Yoano 2 - MUKANDA USANDU WA ZAMBI 1975

¹ Ha tangwa liamuchitatu, mwapwile umbachiso mu Kena, chihunda cha mu Ngalileya; ni naye ya Yesu wapwileko:

² alakenyene Yesu nawa ni tumbaji twenyi ku umbachiso.

³ Muze ahonene vinyu, naye ya Yesu yamba kuli iye ngwenyi, Vinyu keshi nayo.

⁴ Yesu yamba kuli iye ngwenyi, Pwo, kuchi ni yami ni yena? Ola yami kanda yiza.

⁵ Naye yamba kuli tuvumbi ngwenyi, Cheswacho mamba kuli yenu, chilingenu.

⁶ Achi, kwapwile sapa ja mawe jisambano ajiseleko nikulita ni ndako ja A-Yunda ja kulipemesa, jeswe, yimwe ni yimwe, jalita ni njongo jiali hanji jitatu.

⁷ Yesu yamba kuli ayo ngwenyi, Zalisenu sapa ni meya. O ajizalishile ndo ku mukomo.

⁸ Iye yamba kuli ayo ngwenyi, Switenu haliapwila, nutwale kuli mukwa kuyula ulungi, o ajitwalile.

⁹ Alioze muze te mukwa kuyula ulungi apanjikile meya aze aalumwine vinyu, kanyingikine kuze yakatuka (alioze tuvumbi waze aswichile meya anyingikine), mukwa kuyula ulungi yatambika sandungi.

¹⁰ Yamba kuli iye ngwenyi, Atu eswe masa hatangu vinyu yipema ni muze atu hanwa chikolo, hohene masa yize hi yipema ko: yena hiwatunga vinyu yipema ndo haliapwila.

¹¹ Chino chitangu cha ku yilayi yenyi Yesu wachilingile mu Kena, chihunda cha mv Ngalileya, nikusolola uhenya wenyi; ni tumbaji twenyi amufulielele.

¹² Kulutwe lia chino, wapalumukine ku Kafwanaume, iye ni naye, ni ana-akwo, ni tumbaji twenyi; atwamineko hi matangwa anji ko.

¹³ Chizomboka cha A-Yunda muchikundama, mba Yesu wakandukile ku Yerusaleme.

¹⁴ Iye wawanyine mu tembele waze alanjishile ngombe ni mapanga ni tutele, ni akwa kusumbakenya mbongo kanatwamamo:

¹⁵ iye wahosele shikote ya mihipu, watuhwishile eswe mu tembele, ni mapanga ni ngombe; wamwangine mbongo ja akwa kusumbakenya, nikulimbula mesa jo;

¹⁶ wambile kuli waze alanjishile tutele ngwenyi, Twalenu yino yuma haze; kanda nukapwisa zuwo lia Tata zuwo lia chitanda.

¹⁷ Tumbaji twenyi ewulukile ngwe chinasonewa ngwo, Kulinga ni mbunge yeswe ha zuwo lie hichinanguli.

¹⁸ A-Yunda kashika amukumbulwile ngwo, Chilayi chika mulweza kuli yetu se wakulinga yino yuma?

¹⁹ Yesu waakumbulwile ngwenyi, Onwonenu tembele yino, mba ha matangwa atatu mungukayihindwisa.

²⁰ A-Yunda kashika ambile ngwo, Makumi awana a miaka ni miaka yisambano apwile nikutunga tembele yino, ni yena mukayihindwisa ha matangwa atatu, nyi?

²¹ Alioze iye wahanjikile ha kutwala ku tembele ya mujimba wenyi.

²² Muze te kashika hamuhindwisa hakachi ka afu, tumbaji twenyi ewulukile ngwe wambile chino; o afulielele che chisoneko, ni liji lize ambile Yesu.

²³ Muze apwile mu Yerusaleme ku Chizomboka, ku chiwanyino, anji afulielele jina lienyi, ha kumona yilayi yenyi yize apwile nikulinga.

²⁴ Alioze Yesu mwene kakolelele kuli ayo, mumu wanyingikine atu eswe,

²⁵ kafupile umwe ashindakenye hali atu; mumu iye mwene wanyingikine chize chili muli atu.