Yishima 7 - MUKANDA USANDU WA ZAMBI 1975

¹ Mwanami, funga maliji jami, pachikila shimbi jami.

² Funga shimbi jami Utwame ni mwono. Funga longeso liami ngwe katumba ka liso lie.

³ Uyikashile ha minwe ye; uyisonekene ha mbunge ye.

⁴ Tongola mana ngwe, Uli ndumbwami, ni ku malinjekela amba ngwe, Uli usoko wami.

⁵ Yikakufunge kuli pwo weka, kuli mwe chilambala mukwa kupepieka ni maliji jenyi.

⁶ Mumu ku njanela ya zuwo liami natalilile ku chisakala.

⁷ Namwene hakachi ka yizuzuke, natalile hakachi ka ana a malunga umwe mukweze keshi mbunge.

⁸ Kanapalika ha tapalo hakamwihi ni malindalinda jenyi, mba yaya mu jila ya ku zuwo lienyi,

⁹ ha kajimba-usoko, ha chingoloshi, ha kulá cha ufuku, mwe mu milima.

¹⁰ Mba kwatakanyine nenyi umwe pwo; ha mujimba wenyi kali ni mazalo a chikoi; mu mbunge yenyi kali ni kalimbalimba.

¹¹ Iye mukwa zungo, mukwa pami. Molu jenyi katwamine mu zuwo lienyi.

¹² Mu matapalo ali; mu yitanda ali; kanajikinyina ku malindalinda eswe.

¹³ Chocho yamukwata, yamwaha mbeju. Ni meso keslii sonyi yamba kuli iye ngwenyi,

¹⁴ Yitapo ya milambu ya sambukila nguli nayo. Musono hinamana yilakenyo yami.

¹⁵ Kashika hinatuhukila kukupatwiza nikukufupafupa, mba hinakuwana.

¹⁶ Hinala muhela wami ni tunyime a kufwifwima, ni mahina a kuseleka ni linyu lia Engitu.

¹⁷ Hinasapwila muhela wami ni perfumo ya mira, ni aloa, ni kanela.

¹⁸ Tuye tukalikuchise ni zango ndo hikwacha tukaliwahise ni zango.

¹⁹ Mumu mwe lunga keshiko. Hanayi wenyi usuku.

²⁰ Haya ni chipakumuna cha mbongo, mba meza nawa ha kakweji wa kuundu-ka.

²¹ Ni ulembekese wenyi wunji yamukumba. Yamushinjila ni kupepieka cha mivumbo yenyi.

²² Lunga yakaula washiwashi ngwe ngombe maya ku chishihilo; ngwe chihepuke maya kumufumba mu kúli.

²³ Ndo mwivu muumutuwa mu liayi lienyi; ngwe kajila kakuhumuka ku kambwila, kanyingikine ngwenyi, Wa mwono wami.

²⁴ Kashika, ana jami, ngwivwenu. Panjikenu ku maliji a mu kanwa liami.

²⁵ Kanda utayiza mbunge ye kupalumukina mu ndako jenyi. Kanda upiasukila mu majila jenyi,

²⁶ mumu halimbwisa atu anji ni yito. Waze hashiha chihuji chinene.

²⁷ Zuwo lienyi liapwa jila ya kuyila ku Shiole, nikupalumukina ku yipatulo ya ufwe.