Yoano 19 - MUKANDA USANDU WA ZAMBI 1975

¹ Hohene kashika Pilatu watwalile Yesu, wamulambile ni shikote.

² Ni maswalale ayinjile chipangula cha mbimbo, achisele ha mutwe wenyi, amujikile hina lia ufungo.

³ O akundamine kuli iye, ambile ngwo, Vulie, Mwanangana wa A-Yunda! O amulambile mbangala ni moko jo.

⁴ Pilatu watuhukile cheka nawa, ngwenyi, Talenu, ngunamuneha haze kuli yenu, hanga nunyingike chawanyine chitela nichimwe muli iye.

⁵ Yesu kashika watuhukile haze, kanazala chipangula cha mbimbo ni hina lia ufungo. Pilatu yamba kuli ayo ngwenyi, Talenu, mwe mutu!

⁶ Muze kashika asasendote akwa lutwe ni tupita amumwene, akololokele ngwo, Muhachilenu ha kulusu! Muhachilenu ha kulusu! Pilatu yamba kuli ayo ngwenyi, Mutwalenu yenu, numuhachile ha kulusu: mumu yami chawanyine chitela nichimwe muli iye.

⁷ A-Yunda amukumbulwile ngwo, Shimbi tuli nayo, nikulita ni shimbi yetu chamutamba kufwa, mumu hanalipwisa mwe Mwana Zambi.

⁸ Muze Pilatu kashika evwile liji lino, wevwile woma Wahiana;

⁹ iye wanjilile mu palasiu cheka nawa, yamba kuli Yesu ngwenyi, Kulihi unakatuka? Alioze kamuhele kumbululo nilimwe.

¹⁰ Pilatu kashika yamba kuli iye ngwenyi, Kwahanjikile kuli yami, nyi? Kwanyingikine chiyulo nguli nacho cha kukutusula, ni chiyulo nguli nacho cha kukuhachila ha kulusu?

¹¹ Yesu wakumbulwile ngwenyi, Kushi chiyulo nichimwe hali yami kachi kakuhelecho kwilu; kashika yoze wangukunjikanga kuli yena, mulonga Wahiana ali nawo.

¹² Ha kwivwa chocho Pilatu wafupile kumutusula, alioze A-Yunda akololokele ngwo, Kachi mutusula yono, kachi hi uli kasendo ka Sesare ko. Mweswawo malipwisa mwanangana, mahanjika cha kulimika ni Sesare.

¹³ Pilatu kashika muze evwile maliji ano, watwalile Yesu haze, Watwamine ha chitwamo cha upatwilo, haze anavuluka ngwo, Hakwalamawe, alioze mu limi lia Hepreu ngwo, Ngapata.

¹⁴ Achi chapwile kululika cha Chizomboka, hapwile ola yamuchisambano. Iye yamba kuli A-Yunda ngwenyi, Talenu Mwanangana wenu!

¹⁵ O kashika akololokele ngwo, Muchizenu! Muchizenu! Muhachilenu ha kulusu! Pilatu yamba kuli ayo ngwenyi, Nguhachile ha kulusu Mwanangana wenu, nyi? Asasendote akwa lutwe akumbulwile ngwo, Yetu kutushi mwanangana niumwe shina Sesare.

¹⁶ Hohene kashika wamukunjikile kuli ayo, hanga amuhachile ha kulusu, o atambwile Yesu akamutwale.

¹⁷ Iye watuhukile nikumbata kulusu yenyi, akaye kuze anavuluka ngwo, Kavwale, kuze anavulukako mu limi lia Hepreu ngwo, Ngolongota:

¹⁸ kuze kwene amuliachilile ha kulusu; ni akwo aali hamwe nenyi, umwe ku sali lino, ni mukwo ku sali lize, ni Yesu mukachi ko.

¹⁹ Pilatu wasonekene jina nawa, nikulisa ha kulusu. Kwasonewene ngwo, Yesu Ka-Nazare, Mwe Mwanangana wa A-Yunda.

²⁰ Jina lino kashika anji a kuli A-Yunda atangile; mumu kuma kuze ahachilile Yesu ha kulusu kwapwile hakamwihi ni limbo; nelio liasonewene mu limi lia Hepreu, ni lia Ngresia, ni lia Roma.

