Yoano 18 - MUKANDA USANDU WA ZAMBI 1975

¹ Muze te Yesu hahanjika maliji ano, watuhukile mukuya hamwe ni tumbaji twenyi mu sali lia lwiji wa Kendrone, muze mwapwile munda, mwenamo wanjilile hamwe ni tumbaji twenyi.

² Ni Yundase nawa, yoze wamukunjikile wanyingikine muma muze: mumu Yesu wakungulukileko kanji hamwe ni tumbaji twenyi.

³ Yundase kashika te hatambula mbunga ya atu ni tupita kuli asasendote akwa lutwe ni A-Fwariseu, yaheta kuze ni masoka ni temo ni yitwa.

⁴ Yesu kashika, nikunyingika yuma yize yeswe muyiza hali iye, watuhukile, wambile ngwenyi, Iya nunafupu?

⁵ Amukumbulwile ngwo, Yesu Ka-Nazare. Yesu yamba kuli ayo ngwenyi, Yami nguli. Ni Yundase, yoze wamukunjikile, wamanyine hamwe no.

⁶ Muze kashika ambile kuli ayo ngwenyi, Yami nguli, ayile ufuchanyima, afulamanyine hashi.

⁷ Cheka nawa waahulile ngwenyi, Iya nunafupu? O ambile ngwo, Yesu Ka-Nazare.

⁸ Yesu wakumbulwile ngwenyi, Hinanwambulwila ngwami, Yami nguli; kachi kashika nunangufupu, echenu wano aye kwo;

⁹ hanga liji likamanunuke lize ahanjikile ngwenyi, Wa kuli waze hiunangwehe chatokesele niumwe.

¹⁰ Semone Petulu kashika se katana wapwile nenyi, wamutomwene, walambile ndungo ya sasendote mukwa lutwe, watetele twitwi lienyi lia chindume, ni jina lia ndungo, Malaku.

¹¹ Yesu kashika wambile kuli Petulu ngwenyi, Tomeka katana ke mu chindalo: musenge uze anguhele Tata chichi kuunwa, nyi?

¹² Ye mbunga kashika hamwe ni kapitau, ni tupita twa A-Yunda akwachile Yesu, amukashile.

¹³ O amutwalile kuli Anase hatangu, mumu iye wapwile uko kuli Kayafwa, yoze wapwile sasendote mukwa lutwe ha mwaka uze wene.

¹⁴ Achi yono Kayafwa wapwile yoze walongesele A-Yunda ngwenyi, Chinatambe mutu umuwika akafwile e atu.

¹⁵ Semone Petulu wakawile Yesu, ni kambaji mukwo nawa. Achi sasendote mukwa lutwe wanyingikine kambaji yoze, iye wanjilile hamwe ni Yesu mu yize ya sasendote mukwa lutwe.

¹⁶ Alioze Petulu wamanyine haze ku chikolo. Kashika kambaji mukwo yoze amunyingikine kuli sasendote mukwa lutwe, watuhukile, wahanjikile kuli mukwa kufunga chikolo, Wanjishile Petulu.

¹⁷ Mwana-pwo, mukwa kufunga chikolo, yamba kashika kuli Petulu ngwenyi, Yena nawa uli wa kuli tumbaji twa yono mutu, nyi? Yamba ngwenyi, Hi yami ko.

¹⁸ Achi ndungo ni tupita amanyineko, te hawika kahia ka makala; (mumu kwapwile chishika); otele kahia; ni Petulu wamanyine hamwe no nikwota kahia.

¹⁹ Sasendote mukwa lutwe kashika wahulile Yesu ha kutwala kuli tumbaji twenyi, ni ha kutwala ku longeso lienyi.

²⁰ Yesu wamukumbulwile ngwenyi, Nahanjikile mwazu kuli akwa hashi; nalongesele matangwa eswe mu masunangonga ni mu tembele, muze akukungama A-Yunda eswe; ni ku tenga chahanjikile nichimwe.

