Yoano 14 - MUKANDA USANDU WA ZAMBI 1975

¹ Mbunge jenu kanda jilipikala: nwafuliela Zambi, fulielenu yami nawa.

² Mu zuwo lia Tata muyili yipatulo yinji; kachi hi chocho ko, kachi nanwambulwilile. Ngunayi mukunululikila muhela.

³ Nyi kachi munguya mukunululikila muhela, kachi mungwiza cheka nawa, mungukanutambula kuli yami mwene: hanga kuze yami nguli, kuze kwene ni yenu nawa nukapwe.

⁴ Kuze munguya nunanyingika, ni ye jila nunanyingika.

⁵ Tomase yamba kuli iye ngwenyi, Mwene, kutwanyingikine kuze muoya; ngwe kuchi mutuhasa kunyingika jila?

⁶ Yesu yamba kuli iye ngwenyi, Ye jila yami, ni we umwenemwene, ni we mwono: niumwe meza kuli Tata shina ni yami.

⁷ Kachi nwangunyingika kachi nwanyingika Tata nawa: chize ku haliapwila ndo kulutwe nunamunyingika, hinunamumono.

⁸ Fwilipe yamba kuli iye ngwenyi, Mwene, tulweze kama mwe Tata, mba hikwahwa.

⁹ Yesu yamba kuli iye ngwenyi, Nguli hamwe ni yenu shimbu lipwa haha, hindu kwangunyingikine, Fwilipe? Yoze wangumona, hamona mwe Tata; ngwe kuchi unambe ngwe, Tulweze kama mwe Tata?

¹⁰ Kuchi kufuliela, yami nguli muli Tata, ni Tata muli yami, nyi? Maliji aze ngunahanjika kuli yenu, chishi kwahanjika a kuli yami mwene: alioze Tata yoze watwama muli yami, kakulinga yitanga yenyi.

¹¹ Ngufulielenu, yami nguli muli Tata, ni Tata muli yami: alioze nyi ka, ngufulielenu ha yitanga yene.

¹² Pundu, pundu, ngunambe kuli yenu ngwami, Yoze mangufuliela, yitanga yize nakulinga yami, iye nawa kumakayilinga; ni yitanga yinene yahiana yino kumakayilinga; mumu ngunayi kuli Tata.

¹³ Cheswacho munwita mu jina liami, kumunguchilinga, hanga achichimieke Tata muli mwe Mwana.

¹⁴ Kachi munwita chuma chimwe mu jina liami, kumunguchilinga.

¹⁵ Kachi nunanguzange, fungenu shimbi jami.

¹⁶ Mungukalemba kuli Tata, iye kumakanwaha Chikwashi mukwo, hanga akapwe hamwe ni yenu ndo ku miaka ya mutolo.

¹⁷ Iye Spiritu ya umwenemwene: mwenawo akwa hashi kahashile kumutambula; mumu keshi kumumona, chipwe keshi kumunyingika; alioze yenu nwakumunyingika; mumu katwama hamwe ni yenu, iye kumakapwa muli yenu.

¹⁸ Chichi kanuhichika ana-ashiwa; mungwiza kuli yenu.

¹⁹ Shimbu likepe wika ni akwa hashi kechi kangumona; alioze yenu munungumona: se yami nguli ni mwono, ni yenu nawa kumunukapwa ni mwono.

²⁰ Ha tangwa lize kumunukanyingika, yami nguli muli Tata, ni yenu muli yami, ni yami muli yenu.

²¹ Yoze uli ni shimbi jami, wakujifunga, mwenawo wakunguzanga; ni yoze wakunguzanga, kumakamuzanga kuli Tata, ni yami mungumuzanga, mungulisolola kuli iye.

²² Yundase (hi Ka-Keriote ko), yamba kuli iye ngwenyi, Mwene, ngwe kuchi mulisolola kuli yetu, hi kuli akwa hashi ko?

²³ Yesu wamukumbulwile, ngwenyi, Kachi umwe manguzanga, kachi mafunga liji liami; ni mwe Tata makamuzanga, kumutukeza kuli iye, mutukatenga muma mwetu mwa kutwama hamwe nenyi.

²⁴ Yoze keshi kunguzanga, keshi kufunga maliji jami: ni liji lize nwakwivwa hi nihami ko alioze lia Tata yoze wangutumine.

²⁵ Yino yuma hinahanjika kuli yenu shimbu nguchili hamwe ni yenu.

²⁶ Alioze Chikwashi, iye Spiritu Musandu, yoze Tata makatuma mu jina liami, iye kumakanulongesa yuma yeswe, makanwiwulwisa yuma yize nambile kuli yenu.

²⁷ Sambukila ngunahichika ni yenu; sambukila ya yami ngunanweheyo, hi ngwe akwa hashi akuhana ko, yami ngunanwehe. Mbunge jenu kanda jilipikala, chipwe kanda jivwa mwongo.

²⁸ Nwevwanga ngwe nambanga kuli yenu ngwami, Munguya, mba mungwiza kuli yenu. Kachi nunanguzange, kachi nunawahilila, mumu te munguya kuli Tata: mumu Tata iye munene wahiana yami.

²⁹ Haliapwila hinanwambulwila shimbu kanda chipwa, hanga, muze muchipwa, nukafuliele.

³⁰ Chichi kuhanjika chinji nawa ni yenu, mumu mwata wa hano hashi meza: keshi nichimwe muli yami;

³¹ alioze hanga akwa hashi akanyingike ngwe nakuzanga Tata; chizechene ngwe Tata wanguhele shimbi, chocho nakulinga. Katukenu, tuyenu.