Yishima 5 - MUKANDA USANDU WA ZAMBI 1975

¹ Mwanami, panjika ku mana jami, ivwa kanawa malinjekela jami,

² hanga ukafunge maseliekela; mivumbo ye yikafunge yinyingi.

³ Mumu mivumbo ya pwo weka kuyakusotwola wuchi, yihanjika yenyi yasenena kuhiana maji;

⁴ ahoze ku songo kasasa ngwe musase, kanambuka ngwe mukwale.

⁵ Molu jenyi anapalumuka ku kufwa; shimbo jenyi jakwata ku Shiole.

⁶ Katalile jila ya mwono. Kwenda chenyi chapwa cha kulihiza alioze iye kachinyingikine.

⁷ Kashika, ana jami, ngwivwenu kanawa; kanda nwehuka maliji a mu kanwa liami.

⁸ Kanda wiza hakamwihi nenyi; kanda ukundama ku chikolo cha zuwo lienyi,

⁹ kuchina muhana ulemu we kuli akwo, hanji miaka ye kuli mukwa uswi,

¹⁰ kuchina hanji yilambala mazuka upite we mba kukilikita che chikatokeie mu zuwo lia kandaka.

¹¹ Ku songo lie mukalishimwoka, muze musunya we ni mujimba we hiyaliwa.

¹² Mba muwamba ngwe, Cho kupiha nevwile ha kungufumba! Mbunge yami yalelesele kungukanjisa.

¹³ Chononokenene liji ha alongeshi jami; chapanjikile waze angufumbile.

¹⁴ Nanjilile mu yipi yeswe, te kwasalile hakehe wika mu chikungulwila ni mu mbunga.

¹⁵ Nwako meya a mu chikwachilo cha yena mwene, ni meya a kupukumuka mu shima ha yena mwene.

¹⁶ Te chatamba kumwanga mu matapalo e meya a ku mafuji je, nyi?

¹⁷ Akapwe a yena mwene wika; kanda apwa a yilambala aze uli no.

¹⁸ Fuji lie likawahe; ni yena, Wahilila mukwenu-pwo wa ukweze we.

¹⁹ Akapwe kuli yena ngwe chihwo cha kapaji wa zango, ngwe chihwo cha kai yoze unapeme. Mele jenyi akakuyukise matangwa eswe; zango henyi likakuwahise matangwa eswe.

²⁰ Mumu kuchi te ena mwanami, muliwahise ni pwo weka? Kuchi te mukwata ku tulo ya kandaka?

²¹ Mumu ndako jeswe ja mutu jinasoloka ku meso ja Yehova. Iye kakutala majila jenyi eswe.

²² Chingulungulu kakukwachika mu uhenge wenyi mwene. Kumakakashiwa ni mihipu ya shili yenyi.

²³ Kumakafwa mumu ha kuhona kumufumba. Makapiasuka mu kulumbama cha uhepuke wenyi.