Yishima 29 - MUKANDA USANDU WA ZAMBI 1975

¹ Yoze makwata pami ha kumukanjisa kanjikanji, mamwonwona susumuku ni ulamwino wakuhi.

² Muze akwa ululi moka atu mawahilila, alioze muze chingulungulu mayula, atu matwa mikuma.

³ Mweswe mazanga mana mawahisa tato; alioze yoze maliendela ni yikoi kanamwange upite wenyi

⁴ Mwanangana kakukolesa chifuchi ni upatwilo; alioze mukwa kufwetesa chindo kakuchilumbula.

⁵ Yoze mapepieka mukwo kakulitela wanda wa muheto ha molu jenyi.

⁶ Mu uvulumunyi wa mutu mupi mwatwama kambwila, alioze mukwa ululi kakwimba ni kuwahilila.

⁷ Mukwa ululi kakunyingikisa chikuma cha chiswale; alioze chingulungulu keshi malinjekela kuchinyingika.

⁸ Akwa kulenya kakumwanga kahia mu limbo; alioze akwa mana kakuchinda ufwatulo.

⁹ Nyi mukwa mana malitachika ni chihepuke; chipwe matenuka chipwe maseha, hindu kuhwima chakuhi.

¹⁰ Akwa kumwanga manyinga kakuvwila kole yoze upwa mungunu; alioze mukwa ululi kakuzanga kumuwahisa.

¹¹ Chihepuke kakwamba utenu wenyi weswe; alioze mukwa mana maukokolola nikuuholesa.

¹² Nyi mukwa kuyula mapanjika ku mahuza, akwa kumulingila eswe kapwa yingulungulu.

¹³ Chiswale ni mukwa kupinjisa malitakana; Yehova kakupangulwisa meso ja eswe ni aali.

¹⁴ Mwanangana yoze mapatwila yiswale ni ululi, ngunja yenyi muyikakola ya mutolo.

¹⁵ Mbwechi ni kukanjisa kuyakuhana mana; alioze nyi muwecha mwana chizechene makolesa sonyi naye.

¹⁶ Muze yingulungulu moka uvulumunyi muwoka; alioze akwa ululi mamona kulimbuka cho.

¹⁷ Fumba mwané mba makuhwimisa, ewa mawahisa mbunge ye.

¹⁸ Kuze usolwelo wakuhi atu kakulumbuka; alioze kawaha yoze mafunga shimbi.

¹⁹ Ngamba kechi kutá ku maliji, mumu chipwe kanevu hindu kechi kuchisa mbunge.

²⁰ Unamono mukwa kulipupula kuhanjika nyi? Chihepuke muhasa kumutalatala chimwe chuma, hi iye ko.

²¹ Yoze malela ngamba yenyi kanawa kanawa chize ku wanuke wenyi, ku songo mamuzuka ngwe mwanenyi.

²² Chitenu kakuvundula ndombo; Chifwatulo kakwokesa uvulumunyi.

²³ Kulengumuka cha mutu muchimulimbwisa; alioze mukwa kulikehesa mazuka ulemu.

²⁴ Mweswe malianyina ni mwiji kalizangile mwene; kanevu kulishinga hindu kambile nichimwe.

²⁵ Kuvwila woma atu muchineha kambwila; alioze mweswe mafuliela Yehova matwama kanawa.

²⁶ Anji kakufupa kuwahila mukwa kuyula; alioze mutu mweswe kakumupatwila kuli Yehova.

²⁷ Mukwa uhenge kapwa chizelwokeso kuli mukwa ululi; yoze walulama mu ndako jenyi kapwa chizelwokeso kuli chingulungulu.