Yishima 25 - MUKANDA USANDU WA ZAMBI 1975

¹ Yino nawa yishima ya Solomone, yize malunga a Hezekia mwanangana wa A-Yunda asonekene.

² Kuli Zambi chapwe ulemu kufuka chuma, alioze kuli mianangana chapwa ulemu kuhengula chikuma.

³ Ngwe malilu asuha kwilu, ngwe mavu asuha kushi, chocho mbunge ja mianangana keshi kuhasa kuyisa chinyingi.

⁴ Chiza yinganga ku prata mba mukusoloka musenge uze muulita ni mwe fuli.

⁵ Chiza yingulungulu kumeso ja mwanangana mba ngunja yenyi muyikakolela mu ululi.

⁶ Kanda ulichichimieka kumeso ja mwanangana, chipwe kumana mu muhela wa atu anene,

⁷ mumu Shinaho akambe kuli yena ngwo, Tweya kuno kulutwe; chipi nyi mamba kuli yena kumeso ja mulemu yoze wamona ngwo, Yako kunyima.

⁸ Kanda ulipupula kutuhuka kulitachika kuchina hanji ku songo liacho kuchi kunyingika chize mulinga muze mukwenu hakukolesa sonyi.

⁹ Hanjika chikuma che ni mukwenu ukawenyi; kanda wambulula kuli mukwo chikuma cha mukwenu cha mu mbunge,

¹⁰ kuchina hanji yoze machivwa makutuka, ni uhulu we kuuchi kukukatuka.

¹¹ Liji lia kuhanjika haze hanalite liapwa ngwe mihuko ya oru mu mutonga wa prata.

¹² Mukwa mana yoze mahana liji lia kukanjisa mu twitwi lia kwononoka kapwa ngwe kazeya ka oru, hanji chuma cha uhenya cha oru yipema.

¹³ Kuli waze amutuma kanganda wa jika kapwa ngwe chishika cha neve ha mwaka wa kucha, mumu kakuhuzulula mbunge ja akako.

¹⁴ Yoze malisamba nikulionga ha kujama chenyi, kapwa ngwe malelwa ni fuji yize kuyishi vula.

¹⁵ Ha kulihumikiza chinji kakukununa mukwa kuyula; limi liovu kuliakumakuna yifwaha.

¹⁶ Hiwawana wuchi nyi? Liako nikulita, kuchina mukuta naye mba hikuusaza.

¹⁷ Kulu lie kanda uliliachila kanji mu zuwo lia mukwenu kuchina maliseka ni yena mba kechi kukuzanga.

¹⁸ Mweswe mashindakenya mahuza hali mukwo kapwa ngwe muhato, hanji katana, hanji mwivu wa kukalula.

¹⁹ Kufuliela mukwa mafwefwe ha mwaka wa lamba kuchapwa ngwe lizo liasekengela hanji kulu liasengunuka.

²⁰ Yoze membila miaso mukwa kulema mu mbunge kapwa ngwe yoze mazula mazalo mu chishika hanji ngwe vinagre ha soda

²¹ Nyi mukwa kole ye mevwa zala mulise; nyi pwila anevu munwise,

²² mumu mulumbikila makala a kahia ha mutwe wenyi mba Yehova makakwononona.

²³ Fuji ya ku Norte yakuneha vula, chocho limi lia kutokwela mulikaneha meso a wuli.

²⁴ Kutwama ha mbango ya fulumba chinawaha kuhiana kutwama mu zuwo linene hamuwika ni pwo mukwa kulitachika.

²⁵ Lusango mupema wa ku chifuchi chisuku kapwa ngwe meya akekema kuli mukwa pwila.

²⁶ Mukwa ululi yoze matayiza yingulungulu kapwa ngwe fuji lia kuvundula, hanji ngwe shima lize halipihisa.

²⁷ Kuchapemene kulia wuchi wunji naye; chocho atu aze mafupa ulemu wo ene acho hi ulemu ko.

²⁸ Yoze kanyingikine kuhumikiza Spiritu yenyi kapwa ngwe chihunda chize chauzuka kuchishi chipanga.