Yoano 1 - MUKANDA USANDU WA ZAMBI 1975

¹ Ha uputukilo hapwile Liji, ni Liji liapwile hamwe ni Zambi, ni Liji liapwile Zambi.

² Mwenawo wapwile ha uputukilo hamwe ni Zambi.

³ Yuma yeswe yatangiwile ku tachi jenyi; katangile nichimwe chuma chize atangile shina kuli iye.

⁴ Muli iye mwapwile mwono; ni mwono wapwile pangu lia atu.

⁵ Ni pangu yilipanguka mu milima; ni milima kuyakumbilelio.

⁶ Kwapwile mutu wa kutumiwa kuli Zambi, jina lienyi Yoano.

⁷ Mwenawo wejilile Shindakenyo, hanga akashindakenye ha pangu, hanga eswe ku Shindakenyo yenyi akafuliele.

⁸ Iye kapwile lie pangu, alioze hanga akashindakenye ha pangu.

⁹ Pangu liamwenemwene liapwile lize, ha kwiza hano hashi, mulipangulwisa atu eswe.

¹⁰ Iye wapwile hano hashi, ni hashi hatangiwile kuli iye, ni akwa hashi kamunyingikineko.

¹¹ Wejile ku yuma yenyi mwene, ni atu jenyi mwene kamutambwileko;

¹² alioze kuli waze eswe amutambwile wahanyine chiyulo cha kupwa ana a Zambi, te kuli waze akufuliela ku jina lienyi;

¹³ aze asemukine hi ku manyinga ko, chipwe ku upale wa musunya, chipwe ku upale wa lunga, ka, alioze kuli Zambi.

¹⁴ Mba Liji walipwishile musunya, Watwamine hakachi ketu wa tò ni vumbi ni umwenemwene (twatalile uhenya wenyi, uhenya ngwe wa mwe Mwana wa wika wa kuli Tata).

¹⁵ Yoano washindakenyene hali iye, wakololokele ngwenyi, yono iye nambile ngwami, Yoze meza kunyima yami iye kulutwe liami: mumu iye waliangile.

¹⁶ Mumu cha ku kulumbama chenyi yetu eswe hitunatambula, ni vumbi ha vumbi.

¹⁷ Mumu ahanyine shimbi ku kwoko lia Mose; vumbi ni umwenemwene yejile kuli Yesu Kristu.

¹⁸ Niumwe wamwene Zambi niumwe mwaka; mwe Mwana wa wika, yoze uli mu kondo ya Tata, iye hanamusolola.

¹⁹ Yino ye Shindakenyo ya Yoano, muze A-Yunda atumine ku Yerusaleme asasendote ni A-Levi, hanga akamuhule ngwo, Yena iya?

²⁰ Iye Watayijile, kalikalileko; Watayijile ngwenyi, Hi Kristu ko.

²¹ O amuhulile ngwo, Mba kuchi, yena uli Eliya, nyi? Iye yamba ngwenyi, Hi yami ko. Ngwo, Yena uli mwe profeta, nyi? Iye wakumbulwile ngwenyi, Ka.

²² Ambile kuli iye kashika ngwo, Yena iya? Hanga tukahane kumbululo kuli waze anakatutuma; kuchi wakulivuluka yena mwene?

²³ Wambile ngwenyi, Yami nguli liji lia yoze unakololoka mu puya ngwo, Lulamisenu jila ya Mwene, ngwe ambile profeta Izaia.

²⁴ O atumiwine kuli A-Fwariseu.

²⁵ Amuhulile, ngwo, Mba kuchi te wakupapachisa atu, kachi yena hi uli mwe Kristu ko, chipwe Eliya, chipwe mwe profeta?

²⁶ Yoano waakumbulwile ngwenyi, Yami nakupapachisa mu meya; alioze umwe kanamana mukachi kenu, yoze kunwamunyingikine,

²⁷ iye yoze meza kunyima yami, lusapo wa luhaku wenyi chatelele kumujitula.

²⁸ Alingile yino yuma mu Mbetaniya kuze-kanda lia Yordau, kuze apwile Yoano nikupapachisa.

²⁹ Muze hikwacha yamona Yesu kaneza kuli iye, neye yamba ngwenyi, Talenu mwe Mwana-panga wa Zambi, yoze machiza shili ya akwa hashi!

