Yishima 26 - MUKANDA USANDU WA ZAMBI 1975

¹ Ngwe neve ha mwaka wa chivukuminya ni vula ha mwaka wa kucha, chocho ulemu kuwatelele chihepuke.

² Ngwe ndalamusepe ha kupekumioka chenyi ni kapiasa ha kuhumuka chenyi, chocho shingo lize kulishi chitela kulishi kupwila.

³ Hali kavwalu shikote; hali chimbulu lelia; ha nyima lia yihepuke mbwechi.

⁴ Kanda ukumbulula chihepuke nikulita ni uhepuke wenyi kuchina mulifwa nenyi.

⁵ Kumbulula chihepuke nikulita ni uhepuke wenyi kuchina alimone ngwenyi, Nguli mukwa mana.

⁶ Mweswe matuma lusango mu kwoko lia chihepuke kanalipatula molu jenyi; manwa upupilo.

⁷ Molu ja chilema kalitele, chocho chapwa chishima mu kanwa lia yihepuke.

⁸ Ngwe kafunda ka diamante ha mulumba wa mawe, chocho apwa yoze mahana ulemu kuli chihepuke.

⁹ Ngwe mbimbo yize muyituwa kwoko lia mukwa kuzengewa, chocho chapwa chishima mu kanwa lia yihepuke.

¹⁰ Ngwe ngashi yoze malemeka eswe, chocho apwa yoze makamba chihepuke ni kwononona akwa kupalika lume.

¹¹ Ngwe kawa kakuhilukila yisaza yenyi, chocho chihepuke kakuhilukila uhepuke wenyi.

¹² Unamono umwe kanalimono ngwenyi, Nguli mukwa mana, nyi? Chihepuke muhasa kumutala tala chimwe chuma, hi iye ko.

¹³ Chileya kakwamba ngwenyi, Ndumba mu jila ali; ndumba kwali ku matapalo.

¹⁴ Chileya kakulangumioka ha muhela wenyi ngwe pito ha ndevaliso jalio.

¹⁵ Chileya kakuchupika kwoko lienyi mu chenga; chapwa chikalu kuli iye kulitwala nawa ku kanwa lienyi.

¹⁶ Chileya mu meso jenyi mwene kapwa mukwa mana kuhiana malunga shimbiali waze mahasa kwambulula chikuma.

¹⁷ Mukwa kupalika yoze manjila mu ndombo hi niyenyi ko, kapwa ngwe yoze makwata kawa ku matwi.

¹⁸ Ngwe chizaluke yoze makonga kahia, ni mivi, ni kufwa,

¹⁹ chocho apwa yoze monga mukwo mba mamba ngwenyi, Ngunahehe.

²⁰ Nyi kunyi kujishiko kahia mukajima; kuze kukushi mukwa kalundanganyishi kulitachika muchikahwa.

²¹ Ngwe manungu ha makala a kahia ni kunyi ha jiko, chocho apwa mukwa kulitachika kuvundula ndombo.

²² Maliji a mukwa kalundanganyishi kapwa ngwe kakulia kayema; alioze kakunjila mwe muchima lia jimo.

²³ Mivumbo ya kuhuhumuna hamwe ni mbunge ya ungulungulu yapwa ngwe sapa ya uma ya kulamika ni yinganga ya prata.

²⁴ Mukwa kole kakwonga ni mivumbo yenyi mumu kakutulika kwonga muchima lienyi.

²⁵ Muze mahanjika kanawa kanda umufuliela mumu kali ni yizelwokeso shimbiali mu mbunge yenyi.

²⁶ Chipwe kole yenyi kuyalifuka ni ulembekese, ungulungulu wenyi mausolola kumeso ja chikungulwila.

²⁷ Mweswe mafula wumbu malimbukilamo mwene; mweswe malangumuna luliwe mulumuhilukila.

²⁸ Mukwa limi lia mahuza keshi kuzanga waze halemeka; kanwa lia kupepieka kuliakulinga kwonwona.