²¹ Kuchi te unanguhula? Hula waze hanangwivu, chize nahanjikile kuli ayo; wano kananyingika yuma yize nambile.

²² Muze te hamba chino, umwe wa kuli tupita kanamanako walambile Yesu mbangala ngwenyi, Chocho unakumbulula kuli sasendote mukwa lutwe, nyi?

²³ Yesu wamukumbulwile ngwenyi, Kachi hinahanjika yipi, mba shindakenya ha yipi: alioze kachi nahanjika kanawa, kuchi te unangulambe?

²⁴ Anase kashika wamutumine wa kukasa kuli Kayafwa sasendote mukwa lutwe.

²⁵ Achi Semone Petulu kanamana nikwota kahia. Ambile kashika kuli iye ngwo, Yena nawa uli umwe wa kuli tumbaji twenyi, nyi? Iye walikalile, wambile ngwenyi, Hi yami ko.

²⁶ Umwe wa kuli ndungo ja sasendote mukwa lutwe, se wapwile usoko wa yoze twitwi lienyi ateteleko Petulu, yamba ngwenyi, Kuma, yami chakumwene mu munda hamwe nenyi, nyi?

²⁷ Petulu kashika walikalile cheka nawa: haze hene ndemba watambikile.

²⁸ Yachiza Yesu kashika kuli Kayafwa, akaye ku palasiu ya nguvulu; kwapwile chimenemene; ene kanjilile mu palasiu, hanga kechi kulichisa: alioze hanga akalie Chizomboka.

²⁹ Pilatu kashika watuhukile kuli ayo, wambile ngwenyi, Mulonga uka nunasumu yono mutu?

³⁰ Amukumbulwile ngwo, Kachi yono kapwile chingulungulu kachi kutwamukunjikile kuli yena.

³¹ Pilatu kashika wambile kuli ayo ngwenyi, Mutwaleni, nukamupatwile nikulita ni shimbi yenu. A-Yunda kashika ambile kuli iye ngwo, Kuchalitele ni shimbi, yetu tushihe mutu niumwe:

³² hanga liji lia Yesu likamanunuke lize ahanjikile, nikulweza kufwa chize mafwa.

³³ Pilatu kashika wanjilile cheka nawa mu palasiu, iye watambikile Yesu, wambile kuli iye ngwenyi, Mwe Mwanangana wa A-Yunda yena, nyi?

³⁴ Yesu wakumbulwile ngwenyi, Shina unambe chino cha kuli yena mwene, nyi? Shina akwo akwambulwililecho ha kutwala kuli yami?

³⁵ Pilatu wakumbulwile ngwenyi, Yami nguli Ka-Yunda, nyi? Vungu lie ni asasendote akwa lutwe akukunjikanga kuli yami: kuchi unakalinga?

³⁶ Yesu wakumbulwile ngwenyi, Wanangana wami hi wa hashi ko: kachi wanangana wami muupwa wa hashi, kachi tumbaji twami malitachika, hanga kechi kangukunjika kuli A-Yunda: alioze haliapwila wanangana wami hi wa hano ko.

³⁷ Pilatu kashika wambile kuli iye ngwenyi, Mba yena uli mwanangana, nyi? Yesu wakumbulwile ngwenyi, Yena unachambe ngwe, Uli mwanangana. Ha chino nasemukine, ni ha chino hinguneza hano hashi, hanga ngukashindakenye ha umwenemwene. Mweswe wa ku umwenemwene mevwa liji liami.

³⁸ Pilatu yamba kuli iye ngwenyi, Umwenemwene kuchi upwa? Muze te hamba chino, watuhukile kuli A-Yunda, yamba kuli ayo ngwenyi, Chawanyine chitela nichimwe muli iye.

³⁹ Alioze ndako nuli nayo ngutusule umwe kuli yenu ha Chizomboka: nunazange kashika ngutusule kuli yenu Mwanangana wa A-Yunda, nyi?

⁴⁰ O akololokele kashika cheka nawa ngwo, Hi yono ko, alioze Mbarapa. Achi Mbarapa wapwile muhuza.