Yoano 17 - MUKANDA USANDU WA ZAMBI 1975

¹ Yesu wahanjikile yino yuma; iye nikuhetula meso jenyi kwilu, wambile ngwenyi, Tata, ola hiyeza; chichimieka Mwané, hanga Mwané nawa akakuchichimieke.

² Chizechene ngwe wamuhele chiyulo helu lia atu eswe, hanga akahane mwono wa mutolo kuli waze eswe hiunamwehe.

³ Uno we mwono wa mutolo, hanga akanyingike yena mwe Zambi wamwenemwene umuwika, ni Yesu Kristu yoze yena wamutumine.

⁴ Nakuchichimiekene hano hashi; se hingunamanununa chitanga chize wanguhele kulinga.

⁵ Haliapwila, nguchichimieke, Tata, hamwe ni yena ni uhenya uze napwile nawo hamwe ni yena, muze te hashi kanda hapwa.

⁶ Nasolwele jina lie kuli atu aze wanguhele a kuli akwa hashi; apwile nie, ni yena wanguhelo; o hanafungu liji lie.

⁷ Haliapwila kananyingika yuma yeswayo wanguhele, ya kuli yena.

⁸ Mumu maliji aze wanguhele, hingunaho, o aatambwile, anyingikine chamwenemwene nakatukile kuli yena, o afulielele yena wangutumine.

⁹ Ngunalembe hali ayo; chishi kulemba hali akwa hashi, alioze hali waze hiunangwehe; mumu nie.

¹⁰ Ni yuma yize yeswe niyami, niye; ni vize niye, niyami: kananguchichimieka nayo.

¹¹ Ni yami chishi nawa hano hashi, ni wano hwali hano hashi, yami mungwiza kuli yena. Tata Musandu, uafunge kama mu jina lia yena mwene, waze hiunangwehe, hanga akapwe umuwika, chizechene ngwe yetu.

¹² Muze napwile hamwe no hashi, naatangile mu jina lie waze hiunangwehe: naalayile, mba niumwe wa kuli ayo watokele, shina mwe mukwa utoke; hanga chisoneko chikamanunuke.

¹³ Alioze haliapwila mungwiza kuli yena; ni yino yuma ngunahanjika hano hashi, hanga uwahililo wami ukazale tò muli ayo.

¹⁴ Hingunahe liji lie; hi akwa hashi Kanaavwila kole, mumu o hi akwa hashi ko, chizechene ngwe yami hi nguli mukwa hashi ko.

¹⁵ Chalembele hanga ukaachize hashi, alioze hanga ukaafunge kuli mwe mupi.

¹⁶ O hi akwa hashi ko, chizechene ngwe yami hi nguli mukwa hashi ko.

¹⁷ Uapwise asandu mu umwenemwene; liji lie we umwenemwene.

¹⁸ Chizechene ngwe yena wangutumine hano hashi, chocho yami nawa hingunaatumu hashi.

¹⁹ Mumu hali ayo nakulisela ku usandu, hanga ayo ene nawa akalisele ku usandu mu umwenemwene.

²⁰ Chipwe chalembele hali wano wika, alioze hali waze nawa mangufuliela mumu ha liji lio;

²¹ hanga o eswe akapwe umuwika; chizechene ngwe yena Tata uli muli yami, ni yami nguli muli yena, hanga o nawa akapwe umuwika muli yetu; hanga akwa hashi akafuliele ngwe wangutumine.

²² Ni uhenya uze hiunangwehe, hingunahewo; hanga akapwe umuwika chizechene ngwe yetu tuli umuwika;

²³ yami muli ayo, ni yena muli yami, hanga Ukaapwise umuwika liakulu; hanga akwa hashi akanyingike wangutumine, no hiunaazange chizechene ngwe hiunanguzange yami.

²⁴ Tata, ngunazange waze nawa hiunangwehe akapwe hamwe ni yami kuze nguli, hanga akatale uhenya wami, uze wanguhele; mumu wanguzangile shimbu kanda asela fundamentu ya hashi.

²⁵ A Tata, mukwa ululi, akwa hashi kakunyingikineko, alioze yami nakunyingikine; ni wano anyingikine ngwe wangutumine;

²⁶ naanyingikishine jina lie, mungukaanyingikisalio; hanga zango lize hiunanguzange nalio, likapwe muli ayo, ni yami muli ayo.