yanda mbolo, yahana kuli ayo, ni tuyishi chizechene.

¹⁴ Chino che chisuho chamuchitatu Yesu walisolwele kuli tumbaji twenyi, muze te hahinduka hakachi ka afu.

¹⁵ Kashika muze te halia, Yesu yamba kuli Semone Petulu ngwenyi, Semone, mwana Yona, unanguzange kuhiana wano, nyi? Iye yamba ngwenyi, Ewa Mwene; yena unanyingika ngunakufwila. Yamba kuli iye ngwenyi, Lisa ana-mapanga jami.

¹⁶ Yamba kuli iye cheka nawa chisuho chamuchiali ngwenyi, Semone, mwana Yona, unanguzange, nyi? Yamba kuli iye ngwenyi, Ewa Mwene; yena unanyingika ngunakufwita. Yamba kuli iye ngwenyi, Funga mapanga jami.

¹⁷ Yamba kuli iye chisuho chamuchitatu ngwenyi, Semone, mwana Yona, unangufwila, nyi? Petulu wevwile chinyengo mumu wambile kuli iye chisuho chamuchitatu ngwenyi, Unangufwila, nyi? Yamba kuli iye ngwenyi, Mwene, yena unanyingika yuma yeswe; yena unanyingika ngunakufwila. Yesu yamba kuli iye ngwenyi, Lisa mapanga jami.

¹⁸ Pundu, pundu, ngunambe kuli yena ngwami, Muze wapwile mukweze walijichikile muya we, wendele kweswe wapalile; alioze muze mukakukwoka, mukolola moko je ni mukwo makakujichika muya, makakutwala kuze kwapalileko.

¹⁹ (Achi wambile chino, akalweze kufwa chize machichimieka nacho Zambi,) muze te hamba chino, yamba kuli iye ngwenyi, Ngukaule.

²⁰ Petulu, nikutewuluka, yamona kambaji yoze amuzangile Yesu kanakaula; yoze nawa wazeukilile mu kondo yenyi ha kulia, wambile ngwenyi, Iya yoze makukunjika?

²¹ Petulu kashika, nikumumona, yamba kuli Yesu ngwenyi, Mwene, ni yono kuchi malinga?

²² Yesu yamba kuli iye ngwenyi, Kachi ngunapale akatwame ni mwono ndo mungwiza, kuchi chapwa kuli yena? Ngukaule.

²³ Liji lino kashika liafumanyine hakachi ka mandumbu ngwo, Kambaji yoze kechi kafwa: hindu Yesu kambile kuli iye ngwenyi, Kechi kafwa; alioze ngwenyi, Kachi ngunapale akatwame ni mwono ndo mungwiza, kuchi chapwa kuli yena?

²⁴ Yono kambaji yoze wakushindakenya ha yino yuma, iye wasonekene yino yuma; tunanyingika Shindakenyo yenyi yamwenemwene.

²⁵ Kuyili nawa yuma yinji yikwo yize alingile Yesu, yenayo kachi mayisoneka chimwe ni chimwe, ngunashinginyeka chipwe he hashi heswe kuhechi kalita ni mikanda yize muyisonewa.