Yoano 10 - MUKANDA USANDU WA ZAMBI 1975

¹ Pundu, pundu, ngunambe kuli yenu ngwami, Yoze keshi kunjilila ku chikolo mu limba lia mapanga, alioze manyinyina kweka, mwenawo mwiji ni muhuza.

² Yoze manjilila ku chikolo iye mwe kafunga ka mapanga.

³ Iye, mukwa kufunga chikolo mamwazulwila; ni mapanga mevwa liji lienyi: iye matambika mapanga jenyi mwene ha majina jo, iye maatwala haze.

⁴ Muze te hatuhwisa nienyi mwene eswe, maatetekela, ni mapanga mamukaula: mumu manyingika liji lienyi.

⁵ Alioze chilambala kechi kamukaula, alioze mamuchina: mumu kanyingikine liji lia yilambala.

⁶ Chishima chino Yesu wahanjikile kuli ayo: alioze kanyingikine chize ahanjikile kuli ayo.

⁷ Yesu kashika wambile kuli ayo cheka nawa ngwenyi, Pundu, pundu, ngunambe kuli yenu ngwami, Chikolo cha mapanga yami.

⁸ Waze eswe anguliangilile kwiza, eji ni mihuza; alioze mapanga kaevwileko.

⁹ Chikolo yami; kachi umwe manjilila kuli yami, kumakamulamwina, makanjilanjila, makatuhwoka, makawana kelo.

¹⁰ Mwiji keshi kwiza shina ha kwiya, akashihe, akonwone: yami nejile hanga akapwe ni mwono, hanga akapwe nawo wa kulumbama.

¹¹ Mwe kafunga mupema yami; kafunga mupema matumbika mwono wenyi hali mapanga.

¹² Alioze yoze wakulingila fweto, iye hi kafunga ko, mapanga hi nienyi ko, mamona kangunga kaneza, mahichika mapanga, machina; ni kangunga maachangumuna, maamwanga.

¹³ Achi, yoze wakulingila fweto machina, mumu iye mukwa kulingila fweto, keshi kunyonga mapanga.

¹⁴ Mwe kafunga mupema yami, ngunanyingika waze niami, ni waze niami kanangunyingika,

¹⁵ chizechene ngwe Tata kanangunyingika, ni yami ngunanyingika Tata; mungutumbika mwono wami hali mapanga.

¹⁶ Mapanga akwo nguli no, waze hi a ku limba lino ko, waze nawa, changutamba kwaneha, kumakevwa liji liami; o kumakapwa chendo chimuwika, kafunga umuwika.

¹⁷ Kashika mwe Tata kakunguzanga, mumu mungutumbika mwono wami, hanga ngukawande cheka nawa.

¹⁸ Niumwe mauchiza kuli yami, alioze munguutumbika yami mwene. Chiyulo nguli nacho cha kuutumbika, ni chiyulo nguli nacho cha kuwanda cheka nawa. Shimbi yino nayitambwile kuli mwe Tata.

¹⁹ Kwapwile kulihandununa cheka nawa hakachi ka A-Yunda mumu ha maliji ano.

²⁰ Anji a kuli ayo ambile ngwo, Ndemoniu akwete, kanazaluka; kuchi te nunamwivu?

²¹ Akwo ambile ngwo, Maliji ano hi a kuli mukwa ndemoniu ko. Ndemoniu mahasa kulawisa meso ja kapuputa, nyi?

²² Ha matangwa aze afungile ku Yerusaleme chiwanyino cha kulitumbikila:

²³ kwapwile mwaka wa chishika; ni Yesu te kanende mu tembele mu senge lia Solomone.

²⁴ A-Yunda kashika amujingilikile, o ambile kuli iye ngwo, Ndo mwiji muka mukatupwisa ni chisweswe? Kachi mwe Kristu yena, twambulwile pundu.

²⁵ Yesu waakumbulwile ngwenyi, Nanwambulwilile, alioze kunushi kufuliela: yitanga yize nakulinga mu jina lia Tata, yino kuyakushindakenya hali yami.

²⁶ Alioze kunushi kufuliela, mumu hi nuli a kuli mapanga jami ko.

²⁷ Mapanga jami kakwivwavwa liji liami, yami ngunaanyingika, no kakungukaula:

²⁸ ngunaahe mwono wa mutolo; o kechi katoka nichimwe ndo ku miaka ya mutolo, mba niumwe kechi kaachangumuna ku kwoko liami.

²⁹ Tata, yoze wanguhelo, iye munene wahiana eswe; mba niumwe mahasa kwachangumuna ku kwoko lia Tata.

³⁰ Yami ni Tata tuli umuwika.

³¹ A-Yunda anjile mawe cheka nawa hanga amwase.

³² Yesu waakumbulwile ngwenyi, Yitanga yinji yipema hingunanulweze ya kuli Tata; ha chitanga chika cha yize munungwashila mawe?

³³ A-Yunda amukumbulwile ngwo, Ha chitanga chipema kutuchi kukwasa mawe, alioze ha kushililika Zambi; mumu yena, se uli mutu, wakulipwisa Zambi.

³⁴ Yesu waakumbulwile ngwenyi, Kuchasonewene mu shimbi yenu ngwo, Nambile ngwami, Nuli mazambi, nyi?

³⁵ Kachi waavulukile ngwenyi, Mazambi, waze kuli ayo liji lia Zambi liahetele (ni chisoneko kuchishi kuhasa kuhwa),

³⁶ nunambe hali yoze Tata hanamusela ku lisandu, hanamutumu hano hashi ngwenu, Yena unashililika Zambi, mumu hinamba ngwami, Mwe Mwana Zambi yami, nyi?

³⁷ Kachi chishi kulinga yitanga ya Tata, kanda nungufuliela.

³⁸ Alioze kachi nakuyilinga, chipwe kunushi kungufuliela, fulielenu yitanga: hanga nukanyingike, hanga nukafuliele ngwe mwe Tata mwali muli yami, ni yami muli iye.

³⁹ Afupile kashika cheka nawa kumukwata: iye wakatukile kuli ayo.

⁴⁰ Wayile kuze kanda lia Yordau, kuma kuze Yoano apwile nikupapachisa hatangu: kuze Watwamine.

⁴¹ Anji ejile kuli iye; ambile ngwo, Yoano, chamwenemwene, kalingile chilayi nichimwe; alioze yuma yize yeswe ahanjikile Yoano ha kutwala kuli yono mutu yapwile yamwenemwene.

⁴² Anji amufulielele kuze.