Yoano 11 - MUKANDA USANDU WA ZAMBI 1975

¹ Achi, umwe mutu wayijile, Lazaru wa ku Mbetaniya, wa ku chihunda cha Maria ni yayo Marta.

² Iye Maria, yoze wawayishile Mwene ni yitumbo ya vumba lipema, wakusumwine yiliato yenyi ni kambu jenyi, ndumbwenyi Lazaru wayijile.

³ Mapangienyi kashika atumine kuli iye, ngwo, Mwene, yoze yena wakumufwila, kanayiji.

⁴ Alioze muze Yesu achivwile, wambile ngwenyi, Kuyiza chino hi cha kufwa ko, alioze cha kuneha uhenya kuli Zambi, hanga akachichimieke nacho mwe Mwana Zambi.

⁵ Achi, Yesu wazangile Marta, ni mwanakwo, ni Lazaru.

⁶ Muze kashika evwile ngwo, Kanayiji, wasalile matangwa aali muma muze apwile.

⁷ Mba kulutwe yamba kuli tumbaji twenyi, ngwenyi, Tatuyenu ku Yundeya cheka nawa.

⁸ Tumbaji yamba kuli iye ngwo, Longeshi, kashimbu wika hanga A-Yunda afupile kukwasa mawe, mba muoya kuze cheka nawa, nyi?

⁹ Yesu wakumbulwile ngwenyi, Mwalwa kuushi ni kumi lia ola ni ola jiali, nyi? Kachi umwe menda ha mwalwa keshi kuhukana, mumu mamona pangu lia hashi.

¹⁰ Alioze kachi umwe menda ha ufuku mahukana, mumu pangu kulishimo muli iye.

¹¹ Yino yuma wambile, ni kulutwe yamba kuli ayo ngwenyi, Kasendo ketu Lazaru hanayi mu tulo; alioze munguya, hanga ngukamulawise mu tulo.

¹² Tumbaji kashika ambile kuli iye ngwo, Mwene, kachi hanayi tulo, kachi makahinduka.

¹³ Achi, Yesu te kanambe kufwa chenyi: alioze o ashinginyekene ngwo, Kanahanjika ha kupomba tulo.

¹⁴ Hohene Yesu kashika wambile kuli ayo pundu ngwenyi, Lazaru hafwa.

¹⁵ Mba hali yenu ngunawahilila te chapwileko, hanga nukafuliele; alioze tatuyenu kuli iye.

¹⁶ Tomase kashika, yoze ukwete jina likwo ngwo, Ndilimu, wambile kuli tumbaji-ni-akwo ngwenyi, Tatuyenu yetu nawa hanga tukafwe hamwe nenyi.

¹⁷ Yesu kashika muze ahetele, wawanyine te hapwa kulu matangwa awana mu fuka.

¹⁸ Achi Mbetaniya kwapwile hakamwihi ni Yerusaleme, ngwe kilometro jitatu;

¹⁹ ni anji a kuli A-Yunda ayile kuli Marta ni Maria, hanga akaasangulwise ha kutwala kuli ndumbwo.

²⁰ Marta kashika muze evwile ngwo, Yesu kaneza, wayile nikumupatwiza: alioze Maria wasalile mu zuwo.

²¹ Marta kashika wambile kuli Yesu ngwenyi, Mwene, kachi yena unakapwa kama kuno, kachi ndumbwami kafwile.

²² Chipwe haliapwila ngunanyingika cheswacho muwita kuli Zambi, Zambi kumakakwahacho.

²³ Yesu yamba kuli iye ngwenyi, Ndumbwe kumakahinduka.

²⁴ Marta yamba kuli iye ngwenyi, Ngunanyingika makahinduka ha uhindukilo ha tangwa lia kusula.

²⁵ Yesu wambile kuli iye ngwenyi, We uhindukilo ni we mwono yami: yoze mangufuliela, chipwe mafwa, hindu kumakapwa ni mwono.

²⁶ Ni mweswe uli ni mwono, mangufuliela, kechi kafwa nichimwe ndo ku miaka ya mutolo; Unafuliela chino, nyi?

²⁷ Yamba kuli iye ngwenyi, Ewa, Mwene: hingunafuliela ngwami, mwe Kristu yena, mwe Mwana Zambi, yoze meza hano hashi.

²⁸ Muze te hamba chocho, wayile, watambikile mwanakwo Maria ku tenga, ngwenyi, Longeshi heza, kanakutambika.

²⁹ Iye muze achivwile, wakatukile nikawashi, wayile kuli iye.

³⁰ Achi Yesu kanda achiza ku chihunda, alioze wapwile kuma kuze amupatwijile Marta.

