Yishima 3 - MUKANDA USANDU WA ZAMBI 1975

¹ Mwanami, kanda uvulama longeso liami. Mbunge ye yikafunge shimbi jami,

² mumu muyikwaha kusuha cha matangwa ni miaka ya mwono, ni sambukila nawa.

³ Kanda utayiza utu wa zango ni umwenemwene kukukatuka. Ukayikashile ku kota ye, nikuyisoneka ha mbunge ye.

⁴ Chocho mukawana vumbi ni malinjekela apema kumeso ja Zambi ni atu.

⁵ Fuliela Yehova ni mbunge ye yeswe; kanda ukajikijila ha malinjekela ja yena mwene.

⁶ Ukamutayize mu yilinga ye yeswe mba iye makalulamisa majila je.

⁷ Kanda ulimona mukwa mana kuhiana; pwako ni woma wa Yehova ukatewuluke ku yipi.

⁸ Acho muchikapwa kuhinduka cha musunya we, ni usongosongo wa yifwaha ye,

⁹ bemesa Yehova ni yikumba ye ni mbuto yitangu ya kufumbuka che cheswe,

¹⁰ mba machila je makazala ni kulumbama ni yikwachilo ye muyikasupwoka ni vinyu.

¹¹ Mwanami, kanda ulelesa kufumba cha Yehova, hanji kwivwa kupiha ha kukanjisa chenyi,

¹² mumu mweswe Yehova kamuzanga kakumukanjisa, ngwe lunga kakukanjisa mwanenyi yoze wamuwahila.

¹³ Kawaha yoze mawana mana, ni yoze mazuka malinjekela,

¹⁴ mumu kufumbuka chayo chahiana kufumbuka cheswe cha prata. Kuyipita chahiana kupita oru.

¹⁵ Yahiana ndando ya rubi mba cheswacho muhasa kuchizanga kuchalitele nenyi.

¹⁶ Yinyingi yapwa ngwe yoze uli ni mwono wunji mu kwoko lienyi lia chindume. Mu kwoko lienyi lia chimeso kali ni upite ni ulemu.

¹⁷ Ndako jenyi japwa ja kuwaha, mba majila jenyi jeswe ja sambukila.

¹⁸ Kuli waze mayizuka yapwa ngwe mutondo wa mwono. Kawaha waze akuyilalaminya.

¹⁹ Yehova wakolesele hashi ni mana. Ni malinjekela walulikile malilu.

²⁰ Ku yinyingi yenyi jondo jajikukile ni malilu kakunoka mume.

²¹ Mwanami, funga mana angunu ni maseliekela, kanda uatayiza kukatuka ku meso je.

²² Kumakapwa mwono ku mbunge ye ni vumbi ku kota ye.

²³ Chocho mukenda nikujikiza mu jila ye, mba kulu lie kulichi kuhukana.

²⁴ Nyi mupomba kuchi kevwa woma; ewa ha kupomba, tulo twe mapwa apema.

²⁵ Kanda wivwa woma wa mwongo wa susumuku, hanji wa kwonwona cha yingulungulu muze muchiza;

²⁶ mumu Yehova kumakapwa ujikijilo we, iye makafunga kulu lie, kulichi hakwachika.

²⁷ Kanda umina chuma chipema kuli yoze chatamba kunwahacho, nyi muchihasa.

²⁸ Nyi uli nacho, kanda wamba kuli mukwenu ngwe, Yako ukeze cheka nawa; hamene mungukwahacho.

²⁹ Kanda utaka yipi hali mukwenu yoze unatwama hamuwika ni yena ni kukufuliela.

³⁰ Kanda ulitachika ni mutu chitela chakuhi se kakulingile chipi.

³¹ Kanda uvwila ukwa mukwa kupupula, kanda utongola niyimwe ya majila jenyi,

³² mumu mukwa kupiya kapwa chizelwokeso kuli Yehova, alioze kakulikata ni mukwa ululi.

³³ Shingo lia Yehova lili ha zuwo lia chingulungulu, alioze kakuwahisa muze mwatwama mukwa ululi.

³⁴ Pundu kakulenya akwa kulenya, alioze kakupwa ni vumbi kuli akwa kulikehesa.

³⁵ Akwa mana kumakatunga ulemu, alioze kuli yihepuke sonyi mujipwa kufumbuka cho.