Yoano 16 - MUKANDA USANDU WA ZAMBI 1975

¹ Yino yuma hinahanjika kuli yenu, hanga kunuchi kutalinga;

² kumakanukatwisa ku masunangonga; ewa, mwaka muwiza, muze mweswawo manushiha, makashinginyeka ngwe kanalingi milimo ya Zambi.

³ Yino yuma makalinga, mumu kanyingikine Tata, chipwe yami, ka.

⁴ Alioze yino yuma hinahanjika kuli yenu, hanga muze mwaka wayo hiweza, nukewuluke, ngwe nanwambulwilile. Ni yino yuma chambile kuli yenu chize ku uputukilo, mumu napwile hamwe ni yenu.

⁵ Alioze haliapwila munguya kuli yoze wangutumine; mba niumwe wa kuli yenu unanguhula ngwenyi, Kulihi muoya?

⁶ Alioze mumu hinahanjika yino yuma, mbunge jenu hijazala tò ni chinyengo.

⁷ Alioze ngunambe umwenemwene kuli yenu ngwami, Chinafumbuka hali yenu kachi munguya; mumu kachi chichi kuya, kachi Chikwashi kechi kwiza kuli yenu; alioze kachi munguya, kachi mungukamutuma kuli yenu.

⁸ Iye muze heza, makakumika akwa hashi ha kutwala ku shili, ha kutwala ku ululi, ha kutwala ku upatwilo:

⁹ ha kutwala ku shili, mumu kangufulielele yami;

¹⁰ ha kutwala ku ululi, mumu munguya kuli Tata, ni yenu kunushi kungumona nawa;

¹¹ ha kutwala ku upatwilo, mumu hapatwila mwata wa hano hashi.

¹² Yami nguchili ni yuma yinji ya kwamba kuli yenu, alioze kunwahashile kuyivwa haliapwila.

¹³ Alioze muze iye, mwe Spiritu ya umwenemwene heza, makanusongwela mu umwenemwene weswe; mumu kechi kahanjika cha kuli iye mwene; alioze cheswacho mevwa, chenacho makachihanjika: iye makanwambulwila yuma yize muyizaho.

¹⁴ Kumakanguchichimieka, mumu makatambula yuma yami, makanwambulwilayo.

¹⁵ Yuma yize yeswe Tata ali nayo, niyami: kashika hinamba ngwami, Makatambula yuma yami, nikunwambulwilayo.

¹⁶ Shimbu likepe, kunushi kungumona; ni cheka nawa shimbu likepe, mba munukangumona.

¹⁷ Amwe a kuli tumbaji twenyi kashika aliambile umwe kuli mukwo ni mukwo ngwo, Acho chika anambe kuli yetu ngwenyi, Shimbu likepe kunushi kungumona; ni cheka nawa shimbu likepe, mba munukangumona, mumu munguya kuli Tata?

¹⁸ Ambile kashika ngwo, Acho chika anambe ngwenyi, Shimbu likepe? Kutwanyingikine chize anambe.

¹⁹ Achi, Yesu wanyingikine ngwe azangile kumuhula, iye wambile kuli ayo ngwenyi, Nunalihuta ha chino hakachi kenu, nyi? Ngwe hinamba ngwami, Shimbu likepe kunushi kungumona; ni cheka nawa shimbu likepe, mba munukangumona?

²⁰ Pundu, pundu, ngunambe kuli yenu ngwami, Munukalila, nikulinyenga, alioze akwa hashi makawahilila; munukevwa chinyengo, alioze chinyengo chenu muchalumuka uwahililo.

²¹ Pwo muze masema mwana, mapwa ni chinyengo, mumu ola yenyi hiyeza, alioze muze mwana hasemuka, keshi kwiwuluka nawa luyinda, ha uwahililo te mutu hasemuka hano hashi.

²² Ni yenu kashika haliapwila chinyengo nuli nacho, alioze mungukanumona cheka nawa, ni mbunge jenu mujikawahilila, ni uwahililo wenu niumwe manuchizawo.

²³ Ha tangwa lize kunuchi kanguhula nichimwe. Pundu, pundu, ngunambe kuli yenu ngwami, Cheswacho munwita kuli Tata mu jina liami, kumakanwahacho.

²⁴ Ndo haliapwila kunwechile nichimwe mu jina liami; etenu, mba kumunukatambula, hanga uwahililo wenu ukazale tò.

²⁵ Yino yuma hinahanjika kuli yenu ni yishima, alioze mwaka muwiza muze chichi kahanjika nawa kuli yenu ni yishima, alioze mungukanwambulwila pundu ha kutwala kuli mwe Tata.

²⁶ Ha tangwa lize munuketa mu jina liami; chambile kuli yenu ngwami, Mungukalemba kuli Tata hali yenu;

²⁷ mumu Tata iye mwene kananuzange, mumu hinunanguzange, hinunafuliela ngwe nakatukile kuli Tata.

²⁸ Nakatukile kuli Tata, hinguneza hashi; cheka nawa, munguhichika hashi, munguya kuli Tata.

²⁹ Tumbaji twenyi yamba kuli iye ngwo, Tala, haliapwila unahanjika pundu, kwahanjikile ni chishima.

³⁰ Haliapwila tunanyingika yena kuunanyingika yuma yeswe, kuchatambile umwe kukuhula; ha chino tunafuliela unakutuka kuli Zambi.

³¹ Yesu waakumbulwile ngwenyi, Nunafuliela haliapwila, nyi?

³² Talenu, ola muyiza, ewa, hiyeza, muze munukamwangana mweswe kuli nienyi mwene, munukanguhichika ukawami; hindu yami hi nguli ukawami ko, mumu Tata hwali hamwe ni yami.

³³ Yino yuma hinahanjika kuli yenu, hanga muli yami nukapwe ni sambukila. Hano hashi munukapwa ni luyinda: alioze hamukenu chikolo; hingunakumbu hashi.