Yishima 8 - MUKANDA USANDU WA ZAMBI 1975

¹ Te mana kasanyikine, nyi? Malinjekela kakalumukine, nyi?

² Kanamana helu lia manangamo ku sesa lia jila ku makano.

³ Kakutambikila ku yikolo, ku unjililo wa limbo, kuze atu kakunjilila ku yikolo.

⁴ Ngwenyi, Kuli yenu, malunga, ngunasa-nyika; liji liami lili kuli ana ja atu.

⁵ Enu yizuzuke, nyingikenu kukanyama. Enu yihepuke, pwenu ni mbunge ja malinjekela.

⁶ Ivwenu, mumu mungwamba yuma yahiana kupema; kuhanjika chami muchipwa cha yuma ya ululi.

⁷ Mumu kanwa liami mulihanjika umwenemwene; ungulungulu wapwa chizelwokeso ku mivumbo yami.

⁸ Maliji eswe a mu kanwa liami apwa a ululi. Nichimwe chuma cha kupiya hanji cha kuhenga chilimo.

⁹ Eswe analumbunuka kuli yoze kakusa chinyingi. Analulama kuli waze akuwana chinyingi.

¹⁰ Tambula kufumba chami, chahiana prata. Tambula chinyingi chami, chahiana oru yipema.

¹¹ Mumu mana ahiana rubi; ni yuma yeswe atu akufupafupa kuyalitele no.

¹² Yami Mana, kunatunga hamwe ni Kukanyama. Kunakuwana yinyingi waze akwiza ha kupukuna.

¹³ Woma wa Yehova unalumbunuka kulinwa ni chipi. Kunakulinwa ni kulengumuka, ni kulizata, ni ndako jipi, ni kanwa liapiya.

¹⁴ Yiyulo niyami, ni chinyingi chingunu. Malinjekela yami, ni tachi nguli najo.

¹⁵ Mianangana kakuyula ni tachi jami, alemu kakuhana shimbi ja ululi.

¹⁶ Akwa chiyulo ku tachi jami akuyula, ni yilolo, ni ngaji eswe a hashi.

¹⁷ Waze akunguzanga ni yami nakwazanga; ni waze akulianga kungufupa manguwana.

¹⁸ Upite ni ulemu uli hamwe ni yami; ewa upite wa kulinduluka ni ululi.

¹⁹ Mihuko yami yahiana oru, chipwe oru yipema. Kufumbula chami chahiana prata yipema.

²⁰ Kunakwenda mu jila ya ululi, he hakachi ka majila ja upatwilo,

²¹ ngukahingise yikumba waze akunguzanga; ngukazalise mazuwo jo ja upite.

²² Yehova wanguzukile ku uputukilo wa jila yenyi, shimbu kanda achiputuka yitanga yenyi ha shakulu.

²³ Anguwayishile chize ku miaka ya mutolo, chize ku uputukilo, shimbu te hashi kanda hapwa.

²⁴ Angusolwele shimbu te kanda kupwa jondo; shimbu te kukushi mafuji a meya a kulumbama.

²⁵ Shimbu kanda achikolesa milundu angusolwele, ni ye mindundena kanda;

²⁶ shimbu kanda achitanga hashi, hanji minda, chipwe uputukilo wa fufuta ya hashi.

²⁷ Muze walulikile malilu napwileko, shimbu machifunjika kujingulula cha jondo;

²⁸ muze wakolesele lilu lia malelwa ni mafuji a jondo apwile a tachi;

²⁹ muze wafunjikile njiza ja kalunga-lwiji kuchina meya mahiana shimbi jenyi, muze wafunjikile fundamentu ya hashi.

³⁰ Kweswe napwile nenyi hamuwika ngwe chilangaji. Tangwa ha tangwa napwile nguli uwahililo wenyi, nikuwahilila kumeso jenyi matangwa eswe,

³¹ nikuwahilila hashi henyi hakutwamina atu mba kuwahilila chami chapwile kuli ana ja atu.

³² Mba haliapwila, ana jami a malunga, ngwivwenu, mumu kawaha waze akuya mu majila jami.

³³ Ivwenu kufumba nukapwe ni mana, kanda nulitunacho.

³⁴ Kawaha yoze mangwivwa, nikulayila tangwa ha tangwa ku yikolo yami, nikutwaminyina ku yikuli ya mapito jami.

³⁵ Mumu mweswe manguwana mawana mwono, mba mazuka vumbi lia Yehova.

³⁶ Alioze mweswe manguvulumuna malumbula mwono wenyi; yoze akulinwa ni yami kanazange kufwa.