Yoano 13 - MUKANDA USANDU WA ZAMBI 1975

¹ Achi, shimbu te chiwanyino cha Chizomboka kanda chiheta, Yesu nikunyingika ola yenyi hiyeza akatuke hashi akaye kuli mwe Tata, se hanazange nienyi mwene, waze apwile hano hashi, waazangile ndo ku songo.

² Shimbu machilia, Ndiapu se hanachise kulu mu mbunge ya Yundase Ka-Keriote mwana Semone, amukunjike.

³ Yesu, nikunyingika ngwe mwe Tata hanamwehe yuma yeswe mu moko jenyi, ngwe kuli Zambi wakatukile, ni kuli Zambi maya.

⁴ Yakatuka ku kulia, yatambika mazalo jenyi; iye yanda twaya, yalijichika.

⁵ Kulutwe yatehuna meya mu mbashila, yaputuka kusanyisa yiliato ya tumbaji, ni kuyikusumuna ni twaya lize walijichikile nalio.

⁶ Yaheta kashika kuli Semone Petulu. Yamba kuli iye ngwenyi, Mwene, musanyisa yiliato yami, nyi?

⁷ Yesu wamukumbulwile, ngwenyi, Chize ngunalingi kwanyingikine haliapwila; alioze kumukanyingika kulutwe.

⁸ Petulu yamba kuli iye ngwenyi, Kuchi kasanyisa yihato yami nilimwe tangwa. Yesu wamukumbulwile ngwenyi, Nyi chakusanyishine, kachi yena kushi chihanda ni yami.

⁹ Semone Petulu yamba kuli iye ngwenyi, Mwene, hi yiliato yami wika ko, alioze moko jami nawa ni mutwe wami.

¹⁰ Yesu yamba kuli iye ngwenyi, Yoze hasana mweswe, keshi kufupa kusana shina yiliato yenyi, alioze kanapeme mweswe lukombo; ni yenu nunapeme, alioze hi eswe ko.

¹¹ Mumu wanyingikine yoze mamukunjika; kashika wambile ngwenyi, Kunwapemene eswe.

¹² Kashika muze te hasanyisa yiliato yo, handa mazalo jenyi, hatwama cheka nawa, wambile kuli ayo ngwenyi, Nunanyingika chize hinalinga kuli yenu, nyi?

¹³ Nwakunguvuluka ngwenu, Longeshi ni Mwene; nwakwamba kanawa; mumu chocho nguli.

¹⁴ Kachi yami, mwe Mwene kanda Longeshi, hinasanyisa yiliato yenu; kachi ni yenu nawa Chanutamba kulisanyisa yiliato ya umwe ni mukwo ni mukwo.

¹⁵ Mumu hinanwaha chilweza, hanga ni yenu nawa Chanutamba kulinga chizechene ngwe yami hinalinga kuli yenu.

¹⁶ Pundu, pundu, ngunambe kuli yenu ngwami, Ndungo keshi kuhiana mwene wenyi; chipwe yoze watumiwa keshi kuhiana yoze wamutumine, ka.

¹⁷ Kachi nunanyingika yino yuma, kachi nunawaha nyi munuyilinga.

¹⁸ Chishi kuhanjika hali yenu eswe; ngunanyingika waze hingunatongola; alioze hanga chisoneko chikamanunuke ngwo, Yoze wakulia mbolo hamwe ni yami, hananguzundwila kashijino kenyi.

¹⁹ Chize ku haliapwila ngunanwambulwila shimbu kanda chipwa, hanga muze muchipwa, nukafuliele ngwe yami nguli.

²⁰ Pundu, pundu, ngunambe kuli yenu ngwami, Yoze matambula mweswe mungumutuma, mangutambula yami; ni yoze mangutambula, matambula yoze ngutumine.

²¹ Muze te Yesu hamba yino yuma, walipikalile mu Spiritu, neve washindakenyene ngwenyi, Pundu, pundu, ngunambe kuli yenu ngwami, Umwe wa kuli yenu makangukunjika.

²² Tumbaji kashika alitalile umwe kuli mukwo ni mukwo nikukakashana hali yoze anambe.

²³ Achi, kwapwile umwe wa kuli tumbaji twenyi, kanajamina mu kondo ya Yesu, yoze amuzangile Yesu.

²⁴ Semone Petulu kashika yalahula kuli iye, yamba kuli iye ngwenyi, Twambulwile yoze anambe.

²⁵ Iye nikuzeukila, chizechene wapwile mu kondo ya Yesu, yamba kuli iye ngwenyi, Mwene, ngwetu, Iya?

²⁶ Yesu yakumbulula ngwenyi, Yoze mungutachila lupapa, mungumwahaye. Kashika muze te hatata lupapa, yamuhana kuli Yundase, mwana Semone, Ka-Keriote.

²⁷ Kulutwe lia lupapa, hohene Satana wanjilile muli iye. Yesu kashika yamba kuli iye ngwenyi, Chize mulinga, linga nikawashi.

²⁸ Alioze niumwe wa kuli waze anatwama ku mesa wanyingikine ha chikuma chize wahanjikile chino kuli iye.

²⁹ Mumu amwe ashinginyekene, ngwo, Mumu Yundase wapwile ni tuku, Yesu wambile kuli iye ngwenyi, Landa yuma yize tunafupu ha chiwanyino; hanji ahane chimwe kuli yiswale.

³⁰ Iye muze te hatambula lupapa, watuhukile haze hene; kwapwile ufuku.

³¹ Muze te kashika hatuhuka, Yesu yamba ngwenyi, Haliapwila hanachichimieka mwe Mwana Zambi, mba hanachichimieka Zambi muli iye:

³² ni Zambi kumakamuchichimieka muli iye mwene, ni haliapwila kumamuchichimieka.

³³ Ana akepe, shimbu likepe wika yami nguli hamwe ni yenu. Kumunukangufupa: chizechene ngwe nambile kuli A-Yunda ngwami, Kuze munguya yami, yenu kunwahashile kuyako: chocho ngunambe kuli yenu haliapwila.

³⁴ Shimbi yaha ngunanweheyo, ngwami, Nukalizange umwe ni mukwo ni mukwo; chizechene ngwe yami hingunanuzange, ni yenu nawa nukalizange umwe ni mukwo ni mukwo.

³⁵ Ku chino eswe makanyingika yenu nuli tumbaji twami, kachi munupwa ni zango umwe kuli mukwo ni mukwo.

³⁶ Semone Petulu yamba kuli iye ngwenyi, Mwene, kulihi muoya? Yesu wakumbulwile ngwenyi, Kuze munguya yena kwahashile kungukaula haliapwila; alioze kulutwe mukangukaula.

³⁷ Petulu yamba kuli iye ngwenyi, Mwene, kuchi te Chahashile kukukaula chipwe haliapwila? Mungulumbika mwono wami hali yena,

³⁸ Yesu yakumbulula ngwenyi, Mutumbika mwono we hali yami, nyi? Pundu, pundu, ngunambe kuli yena ngwami, Ndemba kechi katambika ndo yena hiwalikala yami katatu.