Yishima 9 - MUKANDA USANDU WA ZAMBI 1975

¹ Mana hatunga zuwo lienyi; hasonga nguji jenyi shimbiali.

² Hashiha yimuna jenyi; halulika vinyu yenyi; hala mesa yenyi.

³ Hatuma tumbaji twenyi a mapwo; kanasanyika ha manangamo ahiana a mu limbo,

⁴ ngwenyi, Chizuzuke mweswe anjile muno. Ha kutwala kuli yoze keshi mbunge kanambe kuli iye ngwenyi,

⁵ Tweya ukalie mbolo yami, ukanwe vinyu yino hinalulika.

⁶ Enu hichikenu yizuzuke nukatwame ni mwono, nukendele mu jila ya malinjekela.

⁷ Mweswe malulamisa mukwa kulenya mamukolesa sonyi; mweswe makanjisa chingulungulu malikokela kupiha.

⁸ Kanda ukanjisa mukwa kulenya, mokomoko makuvwila kole; kanjisa mukwa mana mba makuzanga.

⁹ Fumba mukwa mana mba maliwezela mana. Longesa mukwa ululi mba maliwezela yinyingi.

¹⁰ Woma wa Yehova we uputukilo wa mana; kunyingika mwe Musandu chapwa malinjekela.

¹¹ Mumu kuli yami matangwa je moka, ni miaka ya mwono we muyikaliwezela.

¹² Nyi muopwa ni mana, mana je makuwahisa yena mwene, alioze nyi mulenya, yena mwene muchimbata.

¹³ Pwo chihepuke kakupwa ni zungo; kapwa chizuzuke; kanyingikine nichimwe.

¹⁴ Mumu kakutwama ku chikolo cha zuwo lienyi; ha chitwamo ha manangamo ja limbo.

¹⁵ Kakusanyika kuli waze anapajeka, kuli waze anayi mu majila jo,

¹⁶ ngwenyi, Chizuzuke mweswe anjile muno. Ha kutwila kuli yoze keshi mbunge kanambe kuli iye ngwenyi,

¹⁷ Meya a kwiya kuyemo; mbolo ya kulia ku tenga—cho kupema.

¹⁸ Alioze kanyingikine ngwenyi, Afu aliko, ni ngeji jenyi mwe mu Shiole ali.