³¹ A-Yunda kashika waze apwile hamwe nenyi mu zuwo, nikumusangulwisa, muze amwene Maria ngwe wakatukile nikawashi atuhuke, amukawile, nikushinginyeka ngwo, Kanayi ku fuka mukulililako.

³² Maria kashika ejile kuze apwile Yesu, muze hamumona, wafulamanyine ku yiliato yenyi, nikwamba kuli iye ngwenyi, Mwene, kachi yena unakapwa kama kuno, kachi ndumbwami kafwile.

³³ Muze Yesu kashika amumwene kanalili, ni A-Yunda nawa analili, waze ejile hamwe nenyi, watwile mikuma mu Spiritu, nikulipikala.

³⁴ Wambile ngwenyi, Kulihi nunakamusa? Yamba kuli iye ngwo, Mwene, tweya utale.

³⁵ Yesu Walilile.

³⁶ A-Yunda kashika ambile ngwo, Talenu ngwe wamufwilile!

³⁷ Alioze amwe a kuli ayo ambile ngwo, Yono mutu walawishile meso ja kapuputa, kahashile kumufunga hanga kechi kufwa, nyi?

³⁸ Yesu kashika nikutwa mikuma cheka nawa mu mbunge yenyi, yeza ku fuka. Achi fuka liapwile chivwenge, ni liwe aliseleho.

³⁹ Yesu yamba ngwenyi, Chizenu liwe. Marta, ndumbu wa mufu, yamba ngwenyi, Mwene, kanakupuka kulu; mumu matangwa awana hapalika.

⁴⁰ Yesu yamba kuli iye ngwenyi, Chambile kuli yena ngwami, Kachi mufuliela kachi mumona uhenya wa Zambi, nyi?

⁴¹ Achijile kashika liwe; ni Yesu wahetwile meso jenyi kwilu, iye wambile ngwenyi, Tata, ngunakusakwila mumu wanguvwile.

⁴² Ngunanyingika wakungwivwavwa matangwa eswe: alioze mumu ha mbunga yize akungujingilika nachamba, hanga afuliele ngwe wangutumine.

⁴³ Muze te hamba chocho, wakololokele ni liji linene ngwenyi, Lazaru, tuhukamo.

⁴⁴ Mufu watuhukile, wa kukasa molu ni moko ni miya ya fuka, ni ku meso jenyi kwakujinga ni chitambala. Yesu yamba kuli ayo ngwenyi, Mujitulenu, numweche aye.

⁴⁵ Anji kashika a kuli A-Yunda waze ejile kuli Maria, ha kumona chize alingile Yesu, amufulielele.

⁴⁶ Alioze amwe a kuli ayo ayile kuli A-Fwariseu, o ambile kuli ayo yuma yize alingile Yesu.

⁴⁷ Asasendote akwa lutwe kashika ni A-Fwariseu alikungulwile mukutwama punga, o ambile ngwo, Kuchi mutulinga? Mumu yono mutu kakulinga yilayi yinji.

⁴⁸ Kachi mutumwecha chocho, kachi eswe makamufuliela, ni A-Roma makeza, makachiza ni muhela wetu ni vungu lietu.

⁴⁹ Alioze umwe wa kuli ayo, Kayafwa, se wapwile sasendote mukwa lutwe ha mwaka uze wene, wambile kuli ayo ngwenyi, Yenu kunwanyingikine nichimwe.

⁵⁰ Chipwe kunushi kushinginyeka ngwe chinatambe mutu umuwika akatwile e atu, kuchina vungu lieswe lukombo makuwa.

⁵¹ Alioze chino kambileko cha kuli iye mwene; alioze se wapwile sasendote mukwa lutwe ha mwaka uze, waprofetezele ngwenyi, Yesu mafwila lie vungu lieswe;

⁵² ni hi vungu wika ko, alioze hanga akakungulule nawa kuli umuwika ana a Zambi waze anamwangana.

⁵³ Chize ku tangwa lize kashika atwamine punga hanga akamushihe.

⁵⁴ Yesu kashika kendeleko nawa kumeso ja atu eswe hakachi ka A-Yunda, alioze wakatukile kuze mukuya ku chifuchi cha kusulangana ni puya ku limbo, jina lialio, Eframe; watwamineko hamwe ni tumbaji twenyi.

⁵⁵ Alioze Chizomboka cha A-Yunda chakundamine: ni anji a ku chifuchi chize akandukile ku Yerusaleme muze te Chizomboka kanda chipwa, hanga akalipemese.

⁵⁶ Afupile kashika Yesu, o aliambile hakachi ko, nikumana mu tembele ngwo, Kuchi nunashinginyeka? Kechi kwiza ku chiwanyino, nyi?

⁵⁷ Achi asasendote akwa lutwe ni A-Fwariseu te hahana shimbi, kachi umwe manyingika kuze ali, kachi akachambulule, hanga akamukwate.