Yishima 27 - MUKANDA USANDU WA ZAMBI 1975

¹ Kanda ulisambila tangwa lia hamene mumu kwanyingikine chize tangwa limuwika mulineha.

² Mutu weka akakuchichimieke hi kanwa lia yena mwene ko. Chikapwe cha mutu weka hi mivumbo ya yena mwene ko.

³ Liwe linaleme chipwe masekeseke, alioze utenu wa chihepuke Wahiana yeswe yiali ha kulema.

⁴ Ufwatulo uswi ukwete; utenu kuwakuhungumuna, alioze iya mahasa kulikoleza ni ukwa?

⁵ Kukanjisa cha kumeso chinawaha kuhiana zango lize liapwa lia kusweka.

⁶ Mbandu ja kasendo kujapwa ja kukwasa, alioze mbeju ja mukwa kole kujapwa ja kwonga.

⁷ Yoze wakuta, chishila cha wuchi muchimuzelwokesa; alioze kuli mukwa zala yuma yeswe yisasu muyipwa yiyema.

⁸ Mutu yoze mendangana nikuhichika kuma kwenyi kapwa ngwe kajila yoze mendangana nikuhichika chaswa chenyi.

⁹ Maji ni yitumbo ya lupembo kuyakuwahisa mbunge, chocho kuwaha cha kasendo ka mutu chize muchikatuka ku yiyulo ya mu mbunge.

¹⁰ Kanda wehuka sepa lie hanji sepa lia tatenu; kanda ukaya ku zuwo lia yayenu hanji mwanakwenu ha tangwa lia lamba lie. Shinaho umwe mukwenu wa hakamwihi, hi yayenu ko yoze uli kusuku.

¹¹ Mwanami pwako ni mana Ukawahise mbunge yami, ngukahase kukumbulula yoze manguchoka.

¹² Chikanyame malangikiza maswama, alioze yizuzuke masenya kulutwe mba maalamba.

¹³ Tambula mazalo a yoze mahana chifungo hali chilambala; yoze mahana chifungo hali pwo weka akapwe tombo kuli yena.

¹⁴ Yoze mafumanyisa sepa lienyi ni liji linene nikulimeneka chimenemene, mamumwenacho ngwe shingo.

¹⁵ Pwo wa kulitachika kapwa ngwe meya akusotwokela ha tangwa lia vula munji.

¹⁶ Yoze meseka kumukwika malikwata ni fuji; kwoko lienyi mulikanjila mu maji.

¹⁷ Ngwe chikungo kuchakukalula chikungo, chocho mutu kakukalula meso ja sepa lienyi.

¹⁸ Mukwa kufunga mukuyu malia mihuko yawo; yoze mavumbika kako makamulemesa.

¹⁹ Mbunge ya mutu kuyinalite ni mbunge ya mutu chizechene ngwe meso ja mutu kanalite ni Chizulie cha meso jenyi mu meya.

²⁰ Shiole ni ye Apandone kuyishi kuzala; chocho meso ja mutu kechi kayuka.

²¹ Ndeho ya kupemesena prata, ni lutengo wa kupemesena oru chocho kakweseka mutu ha kumuchichimieka.

²² Chipwe musohola chihepuke mu chinu ni mwishi hamwe ni mbuto ya kutwa hindu uhepuke wenyi kuuchi kamukatuka.

²³ Tala kanawa chize atwama pembe ni mapanga je; tala kanawa ngombe je,

²⁴ mumu upite kuwapwile wa mutolo; chipwe chipangula te kuchakulinduluka ku yisemuko yeswe nyi?

²⁵ Mwambu unasokoloka, mwambu waha kuunalisolola ni yiputa ya ha milundu kanayichi.

²⁶ Ana-mapanga kapwa a kukujika; pembe kapwa ndando ya munda.

²⁷ Yamwa ya pembe muyiheta ha kukulisa, ni ha kulisa zuwo lie, yikapwe ha kunwa ana-mapwo je.