Yoano 12 - MUKANDA USANDU WA ZAMBI 1975

¹ Yesu kashika, matangwa asambano shimbu Chizomboka kanda chiheta, wejile ku Mbetaniya, kuze apwile Lazaru, yoze amuhindwishile Yesu hakachi ka afu.

² Kuze kashika amulingilile chiteleka: ni Marta wavumbikile; alioze Lazaru wapwile umwe wa kuli waze atwamine ku mesa hamwe nenyi.

³ Maria kashika wanjile libra ya yitumbo ya vumba lipema, yilemu chikolo, wawayishile nayo yiliato ya Yesu, wakusumwine yiliato yenyi ni kambu jenyi; ni zuwo liazalile tò ni vumba lia yitumbo.

⁴ Alioze Yundase Ka-Keriote, umwe wa kuli tumbaji twenyi, yoze mamukunjika, yamba ngwenyi,

⁵ Kuchi te kalanjishile yitumbo yino ha kulakaji atatu a mbongo, akajihane kuli yiswale?

⁶ Achi, kambile chino mumu wanyongene yiswale, ka; alioze mumu wapwile mwiji, ni se wapwile ni tuku, iye wambachile jize aselemo.

⁷ Yesu kashika wambile ngwenyi, Mwechenu; ha tangwa lia kufunda chami hanayifungu.

⁸ Mumu yiswale nuli no matangwa eswe hamwe ni yenu; alioze yami, kunushi ni yami matangwa eswe.

⁹ Mbunga yinene ya A-Yunda kashika anyingikine iye wapwileko: o ejile, hi mumu hali Yesu wika ko, alioze hanga akamone Lazaru nawa, yoze amuhindwishile hakachi ka afu.

¹⁰ Alioze asasendote akwa lutwe atwamine punga, hanga akashihe Lazaru nawa;

¹¹ mumu te hali iye anji a kuli A-Yunda apwile nikuya, nikufuliela Yesu.

¹² Muze hikwacha, mbunga yinene ya waze ejile ku chiwanyino, muze evwile ngwo, Yesu kaneza ku Yerusaleme,

¹³ anjile mitango ya mingaji, atuhukile mukumupatwiza, nikukololoka ngwo, Vulie! Kafumana yoze meza mu jina lia Mwene! mwe Mwanangana wa Izalele!

¹⁴ Yesu muze te hawana mwana-chimbulu, watwamine hali iye; ngwe chinasonewa ngwo,

¹⁵ Kanda wivwa woma, yena mwana wa Zaione; Tala Mwanangana we kaneza, kanatwama hali mwana-chimbulu.

¹⁶ Yino yuma tumbaji twenyi kayinyingikine hatangu; alioze muze te Yesu hanjila mu uhenya wenyi, hohene ewulukile ngwe yino yuma yasonewene hali iye, ngwe alingile yino yuma kuli iye.

¹⁷ Mbunga kashika yize apwile hamwe nenyi, muze atambikile Lazaru atuhuke mu fuka, amuhindwishile hakachi ka afu, ashindakenyene.

¹⁸ Ha chikuma chino nawa mbunga amupatwijile, mumu evwile ngwo, Halinga chilayi chino.

¹⁹ A-Fwariseu kashika aliambile hakachi ko ngwo, Nunamono ngwe kunushi kulinga nichimwe; talenu, akwa hashi eswe hanayi kunyima yenyi.

²⁰ Hakachi ka waze akandukile mukuwayila ku chiwanyino kwapwile amwe A-Ngresia.

²¹ Wano kashika ejile kuli Fwilipe, yoze wa ku Mbeteseta, limbo lia mu Ngalileya, o amulembele ngwo, Mwane, tunazange kumona Yesu.

²² Fwilipe yaya, yambulwila Andeleu: Andeleu ni Fwilipe yaya, o yambulwila Yesu.

²³ Yesu yaakumbulula, ngwenyi, Ola hiyeza, mwe Mwana Mutu akanjile mu uhenya wenyi.

²⁴ Pundu, pundu, ngunambe kuli yenu ngwami, Lunona wa tiliku matwama ukawenyi shina maholoka hashi, mafwa; alioze kachi mafwa, kachi mema mihuko yinji.

²⁵ Yoze mazanga mwono wenyi, mautokesa; ni yoze mavwila kole mwono wenyi hano hashi, kumakaufungu ku mwono wa mutolo.

