Yishima 6 - MUKANDA USANDU WA ZAMBI 1975

¹ Mwanami, nyi hiwahana chifungo hali mukwenu, hanji hiwakwata moko ni chilambala,

² hiwafwa mu muheto wa maliji a mu kanwa lie; hiwakwachika mu maliji a mu kanwa lie.

³ Linga chino mwanami, ukalipulule, se hiwapwa mu kwoko ha mukwenu; yako ukalikehese kuli mukwenu ukalembelele kuli iye.

⁴ Kanda uya tulo, kanda ufungunuka.

⁵ Ulipulule ngwe kai ku kwoko ha chinyanga ngwe kajila ku kwoko ha mukwa kumutela.

⁶ Ena chileya, yako kuli kangenyengenye ukazewule ndako jenyi Ukakwate mana.

⁷ O, chipwe keshi mwata, hanji kalayi, hanji mukwa kwayula,

⁸ hindu kakulifupila kulia ha mwaka upema; kakulikungila kulia ha mwaka wa kucha.

⁹ Ndo mwiji muka mukaya tulo ena chileya? Tangwa lika mukakasumuka ku tulo twe?

¹⁰ Tulo amwe akepe; kunongwoka hakehe; kulindakenya hakehe moko mu tulo;

¹¹ chocho uswale we muwiza ngwe chingumba; kuhona che muchiza ngwe kajita ni yitwa yenyi.

¹² Chingandangali, chihenge, kakwenda ni kanwa lia kupiya.

¹³ Kakulenya ni meso jenyi; kakuhanjika ni molu jenyi; kakulahula ni minwe yenyi.

¹⁴ Kupiya chili mu mbunge yenyi; keshi kulitwamina kutaka chipi; kakukuwa vunda.

¹⁵ Kashika luyinda wenyi meza susumuku; susumuku kumakamakuka ni kuwuka chakuhi.

¹⁶ Yuma yisambano Yehova kalinwa nayo, ewa shimbiali yapwa chizelwokeso kuli iye.

¹⁷ Yino ngwami, Meso a kulizelula; kanwa lia mahuza; moko a kumwanga manyinga chitela chakuhi;

¹⁸ mbunge ya kutaka manyonga a uhenge; molu a kutambukila mu yuma yipi;

¹⁹ chela cha mahuza; yoze wakukuwa vunda hakachi ka usoko.

²⁰ Mwanami, funga shimbi ja tatenu; kanda wehuka longeso lia noko.

²¹ Ukayikashile matangwa eswe mu mbunge ye; ukayijichikile ha kujingilika kota ye.

²² Muze muwenda muyikusongwela. Muze mupomba tulo muyikulayila. Muze mulaula muyihanjika ni yena.

²³ Mumu shimbi yapwa ndeya. Longeso liapwa pangu. Kukanjisa cha kufumba chapwa jila ya mwono,

²⁴ cha kukufunga kuli pwo mupi, ni ku kupepieka cha limi lia pwo weka.

²⁵ Kanda wivwa usolo wa kupema chenyi mu mbunge ye; kanda umutayiza kukukwata ni meso jenyi;

²⁶ mumu ha mukunda wa chikoi—pinji ya mbolo, alioze pwo lia mbala mwono ulemu anazombo.

²⁷ Mutu mahasa kukwachila kahia mu tulo yenyi nikwocha mazalo jenyi ka?

²⁸ Mutu mahasa kwenda ha makala a kahia hindu yiliato yenyi kuyawemene nyi?

²⁹ Chocho yoze manjila kuli pwo lia mukwo. Mweswawo makwata pwo lia mukwo kechi kusamba.

³⁰ Atu keshi kuyunga mwiji nyi heya kulikuchisa, mumu ha zala.

³¹ Hindu, nyi mamukwata machihilwisa kashimbiali; mahana upite weswe wa mu zuwo lienyi.

³² Alioze yoze malinga utanji ni pwo keshi mbunge. Yoze machilinga monwona mwono wenyi mwene.

³³ Yito ni sonyi mawanako, ni kusauka chenyi kuchichi kajimuka.

³⁴ Mumu ukwa wakoka ufwatulo wa lunga, kechi kwivwa keke ha tangwa lia kukala.

³⁵ Kechi kutala ku ndando yeswayo. Kechi kuhwima, chipwe wamwaha yindo yinji.