²¹ Asasendote akwa lutwe ni A-Yunda kashika ambile kuli Pilatu ngwo, Kanda usoneka ngwe, Mwe Mwanangana wa A-Yunda, alioze ngwe iye wambile ngwenyi, Mwe Mwanangana wa A-Yunda yami.

²² Pilatu wakumbulwile ngwenyi, Chize hinasoneka hinasoneka.

²³ Maswalale kashika muze te hahachila Yesu ha kulusu, anjile mazalo jenyi, o alingile yihanda yiwana, kuli swalale mweswe chihanda chimwe; ni chikuto nawa; achi, chikuto kuchapwile ni mutongwa, chatungiwile chize kwilu ndusu cheswe.

²⁴ Aliambile kashika umwe kuli mukwo ni mukwo ngwo, Kanda tuchipula, alioze tuchitenu chela, yoze muchipwa nichenyi: hanga chisoneko chikamanunuke, chize chinambe ngwo, Alianyinyine mazalo jami hakachi ko, ni ha uzalo wami atele chela. Maswalale kashika alingile yino yuma.

²⁵ Alioze kwamanyine ku kulusu ya Yesu, naye, ni ndumbwa-naye, Maria, pwo lia Keleopa, ni Maria Ka-Mandala.

²⁶ Muze kashika Yesu amwene naye, ni kambaji yoze amuzangile kanamanako, yamba kuli naye ngwenyi, Pwo, tala mwané!

²⁷ Hohene yamba kuli kambaji ngwenyi, Tala noko! Chize ku ola yize kambaji yoze wamutwalile ku mahienyi mwene.

²⁸ Kulutwe lia chino, Yesu, se kananyingika yuma yeswe hiyamanunuka, hanga chisoneko chikamanunuke, yamba ngwenyi, Pwila ngunevu.

²⁹ Kwapwile kashika kuze sapa ya tò ni vinagre: kashika azalishile shiponja ni vinagre nikuyisa ha mushachi, ayisele ku kanwa lienyi.

³⁰ Muze te kashika Yesu hatambula vinagre, wambile ngwenyi, Chinamanunuka: iye washachilile mutwe wenyi, wakunjikile Spiritu yenyi.

³¹ Kashika A-Yunda, hanga mijimba kuyichi kasala ha makulusu ha tangwa lia Sambata, mumu chapwile Kululika, (mumu tangwa lia Sambata lize liapwile tangwa linene,) alembele kuli Pilatu, hanga akamakune molu jo, akaachizeho.

³² Maswalale kashika akundamine, amakwine molu ja mutangu ni ja mukwo, waze aahachilile ha makulusu hamwe nenyi:

³³ alioze muze ahetele kuli Yesu, amwene te hafwa kulu, kamakwine molu jenyi:

³⁴ alioze umwe wa kuli maswalale watuwile lumbu lienyi ni kunga, ni haze hene mwatuhukile manyinga ni meya.

³⁵ Yoze hanachimono hanashindakenya, ni Shindakenyo yenyi yamwenemwene: neye kananyingika kanambe chamwenemwene, hanga ni yenu nawa nukafulile.

³⁶ Mumu alingile yino yuma, hanga chisoneko chikamanunuke ngwo, Chifwaha chenyi nichimwe kuchichi kamakuka.

³⁷ Cheka nawa chisoneko chikwo chinambe ngwo, Kumakahulikila yoze amutuwile.

³⁸ Kulutwe lia yino yuma José wa ku Arimatea, se wapwile kambaji ka Yesu, alioze ku tenga mumu ha woma wa A-Yunda, walembele kuli Pilatu, hanga akachize mujimba wa Yesu: ni Pilatu wamutayijile. Kashika ayile, wachijile mujimba wenyi.

³⁹ Nikondemu nawa, yoze hatangu wejile kuli Yesu ha ufuku, wejile nikuneha yitumbo ya mira, ni aloa, ngwe makumi awana a kilo ni kilo jitano.

⁴⁰ Kashika azundwile mujimba wa Yesu, aukashile ni miya ya mahina a linyu ni mbuto ya vumba lipema, ngwe ndako ya A-Yunda mukululikila ha kufunda.

⁴¹ Achi mwapwile muma muze amuliachilile ha kulusu umwe munda; ni mu munda fuka liaha, muze niumwe kanda amusa nilimwe tangwa.

⁴² Mwenamo kashika, mumu ha kululika cha A-Yunda (mumu fuka liapwile hakamwihi), asele Yesu.