²⁶ Kachi umwe manguvumbika, kachi akangukaule; ni kuze yami nguli, kuze kwene nawa kumakapwa kavumbi kami: kachi umwe manguvumbika, kachi Tata kumakamulemesa.

²⁷ Haliapwila mbunge yami yinalipikala, kuchi mungwamba? Tata, ngulamwine ku ola yino. Alioze ha chikuma chino hineza ku ola yino.

²⁸ Tata, chichimieka jina lie. Kashika liji liatuhukile mwilu ngwo, Hingunalichichimieka, kumungukalichichimieka cheka nawa.

²⁹ Mbunga kashika, yize amanyineko, o evwile, ambile ngwo, Kunakulunguza: akwo ambile ngwo, Mungelo kahanjika kuli iye.

³⁰ Yesu wakumbulwile, ngwenyi, Liji lino kuliejile mumu hali yami, alioze mumu hali yenu.

³¹ Haliapwila upatwilo wa hashi hiweza; haliapwila kumambila haze mwata wa hashi.

³² Nyi kachi manguzundula hashi, kachi mungukakoka atu eswe kuli yami mwene.

³³ Alioze chino wambile nikulweza kufwa chize mafwa.

³⁴ Mbunga kashika amukumbulwile ngwo, Hitunevu mu shimbi ngwo, Kristu matwama ndo ku miaka ya mutolo; ngwe kuchi yena unambe ngwe, Chatamba kuzundula mwe Mwana Mutu? Yono mwe Mwana Mutu iya?

³⁵ Yesu kashika wambile kuli ayo ngwenyi, Hindu shimbu likepe nawa pangu lichili hakachi kenu. Endenu shimbu nuli ni pangu, hanga milima kuyichi kanuwana; ni yoze menda mu milima kanyingikine kuze maya.

³⁶ Shimbu nuli ni pangu, fulielenu pangu, hanga nukapwe ana a pangu. Yino yuma ahanjikile Yesu, mba yakatuka, yaswama kuli ayo.

³⁷ Alioze chipwe hanalingi kulu yilayi yinji chikolo kumeso jo, hindu kamufulielele:

³⁸ hanga liji lia profeta Izaia likamanunuke, lize ambile ngwenyi, Mwene, iya hanafuliela sango lietu? Kuli iya kwoko lia Mwene hilinasoloka?

³⁹ Ha chikuma chino kahashile kufuliela, mumu te Izaia wambile cheka nawa ngwenyi,

⁴⁰ Iye hanapupuchisa meso jo, iye hanakalisa mbunge jo; Kuchina mamona ni meso jo, manyingika ni mbunge jo, akalumuke, Ni yami mungwahindwisa.

⁴¹ Yino yuma ambile Izaia, mumu wamwene uhenya wenyi; wahanjikile ha kutwala kuli iye.

⁴² Chipwe chocho, hindu anji a kuli akwa kuyula akamufuliele; alioze mumu hali A-Fwariseu kamutayijileko, kuchina makaakatwisa ku sunangonga:

⁴³ mumu azangile uhenya wa atu, hi uhenya wa Zambi ko.

⁴⁴ Yesu wakololokele ngwenyi, Yoze mangufuliela kafulieleleko yami, alioze kuli yoze wangutumine.

⁴⁵ Ni yoze mangumona, mamona yoze wangutumine.

⁴⁶ Hinguneza ngwe pangu hano hashi, hanga mweswawo mangufuliela, kechi katwama mu milima.

⁴⁷ Kachi umwe mevwa maliji jami, keshi kwafunga, yami chishi kumupatwiia: mumu chejile hanga ngukapatwile akwa hashi, alioze hanga ngukalamwine akwa hashi.

⁴⁸ Yoze malituna yami, keshi Kutambula maliji jami, kali ni yoze mamupatwila: liji lize nahanjikile, lienalio kumulikamupatwila ha tangwa lia kusula.

⁴⁹ Mumu chahanjikile cha kuli yami mwene; alioze Tata yoze wangutumine, iye mwene hanangwehe shimbi, chize mungwamba, ni chize munguhanjika.

⁵⁰ Ngunanyingika shimbi yenyi, mwono wa mutolo; yuma yize kashika nakuhanjika, chizechene ngwe Tata hanambe kuli yami, chocho nakuhanjika.