³⁰ Yono yoze nambile ngwami, Kunyima yami kumeza lunga, mwenawo kapwa kulutwe liami; mumu waliangile.

³¹ Ni yami te chamunyingikine; alioze hanga akamusolole kuli A-Izalele, kashika nejile nikupapachisa mu meya.

³² Yoano washindakenyene ngwenyi, Ngunakamona Spiritu kanahulumuka mwilu ngwe katele; kanakatwama hali iye.

³³ Ami chamunyingikine; alioze yoze wangutumine mukupapachisa mu meya, wambile kuli yami ngwenyi, Hali mweswawo mukamona Spiritu kanahulumuka nikutwama hali iye, mwenawo yoze mapapachisa muli Spiritu Musandu.

³⁴ Hingunamono; hingunashindakenya ngwami, Yono mwe Mwana Zambi.

³⁵ Cheka nawa muze hikwacha, Yoano te kanamana, ni aali a kuli tumbaji twenyi;

³⁶ iye watalile kuli Yesu shimbu anende, yamba ngwenyi, Talenu mwe Mwana-panga wa Zambi!

³⁷ Tumbaji aali amuvwile nikuhanjika, o akawile Yesu.

³⁸ Yesu watewulukile, waamwene nikukaula, yamba kuli ayo ngwenyi, Kuchi nunafupu? O ambile kuli iye ngwo, Rapi (linalumbunuka ngwo, Longeshi), kulihi watwama?

³⁹ Yamba kuli ayo ngwenyi, Tweyenu, nutale. Ayile kashika, amwene kuze atwamine; o atwamine hamwe nenyi tangwa lize: mumu hapwile ngwe ola amuchikumi.

⁴⁰ Umwe wa kuli waze aali evwile Yoano, amukawile, iye Andeleu, mwanakwo wa Semone Petulu.

⁴¹ Iye hatangu yawana yayo Semone, yamba kuli iye ngwenyi, Hitunawane Mesaya (linalumbunuka ngwo, Kristu).

⁴² Iye wamutwalile kuli Yesu. Yesu watalile kuli iye, wambile ngwenyi, Yena uli Semone, mwana Yona; kumakuluka ngwo, Sefwa (linalumbunuka ngwo, Petulu).

⁴³ Muze hikwacha, Yesu wazangile kuya ku Ngalileya, iye yawana Fwilipe; yamba kuli iye ngwenyi, Ngukaule.

⁴⁴ Achi, Fwilipe wapwile wa ku Mbeteseta, lie limbo lia Andeleu ni Petulu.

⁴⁵ Fwilipe yawana Natanele, yamba kuli iye ngwenyi, Hitunawane yoze asonekene Mose mu mikanda ya shimbi, ni aprofeta nawa, Yesu wa ku Nazare, mwana José.

⁴⁶ Natanele yamba kuli iye ngwenyi, Chuma chipema muchihasa kukatuka ku Nazare, nyi? Fwilipe yamba kuli iye ngwenyi, Tweya utale.

⁴⁷ Yesu wamwene Natanele kaneza kuli iye, yamba ha kutwala kuli iye ngwenyi, Talenu Ka-Izalele wamwenemwene, muli iye wakuhi kalimbalimba niumwe!

⁴⁸ Natanele yamba kuli iye ngwenyi, Kulihi yena unangunyingikina? Yesu wamukumbulwile, ngwenyi, Muze te Fwilipe kanda akutambika, muze wapwanga mushi lia mukuyu, nakumonanga.

⁴⁹ Natanele wamukumbulwile ngwenyi, Longeshi, mwe Mwana Zambi yena; mwe Mwanangana wa Izalele yena.

⁵⁰ Yesu wamukumbulwile ngwenyi, Mumu hinamba kuli yena ngwami, Nakumonanga mushi lia mukuyu, unafuliela, nyi? Kumukamona yuma yinene yahiana yino.

⁵¹ Yamba kuli iye ngwenyi, Pundu, pundu, ngunambe kuli yena ngwami, Chize ku haliapwila ndo kulutwe kumukamona lilu liakwazulula, ni angelo ja Zambi nikuzezuka nikuhulumuka hali mwe Mwana Mutu.