Yishima 4 - MUKANDA USANDU WA ZAMBI 1975

¹ Anami, ivwenu kufumba cha tatenu, panjikenu hanga nukanyingike malinjekela;

² mumu ngunanwehe ndongo jipema, kashika kanda nwehuka shimbi jami.

³ Napwile nguli mwana kuli tata. Napwile mwovu, ni yami wika anguzangile kuli mama.

⁴ Tata wangulongesele ngwenyi, Mbunge ye yikalalaminye ku maliji jami; funga shimbi jami Utwame ni mwono.

⁵ Kwata mana; kwata malinjekela; kanda uavulama chipwe kupianguka ku maliji a mu kanwa liami.

⁶ Kanda wehuka mana mba makufunga; ukaazange mba makulayila.

⁷ Che chuma chahiana, mana. Kashika kwata mana, ewa helu lia yuma yeswe mukwata, kwata malinjekela.

⁸ Ualemese mba makusenyesa kulutwe. Nyi muakwata makusa ku ulemu.

⁹ Kumasa ha mutwe we chipangula cha vumbi. Kumakwaha chipenya cha uhenya.

¹⁰ Panjika, mwanami. Tambula yambo yami hanga miaka ya mwono we yikapwe yinji.

¹¹ Hinakulongesa ndako ja mana; hinakusongwela mu majila a ululi.

¹² Muze muwenda shimbo je kujichi kukwikiwa. Nyi muzomboka kuchi kutalinga.

¹³ Kakaminya ku kufumba chami, kanda uchehuka. Uchifunge kanawa mumu chapwa mwono we.

¹⁴ Kanda unjila mu jila ya yingulungulu; kanda uliata mu jila ya atu api.

¹⁵ Kanda uyako. Kanda wendelamo. Tewulukako ukahiane.

¹⁶ Wano atu kahashile kuya tulo ndo halinga chuma chipi; nyi kalimbwile umwe chakwanehena chipundu.

¹⁷ Mumu kakulia mbolo ya ungulungulu; kakunwa vinyu ya upupilo.

¹⁸ Alioze jila ya mukwa ululi yapwa ngwe kutemuka cha kucha; chakuliwezela tachi ndo tangwa ha muchima.

¹⁹ Jila ya yingulungulu yapwa milima pwi; kanyingikine haze matalingila.

²⁰ Mwanami, panjika ku maliji jami; ivwa kanawa yambo yami.

²¹ Kanda yikutoka ku meso je. Uyifunge muchima lia mbunge ye.

²² Mumu yoze mayiwana, mawana mwono; muyiwuka musunya wenyi weswe.

²³ Funga mbunge ye kuhiana yuma yeswe, mumu kwe kuuto ya mwono kwenako.

²⁴ Mbila kanwa lia kupiya; chipwe mivumbo ya kuhenga yipwe kusuku ni yena.

²⁵ Meso je atale kulutwe pundu; yindayizo ye yikalulame kulutwe.

²⁶ Tala kanawa kuze unatalikisa molu je, mba majila je eswe makawaha.

²⁷ Kanda ukapiasukila chipwe ku chindume chipwe ku chimeso. Chiza kulu lie ku yipi.