Yishima 30 - MUKANDA USANDU WA ZAMBI 1975

¹ Maliji a Agure mwana wa Jake: uprofeto. Mwe mutu kanambe kuli Itiele, mwe Itiele ni Ukale ngwenyi,

² Chamwenemwene kunapwa chizuzali kuhiana atu eswe; chishi ni malinjekela a mutu.

³ Chalilongesele mana; chipwe yinyingi ya mwe Musandu chishi nayo.

⁴ Iya hanazezuka mwilu akahulumuke nawa? Iya hanakungika fuji mu moko jenyi? Iya hanakashila e meya mu mazalo jenyi? Iya hanakolesa masongo eswe a hashi? Jina lienyi iya? Jina lia mwanenyi iya, nyi unamunyingika?

⁵ Liji lieswe lia Zambi lipema. Iye kapwa lukepwe kuli waze anamufuliela.

⁶ Kanda uweza ku maliji jenyi kuchina makukanjisa mba makumona uli mukwa mahuza.

⁷ Yuma yiali hinakwita; ungweheyo shimbu kanda ngufwa;

⁸ ngwami, Twala kusuku ni yami kulifuza ni mahuza; kanda ungwaha chipwe uswale chipwe upite; ungwehe kulia chize chinangute,

⁹ kuchina hanji mungukuta mba mungulikala yena ngwami, Yehova iya? Hanji kuchina ngupwe chiswale mba ngukeye ni kujilula jina lia Zambi yami.

¹⁰ Kanda ulamikiza ngamba kuli kako, kuchina makutuka mba muopwa ni mutonga.

¹¹ Kuchili chisemuko chakutukana atato; keshi kuwahisa anaye.

¹² Kuchili chisemuko chakwamba ngwo, Tunapeme. Hindu kaasanyishine luchisa wo.

¹³ Kuchili chisemuko—Cho kulizata kumeso! Meso jo a kuhetula Chichize!

¹⁴ Kuchili chisemuko mazo jo kapwa ngwe tutana; yiwunji yo ngwe poko hanga akawumbule yiswale hashi, akasutule akwa kuhona hakachi ka atu.

¹⁵ Zambo kali ni ana aali akwamba ngwo, Hana, hana! Ewa kuyili yuma yitatu kuyishi kuyuka; hanji yiwana kuyishi kwamba ngwo, Kwahwa!

¹⁶ ngwami, Shiole; ni jimo lia mumba; ni mavu aze keshi kuyuka ni meya, ni kahia kaze kukeshi kwamba ngwo, Kwahwa!

¹⁷ Liso lize liakuyunga tato, Kakulelesa lufumbo wa naye; yikwakwalo a mu chikulo makalitombongona; ana ja pupa makalilia.

¹⁸ Yuma yitatu yanguhiana kuyinyingika; ewa yiwana chayinyingikine;

¹⁹ ngwami, Jila ya pupa mu tetela; jila ya kapela ha liwe; jila ya wato hakachi ka kalunga-lwiji; jila ya lunga ni mwana-pwo.

²⁰ Chocho chapwa jila ya chikoi. Malia, makusumuna kanwa lienyi, mamba ngwenyi, Chalingile chipi.

²¹ Yuma yitatu kuyakuchikimisa hashi; ewa yiwana kahashile kulikoleza nayo;

²² ngwami, Ndungo muze hapwa mwanangana; ni chihepuke muze hakuta;

²³ ni pwo mupi nyi haya ulo; ni ndungo ya pwo muze hapwa swana ya kako.

²⁴ Yuma yiwana yikepekepe hano hashi; alioze mana anji ali no;

²⁵ ngwami, Tungenyengenye o tushitu keshi tachi alioze kakulikungila kulia cho ha mwaka wacho.

²⁶ Sele o tushito keshi tachi alioze kakusa mazuwo jo mu mawe.

²⁷ Makumbi keshi mwanangana, alioze kakutuhukila eswe hamuwika.

²⁸ Chandawuli kakumukwata ni moko, hindu mu mazuwo a mianangana atwama.

²⁹ Atatu kakwenda kanawa, ewa awana kakupema ha kwenda cho;

³⁰ ngwami, Ndumba mukwa kuhiana tushitu eswe ni tachi; keshi kukondoloka hali niumwe.

³¹ Ni kavwalu; ni kuji ya pembe; ni mwanangana yoze keshi kuhasa kumukatukila.

³² Nyi hiwalinga uhepuke ha kulinangamisa; nyi hanji hiwanyonga chuma chipi, sako kwoko ha kanwa lie.

³³ Kuchuka cha yamwa kuchakuneha maji a yamwa; kuhonda cha mazulu muchineha manyinga, chocho kwihia ufwatulo muchineha ndombo.