Yishima 31 - MUKANDA USANDU WA ZAMBI 1975

¹ Maliji a mwanangana Lemuele uprofeto uze naye wamulongesele.

² Kuchi mwanami? Kuchi, mwana wa jimo liami? Kuchi, mwana wa yilakenyo yami?

³ Kanda uhana tachi je kuli mapwo; kanda utwala majila je ku chize chakwonwona mianangana.

⁴ Ena Lemuele kuchapwile chuma cha mianangana kunwa vinyu; Kuchapemenene alemu kwamba ngwo, Kunwa chisasu Chilihicho?

⁵ Kuchina manwa mba mavulama shimbi akahengese upatwilo wa umwe mukwa kuyindama.

⁶ Hana kunwa chisasu kuli waze anambe kufwa; hana vinyu kuli waze anasasaminya mu mbunge.

⁷ Akanwe, avulame uswale wenyi. Kanda ewuluka nawa hunya lienyi.

⁸ Pakula kanwa lie kuhanjikila waze kahashile kuhanjika ha chikuma cha waze eswe hasala keshi usoko.

⁹ Pakula kanwa lie ukapatule ni ululi; ukapatwile yiswale ni akwa kuhona.

¹⁰ Pwo wamwenemwene iya mahasa kumuwana? Ndando yenyi yahiana chikolo ndando ya rubi.

¹¹ Mbunge ya mukwo-lunga muyimufuliela, keshi kuhona kufumbuka.

¹² Malinga lunga lienyi chipema wika, hi chipi ko, matangwa eswe a mwono wenyi.

¹³ Kakufupa wona wa mapanga ni linyu; kakusa mbunge yenyi ku kuhondangana ni moko jenyi.

¹⁴ Kanapu ngwe mato a akwa kusepa; kakuneha kulia chenyi kusuku.

¹⁵ Kakulimeneka shimbu kuchili ufuku; kakuhana kulia kuli akwa zuwo lienyi; kakutetiela ana-mapwo jenyi milimo yo.

¹⁶ Matala munda, mba maulanda. Malima munda wa uva ni tachi ja moko jenyi

¹⁷ Kakulijichika mu zalilo ni tachi; kakutakamisa moko jenyi.

¹⁸ Kakutala kanawa yikumba yenyi yalumbunuka ha ndando; ndeya yenyi kuyishi kujima ha ufuku.

¹⁹ Makwata ku uhoselo; masa moko jenyi ku wanda.

²⁰ Kakuzoza moko jenyi kuli yiswale, ewa, kakuzoza moko jenyi kuli akwa kuhona.

²¹ Keshi kuvwila woma neve hali akwa zuwo lienyi, mumu akwa zuwo lienyi eswe kakuzala mazalo aali.

²² Kakulilingila tunyime a kuseleka; mazalo jenyi apwa a linyu ni hina lia ufungo.

²³ Lunga lienyi kakumusa chinyingi mu chota muze matwama hakachi ka makulwana a chifuchi.

²⁴ Kakulinga mazalo a linyu nikualanda. Kakutwala miya kuli akwa kulanda.

²⁵ Kakulijika ni tachi ni ulemu; kakuseha ha kutwala ku miaka muyizaho.

²⁶ Kakupakula kanwa lienyi ni mana; shimbi ja utu jili ha limi lienyi.

²⁷ Kakutala kanawa ku ndako ja akwa zuwo lienyi; keshi kulia kulia cha uleya.

²⁸ Ana jenyi makatuka nikumuvuluka ngwo, Kawaha! Lunga lienyi kakumuhalisa ngwenyi,

²⁹ Mapwo anji halinga kanawa alioze yena waahiana eswe.

³⁰ Vumbi kuliakulionga, ni upeme wa kumeso wapwa wamokomoko, alioze pwo yoze wavwila woma Yehova, mamuhalisa.

³¹ Hana kuli iye mihuko ya moko jenyi; yitanga yenyi mwene yikamuhalise mu yikolo ya limbo.